Read Pochuri Naga 1 KAJIRI 2 Bible Online

1 KAJIRI 2 - Pochuri Naga bible

1 KAJIRI 2

¹David tü küsüleh tsotho shehnyi teküru vü ma nüh ma tsa Solomon ji nü ma vü azhühzho tsü taji,

²hi nü azhih aveh lehkhuji kümjie vünüh tewa na savehthuoh. Müzho luo, thi noh tü anyi küsü ti küsa vünüh kütsaluo,

³thi VÜWA noh Saküüwuowa azhühzho müzhe luo, ma lehkhujiri vü tsethi ma rülehri, ma nüh azhükütsüri, ma wulehzhüri thi mapohvüri Mosa khonyo vü rhüküsa kümjie müzhe luo, jüta küsavünüh noh nüh küsa aveh vü thi noh nüh kürekeküwa aveh vü kütsarhie sara naveh ünüh;

⁴Jüti sanü VÜWA nüh eh kenüh azhü küza küsari vizhu naveh, ma nüh, ‘Mükütüküzü noh tsari nüh mari lehkhuji vü azhüzhü, eh tüvü mari luoveh vi thi mari kürholi vi nü zhütsa nyitsanü tsethuoüji Israelri kajipe vü nyi küsü nga nüh noh küüsazihwa nyu,’ ti küza.

⁵Jüma nyiehvü nga Zeruia tsa Joab nüh hi vü mowa sanüh ma nüh mokümjie vünüh Israelri thopahiri khazhu küngu Ner atsa Abner thi Jether atsa Amasa masü vü sanüh noh nga thsüveh, ma nüh masü zothem, amüthoh sanü kürükümhie zühwa arie vünüh küthüm; thi mükükhieh azüh vi nü eh küshih vü tseketü thi eh jihküükruvüh rügivü thsemtü.

⁶Jükenüh noh kümahtsa kümjie vünüh saluo, thitü ma lüküpru tü luoveh rüzih nü aküsüzhie vü mükütsuo tüm.

⁷Barzilai Gileadwa tsari vü küzhütsanyitsa ti saluo, thi mari tü noh shiekütsape vünüh kütsari azavü nyiküüpeh luo; küpakenühnyunü hi nüh noh jie Absalom vünüh zhüteküwa vü mari tü küzhütsa nyitsa jüma vi nü hi kümtu kenüh.

⁸Thi Gera atsa Shimei, Bahurim Benjamin kuohwa nga noh sietse, hi nüh Mahanaim vü küwa vü ma nüh kümzü kükha vi hi müzü; thitü ma nüh hi mütu nta Jordan vü kütu vü, hi nüh VÜWA vünüh küshietaji, Hi tü anyuchuwa vünüh noh küüsüwa nyu, ti küza.

⁹Jükenüh noh tü ma müküleh münyie ti vünüh müsa tüm, küpakenühnyunü noh tü zanyokümshethsü nyi küsü küsa kenüh; noh tü ma vü mowa küsaleh ünüh noh nüh thsü naveh, thi noh nüh ma shehküpru azüh sanyie nü Küsürazhie vü turu naveh, ti küza.

¹⁰Jüti küsa vü David tü ma pari sie zehtewa nü David nyujiwa vü chohwum.

¹¹Thi David nüh Israelri nyiehvü kükaji mahvi zührake; Hebron vü mahvi türü kaji, thi Jerusalem vü mahvi chehrake nü küchekükaji sa.

¹²Jükenüh Solomon tü ma pa David kajipe rügi vü shupehtewa; thi ma kajipewa tü sakümzho shehtewa.

¹³Jüti küsa vü Hagit atsa Adonijah tü Solomon azah Bathsheba vü ru. Thinü nyimzawa nüh, “Noh tü mhie nü tseveh tünüh?” ti küna. Ma nüh, “Mhie nü tseveh,” ti rületsü.

¹⁴Jüti küsa vü ma nüh, “Hi tü noh vü zanyo wuori küüza pehvehlie,” ti küza. Thinü nyimzawa nüh, “Küzaluo,” ti küza.

¹⁵Ma nüh, “Noh nüh küthsü üta kajipewa tü eh zhi, thi Israel aveh nga hi nüh kaji nata küluohzhewa peh ju, jütawie ketünga khaphrüle nü eh nü azhi samthuoh, küpakenühnyunü VÜWA nüh jüma tü ma zhi küüsamthuoh kenüh.

