Read Pochuri Naga 2 KAJIRI 17 Bible Online

2 KAJIRI 17 - Pochuri Naga bible

2 KAJIRI 17

¹Judah kajiwa Ahaz mahvi türakünyiawa vü Ela tsa Hoshea tü Samaria vü Israel nyiehvü kükaji sate nü ma tü mahvi tüguh kaji.

²Thinü ma tü VÜWA notha vü mowa nü müsüveh ünüh sa, tü matü vü Israel kajiri üta nü müsa.

³Jüti küsa vü Assiria kajiwa Shamaneser tü shuhru ma siekürünyuo; thi Hoshea tü ma siepe sam nü ma vü alekhrü thuo.

⁴Thitü Assiria kajiwa tü Hoshea vünüh aro kümsü ngura; küpakenühnyunü ma nüh Egypt kajiwa So vü azhühvüri küzenü ma nüh mahvi kürüzhu küsawa Assiria kajiwa alekhrüwa müsanüh sam; jükenüh Assiria kajiwa nüh ma khethuokem nü küsizhehlovü khekem.

⁵Jüti küsa vü Assiria kajiwa tü azhie jüla aveh mükiele nü Samaria vü teru, thi ma nüh mahvi küche jüma ro.

⁶Hoshea mahvi tüguawa vü Assiria kajiwa tü Samaria kieke nü Israelri sie Assiria vü tewa nü mari vi Hala, thi Habor, Gozan rühgu vü thi Media vü sa.

⁷Hamatü jükümjie vünüh sa, küpakenühnyunü Israel nyiri tü VÜWA mari Saküüwuowa, Egypt zhih vü, Egypt kajiwa Faroah akekükhu vünüh, thi nyiaza küpa kükrüri vünüh mari küvizhuwa vü khiemuoküm kenüh,

⁸thi VÜWA nüh Israel tüvü nüh zheküja akuoküjiri nüh saphiekütsü virhoküru vü tseteküwa kenüh.

⁹Thi Israel nyiri tü küthi nü VÜWA mari Saküüwuowa vü zanyo mükülehri sa. Mari mpa makeri’a nüh mari nyujiri vü, thi akhajie vünüh ashiehku küsa küju azhie kümsieri sa;

¹⁰mari mpa makeri’a nüh küzhiho kümsie aveh vü thi athsoh kümzhi kükhuaveh vü alokhuo tovüh thi Kükhurüvü sake kheh;

¹¹jüla nüh mari tü VÜWA nüh mari tüvü nüh viteküwa akuoküjiri nüh küsa üta azhie kümsieri rügi aveh vünüh arheküüngu tso. Thi mari tü aro mükümhie zanyori sanü VÜWA rüsakümtho taji marü saküshu,

¹²mari tü, VÜWA nüh, “Nohri tü hama müsa tümluo,” ta mari vü küüza anguori kütsü sa.

¹³Tü VÜWA nüh Israel thi Judah vü setsazhüküphrari thi setsazhü küphrari vünüh hamna tsü taji, “Khonyo vi noh pari vü azhükütsü thi eh siepe setsaküthsüri vünüh nohri vü küüze avehmüzhe nü kümsü lehkhuji vünüh nohri kürele taji ehzhükütsüri thi eh zhühkheri sanü vi luo,” ti küza.

¹⁴Thitü mari tü küünawa nyu, mari pari kümjie, VÜWA mari Saküüwuowa mütsotü nüh saküm üta küzikewa nyu.

¹⁵Mari tü ma zhühkheri thi kütsathuozhü ma nüh ma pari sie saküsa, thi ma nüh mari vü hamnari tsü küsari nokürünyiemthuoh. Mari tü nyiaza mükülehri asevü nyitewa nü müküleh vü pehmthuoh, thi mari tü VÜWA nüh mari kümjie müsa tümluo ta azhükütsü akuoküji mari mükieshe nü pehküvehri vü nyimzhetewathuoh.

¹⁶Thi mari tü VÜWA mari Saküüwuowa nüh azhükütsüri therajam nü mari mpa nüh lü nü mieshüzah atso künyi sa; thi Kükhurüvü küsüsa, ti sanü atülü vü küperi khurü, thi Baal kütsü sa.

¹⁷Thi mari tsari nyimpari nga nyimzari nga tso nü khurü, mari tümahtsazhü thi tühmakürho se, mari mpa nüh mari zhu nü VÜWA nothavü kümsü sa, ma rüsakümtho nü ma rüsaküshu.

¹⁸Jükenüh VÜWA tü Israel vü khieloti arüshu nü ma notha vünüh mari vijam; Judah kuoh mpa küchie nüh nyi küsü nga mükükhe.

¹⁹Judah nga VÜWA mari Saküüwuowa nüh azhükütsüri mümzhe nüh samnü Israel nüh saphiekütsü virhoküruri vü tseküm sa.

²⁰Jüti küsa vü VÜWA nüh Israel küthsoküzhiri aveh kulem nü mari sakümnomnatsü, ma notha vünüh mari müjie viküjaju nü mari vizanyo sakümsüri ake vü thsem.

