Read Pochuri Naga 1 KAJIRI 7 Bible Online

1 KAJIRI 7 - Pochuri Naga bible

1 KAJIRI 7

¹Solomon tü ma mpa ma zheh mahvi türaküche sanü ma zheh aveh sajura.

²Ma nüh Lebanon Aküze Zheh sa; ma chu thuoüji apie müzake, thi ma veh thuoüji apie tünyieke thi ma kümsie nü apie cherake, thi jüma tü amüse tovüh küri küche vü atovühri rügivü amüse lühto rügivü sake.

³Thi jüma tü tovüh zürake nü münga rügivü küpeh küshothuoritü müsethsoh nüh küzhute, küri küsü vü türamnganga.

⁴Jüvü küri kücheri vü mürhülehpie kükhete peh, thi küriekekücheri vü mürhülehpie küwiejieluo.

⁵Amükhie thi mürhülehpie aveh awieh jüke müzü nüh sa, thi kürieke küche vü mürhülehpie küwiejieluo.

⁶Thi ma nüh Tovüh Küshothuo aküji wa sa; ma küsuo thuoüji apie tünyieke ma veh nü apie cherake; atüvü awiepa tovühküshieke peh, thi jümari tüvü athsü nüh sakhete.

⁷Thi ma nüh kajipe Küshothuo aküji ashihzhü küphrahzhupe sa, jüma tü ashih kenüh Küshothuo aküjiwa; thi jüma tü amüse nüh küjüke vünüh akuruo küju saküjura.

⁸Mampa ma zheh ma nüh rho na küsawa vü Küshothuo aküjiwa asevü küshothuoku küpawa tü küüroh küpari kümjie vünüh sa. Solomon tü ma nüh Faroah tsavüh küzawa kenüh azheh Küshothuo aküji hakümjie küsa küsü sa.

⁹Hamari aveh tü amekükhra lohri vi taji sa, küte nü küji, athsohkürhovüh nüh kürho, asevü nga thi atüvü nga, ajupe vünüh ajuhzhie küju thi alievü küshothuoku VÜWA zhehwa vünüh küshothuoku küjiwa küju.

¹⁰Ajupe lohri tü amekükhra mpa, aloh kükajüri, aloh apie tüze thi apie türake.

¹¹Thi ma lüvü amekükhra lohri, küüte vünüh küji thi amüse.

¹²Küshothuoku kükajüwa tü aloh ji nü küüroh küüzüle zhühnyo küche, thi amüse arüvüh küüroh küsü; jükümjie vünühVÜWA zheh alowa thi azhehwa tela pehra.

¹³Jüti küsa vü kajiwa Solomon nüh wuori küze nü Tair vünüh Hiram sieru.

¹⁴Ma tü tünyivüh küsü Naftali akuohwa tsa, ma pa thuoüji Tair nyi küsü, sahwuo vü küürohri küsü; thi ma tü sahwuo küürohküsa kenüh kümahtsa, zanyoküthsüra thi kümahtsa peh. Ma tü kajiwa Solomon vü ru nü ma küüroh aveh satsü kheh.

¹⁵Ma nüh sahwuo lokhuo tovüh künyi khake. Atovüh küsü kümsie apie türatüze, thi ma kürülo küüte apie türakünyi; jüma tü awu pie, thi ma küsa thuoüji tühjü müzü; tovüh akünyiawa nga jükümjie wie.

¹⁶Tovüh künyi rügivü thse na küsa kenüh ma nüh sahwuo tovühkünyi lü; masükhürü nga kümsie thuoüji apie münganga.

¹⁷Atovüh künyi khürü kenüh alü rügivü akieveh külahrü nüh akhra atso küpapa nüh küne;

¹⁸jükümjie vünüh ma nüh akatoh küri künyi kütorü nyiehvü tovüh rügivü saküsa alüwa küüzhute kenüh sa; thi tovühküpawa vü nga jüti sa.

¹⁹Atela tovüh rügivü alü pehküveh künyi vü asanü küwu sathse, thi ma kümsie thuoüji apie müzü.

²⁰Atovüh künyi rügivü sahwuo tovüh künyi müshuke thi kütorükütuoh vü kürülo küshu sake; jümawa vü küri künyi saküzülenü akatoh müza künyi küpe; jükümjie tovüh küsüwa lü rügivü nga sake.

²¹Ma nüh tovühri tü kükhurüpe tela vü shie; tovüh küsüzhieseh wuovü shie nü ma nyo Jakhim, mazhünyo VÜWA nüh küvizhuti ji; thi küsüwa nü zhiehtü wuovü shie taji ma nyo Boaz ti ji.

²²Thi tovüh künyi rügivü sanü küüroh sake. Jükümjie vünüh atovühri küüroh tü jura.

²³Jüsevü ma nüh akülü juhküji sa; jüma tü kürülo, ma thsopo vünüh athsopo küju apie türake, apie münga müsie, thi mathsopo kürülo küüte apie cherake.

²⁴Ma po kükhuvü thuoüji apie chehrake khurünyi rheke nü juhküjiwa mükieshe; aleh huori tü küri künyi sa, jüma kükha vü jüma nga khake.

²⁵Jümatü shüvotsa türakünyi rügivü tsie, küche zhiehtü vü küprüke, küche zhiehtu vü küprüke, küche zhieseh vü küprüke, thi küche nüh zhiehshu vü küprüke; juhküjiwa tü mari nyiehvü sake, thi mari sehru aveh thuoüji alovü thse kheh.