¹⁶Thi khinyi thuoüji hi tü noh vü kükhuo küsü pehveh; tinü hi kükule müsa tümluo,” ti küza. Thinü nyimzawa nüh, “Küzaluo,” ti küza.

¹⁷Jüti küüza vü ma nüh, “Hi nüh khuoveh, tinü kajiwa Solomon vü küna nü ma tü hi müküükule tümluo, jüma thuoüji Abishag Shunamvühwa hi tsü nü eh vüvüh küsana küsa müma tümluo,” ti küza.

¹⁸Bathsheba nüh, “Mhie sheh; hi nüh noh kenüh kajiwa vü küza naveh ünü,” ti küza.

¹⁹Jükenüh Bathsheba tü Adonijah müthoh vünüh kajiwa Solomon siejühle nti ma vü wa. Thi kajiwa tü nyimzawa siemtu nti sühranü ma vü küngietsuo; jüti sanü ma tü ma kajipe rügi vü shupeh, thi ape küsü kajiwa azah kenüh viru nü nyimzawa tü mazhie wuovü shupeh.

²⁰Nyimzawa nüh, “Hi tü noh vü khuo na küsa küsü pehveh; tinü hi kükule müsa tümluo,” ti küza. Kajiwa nüh nyimzawa vü, “Khuo luo, eh zah; küpakenühnyunü hi tü noh kükulewa nyu,” ti küza.

²¹Nyimzawa nüh, “Abishag Shunamvühwa tü vi nü noh jie Adonijah vüvüh küsaluo,” ti küza.

²²Kajiwa Solomon nüh ma zah vü, “Thi noh tü mokenüh Adonijah kenüh Abishag Shunamvühwa künaveh lo? Ma kenüh kajipe nga künaluo; küpakenühnyunü ma tü eh jie küsa kenüh, thi ma nato wuovü thuoüji Abiathar navüwa thi Zeruia atsa Joab tü ma natovü pehveh,” ti rületsü.

²³Thinü kajiwa Solomon tü VÜWA vünüh küshie taji, “Saküüwuowa nüh jüti hi vü küsawa saluo, thi jüma nyiehvü nga mükütüküzü azhü hama tü Adonijah kürho kenüh ame küpeh müsa thuoüji!

²⁴Jükenüh VÜWA rhoküveh üta, ma tü hi vizhutsü thi hi vi eh pa David kajipe rügivü sa, thi ma nüh azheh sa hi tsü, ma nüh küphrahzhu üta nosü Adonijah tü küüsüm nathuoh,” ti küza.

²⁵Jükenüh kajiwa Solomon nüh Jehoiada atsa Benaia tü küzem nü ma nüh ma feküzeh taji ma tü süm:

²⁶Thi Abiathar navüwa vü thuoüji kajiwa nüh, “Anathoth, noh zhezhuh vü tewaluo; küpakenühnyunü noh tü aküsü khuoküvehkenüh. Thitü hi nüh tsotho hama kenüh nü noh küüsüwa nyu, küpakenühnyunü noh tü eh pa David tüvü VÜWA Saküüwuowa kütsathuozhü küthseku kükha kenüh, thi noh nüh eh pa kümnomna aveh sieküüsuo kenüh,” ti küza.

²⁷Jükenüh Solomon nüh Abiathar tü VÜWA vü navü küsa jamtü, hakümjie vünüh VÜWA nüh Shilo vünüh Eli zhehlori kenüh küüzawa sajura.

²⁸Azhühlewa tü Joab vü ru ünü, küpakenühnyunü ma mpa nüh Joab tü Absalom apo müvi ketünga ma tü Adonijah apo vi, Joab tü VÜWAjuhthsüzheh vü zhüwa nü kükhurüpe rütsüwa küthuophohke.

²⁹Jüma vi nü kajiwa Solomon vü küza ünü, “Joab thuoüji VÜWAjuhthsüzheh vü zhütewathuoh, thi halie, ma nü kükhurüpewa nato vü pehvehthuoh,” ta küza. Solomon nüh Jehoiada atsa Benaia küze taji, “Wa nü ma fethejam luo,” ti küza.

³⁰Jükenüh Benaia tü VÜWA juhthsüzheh vü ru nü ma vü, “Kajiwa nüh alievü ra üta azhütsüveh lie,” ti küza. Thitü ma nüh, “Nyu, hi nü hala nüh sü naveh,” ti rületsü. Thinü Benaia tü kajiwa vü azhü viru le taji, “Joab nüh hakümjie küzaveh, tima vü rületsü,” ti küza.

