Read Pochuri Naga 1 KAJIRI 19 Bible Online

1 KAJIRI 19 - Pochuri Naga bible

1 KAJIRI 19

¹Elijah nüh küsa aveh thi mokümjie ma nüh anyuchuwa vi nü setsaküthsüri aveh zothe khehm nüh Ahab nüh vi Jezebel vü küzakheh.

²Thinü Jezebel tü Elijah vü zhühleküvüri küsü küzetaji, “Jükenüh thuohtü hakümjie küsa tsotho vü hi nüh noh kürholi vi nü mari kürho üta samtsü thuoüji nyiazari tü hi vü jükümjie, nyutü jüma nyiehvü nga nüh sakütsüwa saluo,” ti küza.

³Jüti küüza vü ma tü krüküm kenüh sühra nü ma kürholiviküthi nti Beersheba vü teru, jüma tü Judah vü pehveh, ma nüh masiepewa jüla küpehm.

⁴Thitü ma thuoüji rülo küsü aletse sanü reza vü teru taji rüjorhu kükhu vü shupeh nü aküsü khuo taji, “Wale wiethuoh; khinyi thuoüji, O VÜWA, eh kürholi vitewaluo; küpakenühnyunü hitü eh pari nyiehvü nüh mhie müveh nü,” ti küza.

⁵Jüti sanü ma tü rüjorhu kükhu vü tsuo zehtewa; thi nüh ahlie, rügizhüleri küsü nüh ma pa taji ma vü, “Sühra nü tsaluo,” ti küza.

⁶Jüti küüza vü ma nüh no ünü, halie, ma lü wuovü aloh küsa rügivü atieshu küsü thi ajuh süzah küsü ti küpehla ngukera. Thi ma tü jüma tsa thi zhu ti sanü zehtewa le.

⁷Jüsevü VÜWA zhühlewa tü akünyiawa ru le nü ma pa taji, “Sühranü tsaluo, jüüta mükünyu nü aletsewa tü noh kenüh kholem na saveh ünüh,” ti küza.

⁸Jüti küüza vü ma tü sühra nü tsa thi zhu ti sanü ashie jüma kükhra vünüh Saküüwuowa küzhi Horeb vü rülo zürake thi rühzazührake tsetewa.

⁹Thi ma tü jüla nüh alopie küsü vü ru nü jüla peh, thi nüh ahlie, VÜWA zhü tü ma vü ru taji ma vü, “Noh tü hala mowa sapehveh lo, Elijah?” ti küna.

¹⁰Thinü ma nüh, “Hi tü VÜWA, kükhratsari Saküüwuowa kenüh hi nokürüpam; küpakenühnyunü Israel nyiri nüh noh kütsathuozhüwa kulekümthuoh kenüh, noh kükhurüpewa vijam, thi noh setsaküthsüwa anyuchuwa nüh rehthe khehmthuoh; thi hi tü hi mpatsatsa kükhe saveh; thi mari tü eh kürholi vi nta phahveh,” ti rületsü.

¹¹Thinü ma nüh, “Tsewaluo, thi aküzhi rügivü VÜWA tüvü tsieluo,” ti küza. Thi halie, VÜWA tü ru tsekewa, thi amürhü küji kükhra küsü ru nü aküzhiri mürhürie taji VÜWA tüvü nüh alokrüri tü kuorie teküwa sa, thitü VÜWA thuoüji amürhü vümütü; amürhü sevü amükhrüküüzhüh ru, thitü VÜWA tü amükhrüküüzhüh vü nga mütü;

¹²thi mükhrüküüzhüh sevü nga anyih ru, thitü VÜWA tü anyih vü nga mütü; thi anyihwa sevü ajikhi külohnyi küsü ru.

¹³Thi Elijah nüh jüma künara ünü ma thsü nüh ma nyieh küzhutetaji wa nü alopiewa lehpie vü tsie. Thi halie, ma vü ajikhi küsüru taji, “Noh tü hala mowa saveh lo, Elijah,” ti küna.

¹⁴Ma nüh, “Hi tü VÜWA, kükhratsara Saküüwuowa kenüh nokürüpamthuoh; küpakenühnyunü Israel nyiri tü noh kütsathuozhüwa kulekümthuoh kenüh, noh kükhurüperi zoriejamthuoh, thi anyuchuwa vi nü noh setsaküthsüri rehthe khehmthuoh, thi hi tü, hi mpa tsatsa kükhe saveh; thi mari tü eh kürholi vi nta phahveh,” ti küza.

¹⁵Thinü VÜWA nüh ma vü, “Waluo, noh lehkhuji Damaska reza vü sheletewaluo; thi noh nüh wajura thuoüji Siria nyiehvü kajiwa sana küsa kenüh noh tü Hazael thsetsü naveh;

¹⁶thi Nimshi atsa Jehu thuoüji Israelra nyiehvü kajiwa küsana küsakenüh noh tü ma thsetsü naveh; thi Shafat Abel-meholawa tsa thuoüji noh zhie vü setsaküthsüwa küsana küsa kenüh thsetsünaveh.

¹⁷Thi thawa nüh Hazael nyuchuwa vünüh mürie naveh ünüh Jehu nüh rehthe naveh. Thi Jehu anyuchuwa vünüh mürietewa naveh ünüh Elishah nüh rehthe naveh.

¹⁸Jütawie ketünga Israel vü hi nüh anyie türü Baal vü mükükhotsü aveh thi apo nüh ma müküüme aveh jasanaveh,” ti küza.

¹⁹Jükenüh ma tü jüla nüh porietewa nü Shafat atsa Elishah ngura, matü shüvotsa khuonyih küvü türakünyi atüvü tse, thi ma tü türakünyiawa vü nyi kütse sa. Elijah tü ma vü tsekewa nü ma thsüwa ma vü vehjake.

²⁰Thi ma tü shüvotsari jam nü Elijah asenyitewa taji, “Hi tü eh pa thi eh zah ra küüme luo, jüchih ünüh noh senyi naveh ünüh,” ti khuo. Thinü ma nüh, “Shele tewaluo; küpakenühnyunü hi nüh noh vü mowa sa lo?” ti küza.

²¹Thi ma tü ma sekünyi vünüh sheleteru nü shüvotsa khuonyih virunü jümari fethe taji jümari asa akhuonyih shunyie nü anyiri tsütaji kütsa. Jüti sanü ma tü sühra nü Elijah ase nyitewa taji mavü kürohtsü.