Read Pochuri Naga 1 KAJIRI 17 Bible Online

1 KAJIRI 17 - Pochuri Naga bible

1 KAJIRI 17

¹Jüti küsa vü Elijah, Tishbewa Gilead vü Tishbe vü kürhowa nüh Ahab vü, “VÜWA, Israelri Saküüwuowa nüh rhoküveh üta, hi nüh matü vü tsieküvehwa, mahvi hamari vü eh zhü vünüh küchie nüh aküzo kütsawa nyu, nyutü atsoh kürüwa nyu,” ti küza.

²Thinü VÜWA zhü tü ma vü ru taji,

³“Hala nüh tsezhu nü zhiehtu wuovü küreletewa taji noh mpa nüh Kherit kutso kütuoh vü küthi luo, jüma tü Jordan zhiehshu wuovü.

⁴Noh tü akutso jüla nüh zhunaveh, thi jüla nüh noh vo sa üti hi nüh awuori vü azhütsümthuoh ünüh,” ti küza.

⁵Jükenüh ma tü wa nü VÜWA zhü müzhe taji Jordan zhiehshu wuovü Kherit kutso vü kürho sa.

⁶Thi arüne vü nga thi münüleh vü nga ti, ti awuo nüh lohse thi asa sihru tsü, jüti sanü akuzawa vünüh ajuh zhu ti sa.

⁷Rülo pike sevü akutsowa tü ngetewa, küpakenühnyunü azhih jüla atso mükürü kenüh.

⁸Jüti küsa vü VÜWA zhü tü ma vü ru taji,

⁹“Sühra nü Zarefat vü waluo, jüma tü Sidon vü pehveh ünüh, thi jüla kürho saluo. Halie, noh vü avo sa üti hi nüh jüla tünyivüh küsü vü azhütsümthuoh ünüh,” ti küza.

¹⁰Jükenüh ma tü sühra nü Zarefat vü tewa; thi ma tü anyujiwa kheri vü ru ünü, halie, tünyivüh küsü tü athsoh mükhrüpehla; ma nüh ma ji nü ma vü, “Hi nüh zhu na küsa kenüh küfüküsü vünüh ajuh pike tieru hi vü tsü jie,” ti khuo.

¹¹Nyimzawa nüh jüma vi nti wa ünü ma nüh ma ji taji, “Noh kevünüh lohse pike viru hi tsüluo,” ti khuo.

¹²Nyimzawa nüh ma vü, “VÜWA noh Saküüwuowa nüh rhoküveh üta hitü zanyoküsü nga vehmsa, thitü hi nüh pehküveh thuoüji süzahlovü ahie müshe küsü thi vüjuh pike afüzü lovü tüküveh wie; thi khinyi hi tü athsoh küsükünyi mükhrüwa nü eh kenüh thi ehtsa kenüh ti jüma küche taji hisü tü jüma tsam nü süm luo nti savehthuoh lie,” ti küza.

¹³Thinü Elijah nüh ma vü, “Mükrü tüm nü wa taji noh nüh küüza üti saluo; thitü pokhu sa eh kenüh tieshu küsü sanü hivü viru luo, jüsevü nüh noh kenüh thi noh tsa kenüh saluo,

¹⁴küpakenühnyunü VÜWA Israelri Saküüwuowa nüh, ahie süzahwa türü tsoteküwawanyu, thi afüzü lovü vüjuhwa tü küweh teküwawanyu, VÜWA nüh azhih vü atsoh mükürüketü küju nü,” ti küza,

¹⁵Jüti küüza vü nyimzawa tü wa nü Elijah nüh küüza üti sa; jüti sanü ma, Elijah thi ma zhehlori tü rülo hothake kenüh tsawa.

¹⁶VÜWA zhü müzhe nü Elijah nüh küphrahte üta ahie sühzahwa tü rütsomwa, nyutü vüjuh füzüwa tü ngete küwa müsa.

¹⁷Hama sevü nyimzawa, azheh hama vühwa tsa tü natewa; thi ma künatü müsüshehtewa nü ma vü arühtho küsü nga mükütü satewa.

¹⁸Thinü nyimzawa nüh Elijah vü, “O Saküüwuowa anyiwa, noh tü hi vü mowa mükülo pehveh lo? Noh tü eh kükhiemuo sakümshe, thi eh tsa saküüsü nti hi vü ru ülo,” ti küza.

¹⁹Jüti küüza vü ma nüh nyimzawa vü, “Noh tsa hi tsüluo,” ti khuo. Thi ma nüh nyimzawa tühso vünüh ma vi taji ma küruo nü küshothuo kümsie ma nüh küzehpewa vü wa nü ma mpa ma zerügivü küzeh.

²⁰Ma tü VÜWA vü zie taji, “O VÜWA, eh Saküüwuowa, noh tü hi nüh nyipeh küveh tünyivühwa atsa zothe nü ma vü kümsü tsüvehülo?” ti sa.

²¹Jüti sanü ma tü ma ke küchekeri atsawa vü thsuoküze nü VÜWA vü zie taji, “O VÜWA eh Saküüwuowa, atsa hama kürholi tü shele mavü küüru luo,” ti sa.

²²Thinü VÜWA tü Elijah jikhi küna tsü nü atsawa kürholi tü ma vü sheleru nü rhora le.

²³Jüsevü Elijah nüh atsawa tü kürieke kümsiewa vünüh azhehvü viteru nü ma zah vü tsü taji Elijah nüh, “Noluo, noh tsa tü rhovehthuoh ünüh,” ti küza.

²⁴Thinü nyimzawa nüh Elijah vü, “Noh tü Saküüwuowa anyiküsüthuoh ta küsa hi nüh khinyi thuoüji thsüvehthuoh, thi noh polovü VÜWA zhüwa tü azhütsa ta küsa hi nüh thsütovehthuoh,” ti küza.