³¹Kajiwa nüh ma vü, “Ma nüh küüza üti satsüluo,” ma fethem nü ma chohwum luo; thi Joab nüh mazhühnyo mükünyie vünüh azühküüthü mükülehwa hi vünüh thi eh pa zheh vünüh vijam luo.

³²Ma nüh azüh küüthü küüroh küsa VÜWA nüh ma lü rügivü virunaveh, küpakenühnyunü eh pa David müküthsü nüh ma nüh nyikünyi ma nyiehvü nüh künyitsa thi kümhie: Ner atsa Abner Israelri rienyi sierhüwa thi Jether atsa Amasa Judah rienyiri sierhüwa ti prü taji anyuchuwa nüh rehtheküm kenüh.

³³Jükenüh mari züh tü Joab lü rügivü thi ma küthsoküzhiri lü rügivü küsuokürho teru le naveh; thitü David vü, maküthsoküzhiri vü, ma zhehlori vü thi ma kajipe vü thuoüji VÜWAvünüh küsuokürhowie nga luoveh kürüzih peh naveh, ti küza.

³⁴Jüti küsa vü Jehoiada atsa Benaia tü khru nü ma feküzeh taji zothem; thi reza vü ma mpa ma zheh vünüh chohwum.

³⁵Kajiwa nüh Jehoiada atsa Benaia tü Joab müthoh vünüh thopahiri nyiehvü thsemtü, thi kajiwa nüh Abiathar müthoh vünüh Zadok navüwa thsemtü.

³⁶Thinü kajiwa nüh wuori küze nü Shimei küji taji ma vü, “Noh mpa nüh azheh küsü Jerusalem vü sanü jüla kürho saluo, thi jüla nüh azhie küsüküsü vü nga müwa tümluo.

³⁷Küpakenühnyunü noh tsezhuküwa rülo vünüh, thi Kidron kuzakariküwa vünüh noh tü sü wie nati küsa thsütoh luo; noh züh tü noh mpa noh lü rügivü ka naveh ünüh,” ti küza.

³⁸Jüti küüza vü Shimei nüh kajiwa vü, “Noh nüh mowa küzavehünüh mhieveh; eh vüwa kajiwa nüh küüza üta noh siepewa tü jüta sanaveh,” ti küza. Jükenüh Shimei tü rülo hozake Jerusalem vü kürho satewa.

³⁹Thitü mahvi küche sehkhe vü Shimei siepe künyi tü Maka atsa Akhish Gat kajiwa vü zhütewa. Thi jüma vi Shimei vü küzataji, “Halie, noh siepe künyi tü Gat vü pehveh ünüh,” ti küza.

⁴⁰Shimei tü sühra nü rawuh küsü küche taji ma siepe künyi phahnti Gat vü Akhish vü wa; thi Shimei tü wa nü Gat vünüh masiepe künyi sieru.

⁴¹Thi Shimei tü Jerusalem vünüh Gat vü wa nü sheleruthuoh ta küsa Solomon vü küüza vü,

⁴²kajiwa nüh wuori küze nü Shimei jiküüru taji ma vü, hi nühVÜWA vünüh noh vü küshie nü azhüküzhü vünüh küzaküükheke taji, ‘Noh tsezhu nü azhie khiekhievü wa naveh ünüh jüma rülo vünüh noh tü sü naveh ti küsa thsütoh luo ti müküzaülo?’ ti küza. Thi noh nüh hi vü, “Noh nüh mowa küzaveh ünüh mhiem; hi nüh küna naveh, ta küza.

⁴³Thinü noh tü mokenüh VÜWA vü küüshiekütsüwa thi hi nüh nohvü azhühkho azhükütsü mümzhe nüh sam lo?” ti küza.

⁴⁴Kajiwa nüh Shimei vü shele, “Noh nüh eh pa David vü kümsü küsa aveh noh luoveh lovü nüh thsü; jükenüh VÜWA nüh noh kümsüwa noh lü rügivü visheleru naveh.

⁴⁵Thitü kajiwa Solomon thuoüji tsiatsü naveh, thi David kajipewathuoüji VÜWA tüvü küsuokürho vizhu naveh,” ti küza.

⁴⁶Jüti küsa vü kajiwa nüh Jehoiada atsa Benaia vü azhütsü nü ma nüh tsezhu wa nü ma feküze taji ma tü süm. Jüti sanü kajipewatü Solomon ke vünüh küvizhu sa.