Read Pochuri Naga 2 KAJIRI 16 Bible Online

2 KAJIRI 16 - Pochuri Naga bible

2 KAJIRI 16

¹Remaliah tsa Peka mahvi türatürüawa vü Judah kajiwa Jotham atsa Ahaz tü kükaji sate.

²Ahaz tü kükaji küsate vü ma mahvi mükekethuoh, thi ma tü mahvi türatüro Jerusalem vü kükaji sa. Ma tü ma pa David kümjie müsanüh VÜWA ma Saküüwuowa notha vü kükatowa müsanüh sam,

³thitü ma tü Israel kajiri lehkhuji vü tsetewa. Ma tü VÜWA nüh Israel nyiri tüvü nüh zhejaküm akuoküjiri nüh kükre küürohküsari müzhe nü ma tsa wienga tso nü kükhurü sa.

⁴Thi ma tü azhie kümsieri, küzhihori thi athsoh kümzhi aveh kükhurü vünüh küsahthuo thi rheküüngu kütso sa.

⁵Jüti küsa vü Siria kajiwa Rezin thi Israel kajiwa Remaliah atsa Peka masü tü Jerusalem vü arie küsa kenüh shuhru nü Ahaz wu, thitü ma müchara nüh sam.

⁶Jüma tsotho vü Edom kajiwa nüh Edom kenüh Elat vira le nü Elat vünüh Judah nyiri zhezhujam; thi Edomri tü, mari nüh nosü küjurho kütse Elat vü teru.

⁷Jükenüh Ahaz nüh Assiria kajiwa Tiglat-pileser vü azhühvüri küze nü, “Hi tü noh siepe thi noh tsawie. Shuhrunü hi prü küveh Siria kajiwa thi Israel kajiwa ake vünüh hi küloletsü luo,” ti küza.

⁸Ahaz tü VÜWA zheh vünüh thi kajiwa zheh künyirhieku vünüh küngura rakasa thi suna nga vi nü Assiria kajiwa vü kütsüküsuo sa.

⁹Thi Assiria kajiwa nga ma zhü vitsü; Assiria kajiwa tü tsewa nü Damaska sie saluo taji jüma vira, thi ma nyiri re aküsi sa Kir vü tewa nü ma nüh Rezin zothem.

¹⁰Kajiwa Ahaz tü Tiglat-pileser Assiria kajiwa mütu nti Damaska vü wa ünü Damaska vü küpeh kükhurüpewa ngura. Thi kajiwa Ahaz nüh navüwa Uriah vü kükhurüpewa mokümjie vünüh sanüh ma tso thi ma küsa khemti küsa no üti küze.

¹¹Thi Uriah navüwa tü kajiwa Ahaz nüh Damaska vünüh küüza üta müzhe nü aveh sa kheh, jükenüh Uriah navüwa tü kajiwa Ahaz Damaska vünüh müjie küru tüvü jüma sa.

¹²Thi kajiwa nüh Damaska vünüh ru ünü kajiwa tü kükhurüpewa noküze. Jüti sanü kajiwa tü kükhurüpewa shehnyi wa nü jümawa rügi vü kuo,

¹³Jüti küsa vü ma tü ma nüh kütso kükhurü atha kükhurü, ma küzhu küzüke kükhurü, thi kükhurü azühwa jake, ti sa.

¹⁴Thi VÜWA tüvü peh küveh sahwuo kükhurüpewa ma nüh azheh tü vünüh, ma kükhurüpe azhiewa thi VÜWA azheh masü azhievü nüh vimnü ma kükhurüpe zhietü wuovü sam.

¹⁵Thi kajiwa Ahaz nüh Uriah navüwa vü azhütsü taji, “Kükhurüpe küjiwa rügivü nüh rüne kütso kükhurüwatso, münüleh atha kükhurü, kajiwa kütso kükhurü, thi ma thakükhurü, azhih hala anyiri aveh kütso kükhurü, thi mari athakükhurü, mari küzhu kükhurü; kütso kükhurü azüh aveh, thi küsahthuo azüh aveh jüma rügivü jake luo; thitü sahwuo kükhurüpewa thuoüji VÜWA vünüh mahtsazhü vi na küsa kenüh eh kenüh saluo,” ti küza.

¹⁶Uriah navüwa tü kajiwa Ahaz nüh azhükütsü üta hamari aveh sakheh.

¹⁷Thi kajiwa Ahaz nüh kütokeperi atsonyieri rehthuom nü jümari vünüh nyih thi kuri vizhum nü ma kükhu vü küpeh sahwuo shüvotsawa vünüh juhküjiwa viturum nü jüma vi alope rügivü sa.

¹⁸Thi kajizheh lovü kümnyie rülowa kenüh küüzhute lehkhuji saküsawa, thi kajiwa kenüh alievü lehpiewa ti VÜWA zheh vünüh ma nüh vijam, küpakenühnyunü Assiria kajiwa kenüh.

¹⁹Ahaz nüh küüroh küsari aveh Judah kajiri Küthsoküzhizhükuri Lasipha lovü rhümsa ülo?

²⁰ Jüti sanü Ahaz tü ma pari vü nyi zehtewa nü David nyujiwa vünüh ma pari sie chohwum nü ma tsa Hezekiah nüh ma müthoh vünüh kükaji sa.