Read Pochuri Naga 1 KAJIRI 9 Bible Online

1 KAJIRI 9 - Pochuri Naga bible

1 KAJIRI 9

¹Solomon nüh VÜWA zheh, kajiwa zheh thi Solomon nüh azhehküsangü aveh jum ünü,

²Gibeon vünüh ma vü küüngu üta VÜWA nüh Solomon vü akünyiawa küngu.

³Thi VÜWA nüh ma vü, “Noh nüh eh tüvü kükhuo küsa thi küzhiekezhiekhri hi nüh künarathuoh; noh nüh azheh saküsa hama hi nüh sakümtsemthuoh, thi hi nüh eh nyo küsuokürho jüla samthuoh; eh notha thi eh luoveh tü tsotho aveh jüla peh nathuoh.

⁴Noh thuoüji, mükütüküzü noh nüh noh pa David kümjie eh tüvü luoveh aveh thi müsho nü hi nüh noh vü azhükütsü aveh müzhenü sa, thi eh zhürühlieri thi eh zhühnyori müzhe nü tsethuoüji,

⁵hi nüh noh küsoh kajipe Israelri nyiehvü küsuokürho hi nüh noh pa David vü küphrahzhu üta vizhutsü naveh, hi nüh ma vü, ‘Israel kajipe rügi vü nyi küsü nga müpeh nüh küsawa nyu,’ ta küza.

⁶Thitü noh nüh eh sekünyi vünüh küreletewa thuoüji, noh nga nyutü noh tsari nga hi nüh azhükütsüri thi eh zhürühlieri hi nüh noh tüvü saküvehri mümzhe nüh sam nü wa taji nyiaza küpari kütsü sa thi mari khurü ti thuoüji;

⁷hi nüh azhih vi mari tsü küsa vünüh Israelri zothem naveh; thi hi nüh azheh sakümtse küsawa tü eh notha vünüh vijam nü Israelri tü anyiri azavü azhühku sataji zhühnyuo tewa nathuoh.

⁸ Thi azheh hamatü zorie kümprokeluom nathuoh; kütsuokükhru küsari nüh ngothse naveh, thi eshih ta sanü mari nüh, ‘Mokenüh VÜWA tü azhih hama vü thi azheh hama vü hakümjie samthuoh lo?’ ta sanaveh.

⁹Jüti sanü mari nüh, küpakenühnyunü mari nüh VÜWA mari Saküüwuowa, Egypt zhih vünüh mari pari vizhuküruwa kulemthuoh, thi nyiaza küpa küjehke nü jümari khurü thi jümara kütsü satetsethuoh; jükenüh VÜWA nüh kümsü hamari aveh mari vü vithsemthuoh; ti sanaveh,” ti küza.

¹⁰Mahvi mükeke sehkhe vü, Solomon nüh azheh künyi küsa: VÜWAzhehwa thi kajiwa zheh ti vünüh,

¹¹thi Tair kajiwa Hiram nüh Solomon vü müsethsoh, aküla zhehthsothi suna ma nüh küvingü zake küchetsü, kajiwa Solomon nüh Galilee vü anyuji mükeke Hiram vü tsü.

¹²Thitü Hiram tü Solomon nüh anyuji vi ma kütsüri no nti Tair vünüh ru tü jümari tü ma samkülozhe nüh sam.

¹³Jükenüh ma nüh, “Eh nü, noh nüh anyuji vi hi kütsü hamari tü mokümjie küsa lo?” ti küna. Jükenüh mari nüh azhihwa tü nosü nga Cabul, Ebri vünüh ame mkünyie, ta jiveh.

¹⁴Hiram nüh kajiwa vü suna küüto anyie müzü tsüküze.

¹⁵Kajiwa Solomon nüh nyitokhrü küvi thuoüji VÜWA zheh sana küsakenüh, ma mpa ma zheh, Millo, azhehküji, Jerusalem shiehku, Hazor, Megiddo thi Gezer,

¹⁶(Egyptri kajiwa Faroah nüh tsekhru nü Gezer si taji anyih nüh tsomtaji anyujiwa vü kürho Kananri rehthekhehm, thi vi ma tsavühwa Solomon vüvüh vü alahme kümjie vünüh tsüm;

¹⁷jükenüh Solomon tü Gezer sa le thi) Bethoron asajiwa,

¹⁸Baalath thi Judah azhih vü Tamar reza vü,

¹⁹thi Solomon nüh küpeh anyujiri aluo aveh, ma rawuh kheka nyujiri, ma rawuh nyiri kenüh anyujiri, thi Solomon nüh Jerusalem vü, Lebanonvü, thi ma nüh küsangü aveh.

²⁰Israel nyiri mükünyu Amorri, Hitri, Perizri, Hivri thi Jebusri kükheküm nyiri aveh,

²¹azhihwa vü mari küthsoküzhiri sam nü teküwari, Israel nyiri nüh müzothekhehra nüh sakümri, Solomon nüh küwurie akhrü tükha sanü nosü küjunga jüüta vünüh sa wieveh.

²²Thitü Solomon tü Israel nyiri nü tükha müküsanüh arie nyiri, aküjiri, ma sierhüri, ma zhezhiri, ma rawuh nyiri küsa.

²³Hamari tü Solomon küüroh nyiehvü küjiri lehvü müzamünga nü tünyiekeri küüroh küsa nyiehvü ro.

²⁴Thitü Faroah tsavühwa tü David nyujiwa vünüh Solomon nüh sakütsü ma mpa ma zheh vü tewa; thinü ma tü Millo, azhehküjiwasa.

²⁵ Solomon tü mahvi küsü vü küche keri ma nüh kükhurüpe VÜWAvü kütso kükhurü, kütsathuo kükhurü sasati, ma nüh VÜWAtüvü arheküüngu kütso nga sa. Jüti sanü ma tü azhehwa mülahra.

²⁶Kajiwa Solomon tü Ezionger, jüma tü Edom zhih vü kümru juhküji nato Elot kütuoh vünüh juhie wuori sa.

²⁷Thi Hiram tü juhie jümari vünüh ma sieperi, juhküjinyiri juhküji rüleh küthsüri thi Solomon sieperi nga siewa;

²⁸thi mari tü Ofir vü wa nü jüla nüh suna küüto anyie türamzü vinü kajiwa Solomon vü ru.