Read Pochuri Naga 1 KAJIRI 4 Bible Online

1 KAJIRI 4 - Pochuri Naga bible

1 KAJIRI 4

¹Kajiwa Solomon tü Israelri aveh nyiehvü kaji sa,

²thi hamari tü ma nyi küji kümsieri: Zadok atsa Azaria tü navüwa;

³Shisha atsa Elihoref thi Ahija masü tü akürhüwa sa; Ahilud atsa Jehoshafat nüh aküzhüwa sa;

⁴Jehoida atsa Benaia nüh thopahiri vü sierhüwa sa; Zadok thi Abiathar masü nüh lehvü sa;

⁵Nathan atsa Azaria nüh aküjiri vü anyiehwa, Nathan atsa Zabud nüh navü thi kajiwa füwa;

⁶Ahishar nüh kajira zheh vü ashi küsawa; Abda atsa Adoniram nüh akhrükükhrüwa sa.

⁷Solomon tü Israelri aveh nyiehvü küjiri türakünyi peh, mari nüh kajiwa kenüh nga thi ma zhehlori kenüh nga totsü; nyi küsünüh mahvi küsü vü asa küsü kenüh tokütsü sanaveh.

⁸Hamari tü mari anyori: Efraim küzhiho anyu vünüh Benhur;

⁹Bendeker, Makaz vü, Shalbim, Betshemesh, thi Elonbet-hanan;

¹⁰Ben-hesed, Arubot vünüh (Soko thi Hefer azhih aveh ma vü);

¹¹Ben-abinadab, Nafat-dor (ma tü Solomon tsavühwa Tafat vi ma vüvüh sa);

¹²Ahilud atsa Bana, Tanak vü Megiddo, thi jüma tü Jezreel kükhu Zarethan nato vü Bet-shean aveh, thi Bet-shean vünüh Abel-mehola küju, jüla nüh Jokmeam küpa wuovü küju.

¹³Ben-geber, Ramot-gilead vü (ma tü Manase atsa Jair anyuri peh, jümari tü Gilead vü peh, thi ma tü Argob asuo peh, jüma tü Bashan vü pehveh, anyuji rorake shiehku külojuke thi sahwuo nüh kürühperi peh);

¹⁴Mahanaim vü Iddo atsa Ahinadab;

¹⁵Naftali vü Ahimaz (ma tü Solomon tsavühwa Basemat vi ma vüvühsa);

¹⁶Asher thi Bealot vü Hushai atsa Bana;

¹⁷Issachar vü Parua atsa Jehishafat;

¹⁸Benjamin vü Ela atsa Shimei;

¹⁹Gilead zhih vü, Amorri kajiwa Sihon thi Bashan kajiwa Og anyu ti. Thi Judah azhih vü aküjiri küsü peh.

²⁰Judah thi Israel masü tü juhküji vü ashünyi zake; mari tü tsa thi zhu nü mari tü lozhe.

²¹Solomon tü Eufrates vünüh Filistin azhih küju thi Egypt arühküju kajipe aveh vü takrü sa; mari tü Solomon kürho ajü ale khrü viru nü ma kütsü sa.

²²Solomon nüh rülo küsü vü kütsaküzhu tokütsü thuoüji ahie tohküümnya kete anyie münga thi ashie kete anyie türake,

²³shüvotsa küülie türake, anyihnyih are kümrhuo mükeke, nyihzhü müzake, jüma nyiehvü nüh asühvori, anguzuori, amüsüri thi ut asaküpe ti tsü.

²⁴Küpakenühnyunü ma nüh Eufrates zhiehtu asuo Tifsa vünüh Gaza küju aveh kete, Eufrates zhiehtu kajiri aveh nyiehvü; thi makümkieshe nato aveh ma tü kürükümhie peh.

²⁵Judah thi Israel tü Dan vünüh Beersheba küju, anyiri aveh nga ma mpa ma rhelivirhu thi ajichuorhu kükhu vünüh Solomon tsotho aveh küüjakünya münyie wiethuoh nüh rho.

²⁶Solomon tü rawuhzheh anyie zürake ma rawuhkheka kenüh thi rawuhnyiri anyie türakünyi peh.

²⁷Thi aküji jümari nüh kajiwa Solomon kenüh thi kajiwa Solomon kütsape vü küruri aveh kenüh asa kürüzhu kütsaküzhu küchetsü nü zanyo küsü nga mari tü küpheküm müsa.

²⁸Khuozhikürümie nga thi rawuhri kenüh makuoh thi akhuo rawuhri kenüh nga ti khiela müvi üji mümhie nüh saveh ünüh mari nüh viru kheh, papa suohpe ngu kheh.

²⁹Thi Saküüwuowa nüh Solomon vü kümahtsa, küthsüra müküüterhüra thi müshe kümza juhküji vü shünyi kümjie tsü,

³⁰jüta küsa vünüh zhiehshu wuovü nyiri aveh kümahtsa thi Egypt vü kümahtsa aveh nga Solomon kümahtsa mpha nüh sam.

³¹ Küpakenühnyunü ma tü anyi küpari aveh nyiehvü nüh kümahtsa kenüh, Ethan Ezrawa, thi Heman, Kalkol, thi Darda, Mahol tsari nyieh vünüh mahtsa; thi ma küthohla tü akuoküjiri poteposhu aveh vüpeh.

³²Ma tü küthsüzhü anyie küche rhü; thi ma zah tü anyie küsü nütünyieke.

³³Ma nüh athsoh zhühku, Lebanon vü amüse vünüh ashiehku vü ahesa küsho küju küza, ma nüh asari, amüwari, müresihpori thi anga zhüku phrahte.

³⁴Thi thari nüh ma kümahtsa künara nüh Solomon kümahtsa küna nti anyiri aveh vünüh thi azhih vü kajiri aveh vünüh ru kheh.