²⁶Ma küsa thuoüji amüzarike; ma thsopo nü ahu thsopo sanü küwu kümjie vünüh sa; jüma tü ajuhküüzüra anyie künyi tü.

²⁷Ma nüh akhekhe türake nga sa; küsü vü ma küsuo apie müzü, apie müzü müza, thi apie küche müsie.

²⁸Kütokeperi küsa hakümjie: Jümari tü aziewa küzhute, thi azie wiehri tü küüzhute vü sake,

²⁹thi kütokeperi küüzhute vü sake küsari vü amiewuori, shüvotsari thi aküsaküpesa sakekheh. Küüzhuwa rügivü amiewuori thi shüvotsari alü wuovü thi asaji wuovü kümtsa külahrü küürohpe.

³⁰Jüma nyiehvü nga kütokepe küsü vü sahwuo satührü thi sahwuokükhahri pe; thi juhküüzüku jühke müzü kenüh shokete. Küshoketeri tü khake nü nato aveh vü lahrüke.

³¹Kajilüwe azhievü apoküüpie arügi wuovü apie küsü; mapoküüpiewa tü rühlo, phieküürühlo kümjie, apie küsü nü küzhila sheh. Ma poküüpie vü tükekheh; thi ma kütokeperi tü mürülo nüh jükeh müzü pe.

³²Thi satürü müzüri tü kütokeperi kükhu vü peh; satührükükhari tü küsü mpa thi kütsiepe masü küsü sa; satürü küsükümsie thuoüji apie küsü nü küzhila.

³³Satürüri tü rawuhkheka satürü kümjie; jümari kükhah, mari thsopori, mari kükateri, satührü zhila vü küpehri aveh nga lü kheh.

³⁴Kütsiepe aveh jükeh müzü vü küshokete müzü peh; küshoketeritü kütsieperi sie nü küsü sa.

³⁵Thi kütsiepe alü rügivü küri küüzüle apie küzhila müsie; thi kütsiepe alü vü ma küpehpe thi ma kütokeperi aveh küsü sa.

³⁶Thi toke küsa ma küpehpe thi ma kütokeperi vü ma nüh aküsaküpesa, amiewuori, thi aluophiri mari kükiehtuo müzhenü tüke taji lahrü mükiele.

³⁷Hama sevü ma nüh kütsiepe türake sa; mari aveh nga küüte thi tsoküsü vünüh khake.

³⁸ Thi ma nüh sahwuo nüh juhküüzüku türake sa; küsü vü küüzükuzührake peh, thi küsü vü küüte apie müzü, kütsiepe türake aveh vü juhküüzüku peh.

³⁹Thi ma nüh kütsieperi münga azhehwa zhieseh vü, münga azhehwazhiehtü vü ti sake; thi ma nüh juhküjiwa tü azhehwa zhiesehzhieshu wuovü sake.

⁴⁰Hiram nüh aküfüri, küüzhievühri, thi ketsokuri nga sa. Jüti sanü Hiram tü kajiwa Solomon vü VÜWA zhehwa kenüh küüroh aveh sajukheh.

⁴¹Alokhuo künyi, tovüh rügivü alüwa füji künyi, hiete nta kütorü küüroh saküsa;

⁴²thi kütorü küüroh künyi kenüh katoh müza müzü, kütorüluoküsü vü katoh küri künyi, tovüh künyi rügivü küpeh alüri füji küzhute na küsa kenüh;

⁴³Kütsieperi türake, thi juhküüzüku türakeri tü kütsiepe rügivü;

⁴⁴thi juhküji küsü, juhküjiwa kükhu vü shüvotsa türakünyi.

⁴⁵Aküfüri, küüzhievühri, ketsokuri, VÜWA zheh vü küfüküjuh Hiram nüh kajiwa Solomon kenüh sakütsüri aveh sahwuo shoküüzih nüh sa.

⁴⁶Jordan kütake vü Sukkoth thi Zarethem azhievü anyisa zhih vü kajiwa nüh jümari sam.

⁴⁷Thi Solomon tü küfüküjuh aveh mükütothuoh nüh sam, küpakenühnyunü jümari tü küzhile kenüh sahwuo küüzho tümphahzhu ra nüh sam.

⁴⁸Jüti sanü VÜWA zheh vü küpeh küfüküjuh aveh tü Solomon nüh sa kheh: Suna kükhurüpe wa küütsa lohse küsape suna nüh küsawa,

⁴⁹ latiperi suna alatha nüh küsa, münga thuoüji zhieseh wuovü thi münga nü zhiehtü wuovü, kümtsezheh alowa tüvü; aküwuri, alatiri, thi amizhiri, suna nüh küsa;

⁵⁰ahuori, kümjievühnyuri, ketsokuri, rheküngu kütsokuri, anyihtahthsüri, thi khonyoküpie suna nüh küsari, azheh alotsawa mükhieri kenüh, kümtse tsa azhiewa, thi kükhurüzheh müzari küpehpe mükhiewa kenüh.

⁵¹Jükümjie vünüh VÜWA zheh kajiwa Solomon nüh küüroh küsa aveh tü mülahra. Thi Solomon tü ma pa David nüh saküümtse zanyori aveh rakasa, suna, thi küfüküjuri aveh alovü vituru kheh nü VÜWA zhehkünyirhie küsathe pe lovü sakheh.