Read Pochuri Naga 1 KAJIRI 6 Bible Online

1 KAJIRI 6 - Pochuri Naga bible

1 KAJIRI 6

¹Israel nyiri Egypt vünüh shuteküru mahvi müza müzü nü zerakewa, Solomon nüh Israelri nyiehvü kükaji mahvi müzüawa, Ziv asa, Ebriri asa küchie akünyiawa vü ma tü VÜWA zhehwa küsa sate.

²Kajiwa Solomon azhehwa küsa ma chu apie rorake, ma kümzaapie mükeke thi kümsie apie chehrake.

³Awiepa tü azhehwa alovü rike vünüh aküsuo apie mükeke, azhehwakümza rike vünüh thi azhehwa tüvü ma küsheh apie türake ti vünüh sanaveh.

⁴Thi ma nüh azhehwa kenüh mürhülehpie sakümnyie nü shote.

⁵Ma nüh aziewa müzhe taji azhehwa sanü azie samkiele müzari ape thi kümtse zheh alowa masü khürü sa; thi ma nüh anato awiepa samkiele.

⁶Kürieke küsajitsawa thuoüji apie münga müza, azhilawa thuoüji apie türo müza, thi kücheawa thuoüji apie türü müza; küpakenühnyunü azheh alievü kümkielewa ma nüh küjiekeluowa sanü alühtowa kütsüluowa tü azhehwa azieri vü mükütohke nüh sana küsa kenüh.

⁷Azhehwa küsa tü aloh küjipe vünüh aloh kücheküsawa vünüh vinü sa; jükenüh atsüvü, amüvü nyutü amürü tsokrü jikhi küsü nga saküveh vü mükünakera.

⁸Kürieke sajitsawa kütupe thuoüji azhehwa zhiese nato wuovü nüh küpie; jüti sanü küsü thuoüji arügivü kürieke azhilawa vüwa, thi kürieke azhilawa vünüh kücheawa vü wa.

⁹Jüti vünüh ma tü azhehwa sanü jura; thi ma nüh alühtori akuruo thi amüse wieh nüh sa.

¹⁰Ma nüh küshothuowa tü azheh ajüvü sa, kürieke küsü künga apie münga müsie, thi jüma tü amüse zhehthso vi nü azhehwa vü wa müshurüke.

¹¹Jüti küsa vü VÜWA zhü tü Solomon vü ru taji,

¹²“Noh nüh azheh hama saküvehwa kenüh thuoüji, mükütüküzü noh nüh eh azhühkheri vünüh tse thi eh azhühkhori küna thi ehzhükütsüri müzhe thi jümari vünüh tse thuoüji hi nüh noh pa David vü küüza eh zhüwa noh sie nü vizhu naveh.

¹³Thi hi nüh Israel tsari azavü nyi peh naveh, thi eh nyi Israelri küjawa nyu,” ti küza.

¹⁴Jüti sanü Solomon tü azhehwa sanü jüma jura.

¹⁵Ma nüh amüse azie wiehri vi nü azheh alovü rikheh; azhehküjükewa vünüh alühto amüruoh akuruowa küju, ma nüh alovü rügi vünüh athsoh vi satem, thi azheh küjükewa aküla azie awiehvi nü sotem.

¹⁶Ma nüh küjükewa vünüh akuruowa küju atüku vü amüse aziewieh apie mükeke nüh vi sa, thi ma nüh hamatü kümtsetsawa azhie kümjie vünüh kümtsezheh alowa vünüh sa.

¹⁷Azhehwa, jüma tü, kümtsezheh alowa tüvü müzari apewa tü aküsuo apie zührake.

¹⁸Azheh alovü müsethsohwa tü khurünyi atso thi aküwu kükarievünüh tüke; jümari aveh tü amüse mpa küchie nüh aloh küsü nga müngu.

¹⁹Kümtse zheh alowa vü ma nüh azheh alotsawa küüche tü VÜWAkütsathuozhü küthseku sana küsa kenüh sa.

²⁰Kümtsezheh alowa tü apie mükeke suo, apie mükeke müza thi apie mükeke müsie; thi ma nüh suna alatha nüh jüma küzhute. Ma nüh amüse nüh kükhurüpe nga küsü sa.

²¹Thi Solomon nüh azhehwa alovü suna alatha nüh küzhute, thi kümtsezheh alowa tüvü ma nüh suna rheke nü suna vi taji küzhute.

²²Azhehwa müjie küsakheh küju nü ma nüh azheh ajü suna nüh küzhute. Jüsevü nga kümtsezheh alovü kütü kükhurüpewa nga suna vi nü küzhute.

²³Kümtsezheh alowa vü ma nüh Olivethsoh vi nü aküsaküpesa künyisa, masü khürünga kümsie apie türara.

²⁴Aküsa küsü aküsuo apie münga thi aküsa küpa wuovü aküsuo apie münga ti; aküsa küsüwa thsopo vünüh aküsa küpawathsopo küju apie türake.

²⁵Aküsaküpesa küpawa nga küüte apie türake; aküsaküpesa künyi khürünga küüte zarike thi atso nga zarike.

²⁶Aküsaküpesa küsüwa kümsie tü apie türake, thi küpawa nga jükümjie.

²⁷Ma nüh aküsaküpesa künyi tü vi nü azhehwa alotsawa vü sa; aküsaküpesa künyia küsaritü kütawa azie küsüwa vü washike, thi küsüwa küsa tü wa azie küpawa shike; masü aküsaküpawa tü azhehwa zhila vünüh küsü nüh küsü shikeluo.

²⁸Thi ma nüh aküsaküpesa künyi tü suna vi küzhute.

²⁹Ma nüh azheh azie aveh vü alovü nga thi alievü nga aküsaküpesa, aluophi rhu thi aküwu kükarie tüke kheh.

³⁰Azhehwa küjüke alovü nga thi alievü nga küshothuo aveh ma nüh suna vi nü küzhute kheh.

³¹Kümtsezheh alovü kütu mükhieri tü Olivethsoh vi nü sa; awuzie thi amükhietohvüh künyi tü azhepokütsu atso vünüh sa.

³²Ma nüh amükhie Olive rhu nüh küsa künyi tü aküsaküpesa, aluophi rhu thi küwu kükarie tüke nü suna vi jümari küzhute; thi aküsaküpesa thi aluophi rhuri rügivü sunazhuhke.

³³Jükümjie vünüh ma nüh Olive rhu nüh müzari ape lehpie mükhiejüke müzü küpe vünüh sa,

³⁴thi aküla nüh amükhie künyi sa; amükhie küsüwa awa künyi tü jehkhrie, thi amükhie küpawa awa künyi nga jehkhrie.

³⁵Jümari rügivü ma nüh küsaküpe sa, aluophi rhuri thi aküwu kükari tüke; thi ma nüh suna vi nü jümari küzhute nü tükeküsa küüroh rügivü suna vi nü thse.

³⁶Ma nüh azhehlowa tü aloh küji küri küche thi amüse küriküsü ti vünüh sa.

³⁷Mahvi müzüawa Ziv asawa vü VÜWA zhehwa ajupe lojuke.

³⁸Thi mahvi türa küsüwa Bul asa vü, jüma tü asa tüzeawa vü azhehwatü arüleh aveh sa kheh nü khemta müzhe taji sajura. Ma tü jüma küsa mahvi türü vitewa.