Read Pochuri Naga 2 KAJIRI 13 Bible Online

2 KAJIRI 13 - Pochuri Naga bible

2 KAJIRI 13

¹Judah kajiwa Ahaziah tsa Joash, Jehu tsa Jehoahaz mahvi mükeke nü kücheawa vü Samaria vü Israelri nyiehvü kükaji sa, thi ma tü mahvi türatürü kaji.

²Ma tü VÜWA notha vü mowa nü mümhie nüh sataji Nebat atsa Jeroboam kükhiemuori, ma nüh Israelri saküükhiemuo müzhetewa, matü jümari vünüh kiehtuo temwa nüh sa.

³Thi VÜWA rüküshu tü Israelri vü juzhutewa nü ma nüh mükütuowiethuoh nüh mari vi Siria kajiwa Hazael thi Hazael atsa Benhadad ke vü thse peh huo wie.

⁴Jüti küsa vü Jehoahaz tü VÜWA vü zhieke thi VÜWA nüh makünatsü; küpakenühnyunü mokümjie Siria kajiwa nüh Israelri kümrü sanüh ma nüh mari kümrü küngu kenüh.

⁵(Jükenüh VÜWA nüh küülole küsü vi Israelri tsü, jüti küsa vünüh mari tü Siriara ke vünüh müriera; thi Israel nyiri tü atükhuvü üta mari zhehri vü kürho sa.

⁶Jüta wie ketünga mari tü Jeroboam zhehlora kükhiemuori, ma nüh Israelri saküükhiemuo vünüh kari temwa nü jümari vü se wie; thi Kükhurüvü nga Samaria vü peh huo wie).

⁷Jümpa mükünyu ma tü Jehoahaz vü rawuh nyiri tünyieke, rawuhkheka türake thi ajih vünüh kütse nyiri anyie türake anyiehvü mükükhe tü; küpakenühnyunü Siria kajiwa nüh mari zoriem thi mari tü azhitho kürütse kümjie samtü.

⁸Jehoahaz nüh küüroh küpari thi ma nüh küsari aveh thi ma kükhratü Israel kajira Küthsoküzhizhüku Lasipha lovü rhüm sa ülo?

⁹Jüti sanü Jehoahaz tü ma pari vü nyi zehtewa nü mari nüh Samaria vünüh ma chohwum; thi ma tsa Joash nüh ma müthoh vünüh kükaji sa.

¹⁰Joash mahvi cherake nü türüawa vü Judah kajiwa Jehoahaz atsa Jehoash tü Samaria vü Israelri nyiehvü kükaji sate nü ma tü mahvi türatüro kaji.

¹¹Ma nga VÜWA notha vü mowa nü müsüveh ünüh sa; ma tü Nebat atsa Jeroboam kükhiemuori aveh ma nüh Israelri saküükhiemuowa vünüh temwa nü ma tü jümari vü kütse sa.

¹²Joash nüh küüroh küpari, ma nüh küsa aveh thi ma kükhra ma nüh Judah kajiwa Amazia sie küsaluo tü Israel kajira Küthsoküzhizhüku Lasipha lovü rhümsa ülo?

¹³Jüti sanü Joash tü ma pari vü nyi zehtewa nü Jeroboam nüh ma kajipe rügivü shupehtewa; thi Joash tü Israel kajiri sie nü Samaria vü chohwum.

¹⁴Jüti küsa tsotho vü Elishah tü ma küsü aküna naküm vü Israelri kajiwa Joash tü ma vü tsuo nü ma tüvü nüh krie taji, “Eh pa, ehpa! Israelra rawuhkhekari thi ma rawuh nyiri,” ti sanü zie.

¹⁵Thinü Elishah nüh ma vü, “Alawih küsü thi ashüchuri vi luo,” ti küza. Jükenüh ma nüh alawih kusü thi ashüchuri ti vi.

¹⁶Jüsevü ma nüh Israelri kajiwa vü, “Alawih heh luo,” ti küza; jüti küüza vü ma nüh jüma heh. Thi Elishah tü ma ke künyi vi kajiwa ke künyi rügivü sa.

¹⁷Thi ma nüh, “Mürhülehpie zhiehshu wuovü saluo,” ti küza; thinü ma nüh jüma sa. Jüti küsa vü Elishah nüh, “Ka luo,” ti küza; thinü ma nüh ka. Jüsevü ma nüh, “Kükhrara VÜWA ashüchu, Siria nyiehvü kükhrara ashüchuwa! küpakenühnyunü noh tü Siriari asehkhe müjie sakütsü küju nü noh tü Aphek vünüh mari siesaluo naveh,” ti küza.

¹⁸Thi ma nüh, “Ashüchuri vi luo,” ti küza; jüti küüza vü ma nüh jümari vi. Thinü ma nüh Israelri kajiwa vü, “Jümari vi nü azhih vü ka luo,” ti küza; jüti küüza vü ma nüh küche keriazhih ka nü lem.

¹⁹Thinü Saküüwuowa nyiwa tü arüshu taji ma vü, “Noh tü müngakeri nyutü türo keri müka nüh; jüta thuoüji noh tü Siria müjie küzorieju nü kaja peh huo na nü, thitü khinyi thuoüji noh tü küche keri mpa Siria kaküja sanathuoh,” ti küza.

²⁰Jüti sanü Elishah tü süm nü mari nüh ma chohwum. Jüti küsa vü Moabri küüwuri tü amahvi pasüh vü wasa luoluoti.

²¹Thi nyi küsü chohwu ünü, halie, küürevüh küsü nüh küngu vü nyi küsü tü Elishah rüku lovü vehjake; thi anyiwa tü Elishah arü keshike ünü matü rholeteru nü tesühra tsie.

²²Jütsotho vü Siria kajiwa Hazael tü Jehoahaz tsotho aveh vü Israelri kümrü sa.

²³Thitü VÜWA tü mari lozhisheh thi mari vü rüthaküna peh nü matü mari vü küprüke, küpakenühnyunü ma nüh Abraham, Isaac thi Jacob vü kütsathuozhü küsa kenüh mari küzoriewa nyu; nyutü nosü küju nü ma tüvü nüh mari viküjawa nyu.

²⁴Siria kajiwa Hazael süküm vü ma müthoh vünüh ma tsa Benhadad nüh kaji.

²⁵Thinü Jehoahaz atsa Jehoash tü Hazael tsa Benhadad vünüh anyujiri ma pa Jehoahaz vünüh arie vünüh küvirari virale. Joash nüh küche keri ma cha nü Israel nyujiri virale.