²¹Ma nüh David zheh vünüh mari zokhriküm sevü mari tü Nebat atsa Jeroboam vi nü kaji sa. Thi Jeroboam nüh mari tü VÜWA sekünyivünüh zhejam nü mari tü kükhiemuo küji küsam.

²²Israel nyiri tü Jeroboam nüh kükhiemuo küsari aveh vü tse nü mari tü jümari vünüh mükari nüh sa,

²³VÜWA nüh ma siepe setsaküthsüri aveh vünüh küüza üta Israelri tü ma notha vünüh müjie viküja küju nü mari küzhe sa. Jükenüh nosü küju nga Israel tü mari mpa mari zhih vünüh Assiria vü zheküjari satse wie.

²⁴Jüti küsa vü Assiria kajiwa nüh Babilon, Kutha, Ava, Hamath thi Sefarvaim vünüh ti anyiri sieru nü Israel nyiri müthoh vünüh Samaria nyujiri vü sanü mari nüh Samaria mükate vi taji ma nyujiri vü kürho satewa.

²⁵Mari wa jüla kürho khu vü thuoüji mari tü mari VÜWA mükrü; jükenüh VÜWA nüh mari azhievü amiewuori küze nü jümari nüh mari wuori zothem.

²⁶Jüti küsa vü Assiria kajiwa vü, “Kuohjiri noh nüh sietewa nü Samaria nyujiri vü küsari tü azhih jüla nyiaza khonyo müthsülie; tinü ma nüh mari azavü amiewuori küze savehthuoh, thi halie, jümari nüh mari zothevehthuoh, küpakenühnyunü mari tü azhih jüla nyiaza khonyo müküthsü kenüh,” ti küza.

²⁷Thinü Assiria kajiwa nüh, “Noh nüh jüla nüh siete küwanavüri küsü küze nü ma tü wa taji jüla küürholuo, thi azhih jüla nyiaza khonyo küsosie luo,” ti küza.

²⁸Jükenüh navüri küsü mari nüh Samaria vünüh sieteküwa küsüru nü Bethel vü kürho sataji mokümjie mari tü VÜWA krü naveh ünüh ti küsawa vi mari sosie.

²⁹Thitü akuoküji küsüküsü nga papa nyiaza sa wie taji Samariari nüh saküsa azhie kümsieri vü kükhurüzheh küzahri lovü saküpehhuo sa, akuoküji küsüküsü nga papara kürhope nyuji vü sa kheh;

³⁰Babilon nyiri nüh Sukkoth-benot sa, Kut nyiri nüh Nergal sa; Hamath nyiri nüh Ashima sa,

³¹Avitri nüh Nibhaz thi Tartak sa; thi Sefarvaim nyiri nüh anyih nüh ma tsari tso nü Sefarvaim, Adrammelek thi Anamelek vü tsü.

³²Mari tü VÜWA nga krü nü mari mpa mari azhie vünüh anyi rüleh küpapari chieke nü navü küsa taji azhie kümsieri kükhurüzhehküzahri vü makeri’a nüh küsahthuo sa.

³³Jüti sanü mari tü VÜWA nga krü thitü mari sieteküwa akuoküjiri azavü amükeri asenyi nü mari mpa mari nyiazari kütsü nga sa.

³⁴Nosü küju nga mari tü tükhu vü müke kümjie sam wie. Mari tüVÜWA mükrü, thi mari tü Jacob ma nyo Israel ta ji kütsüwa tsarivü VÜWA nüh azhükütsü zhühkheri nyutü azhühkho nyutü akhonyo nyutü azhühnyo kütsü mümzhe nüh sam.

³⁵VÜWA nüh mari sie kütsathuozhü sanü mari vü azhühnyo tsütaji, “Nohri tü nyiaza küpari kükrüwa nyu, nyutü nohri tü mari vü küngie kütsuowa nyu, nyutü mari kütsü küsawa nyu, nyutü marivü küsahthuo küsawa nyu;

³⁶thitü nohri tü VÜWA, müzho sheh thi apie thsuowie nü Egypt zhih vünüh nohri küvizhuwa krü naveh; nohri ma vü küngie kütsuo sanaveh, thi ma vü küsahthuo sanaveh.

³⁷Thi azhühkhe, azhühkho, khonyo thi zhühnyo ma nüh noh keri nüh kürhüri nohri tü azhüzhü sheh nü satse naveh. Nohri tü nyiaza küpari kükrüwa nyu,

³⁸thi hi nüh nohri sie nü kütsathuozhü saküsari küümawa nyu. Nohri tü nyiaza küpari kükrüwa nyu,

³⁹thitü nohri tü VÜWA nohri Saküüwuowa krü naveh, thi ma nüh nohri mükünongüri aveh ake vünüh nohri vizhutsü naveh,” ti küza.

⁴⁰Jüta wie ketünga mari tü küünawa nyu nü atükhuvü mari amüke müzhe nü sa wie.

⁴¹Jüti sanü akuoküji hamari tü VÜWA nga krü, thi mari nüh kürheke atsori kütsü nga sa, mari atsari nga, thi mari atsara tsari nga jüüta mari apari kümjie sanü khinyi küju nga mari tü satse wie.