Read Pochuri Naga 2 KAJIRI 21 Bible Online

2 KAJIRI 21 - Pochuri Naga bible

2 KAJIRI 21

¹Manase kükaji tevü ma tü mahvi türakünyi khruovehthuoh. Thi matü Jerusalem vü mahvi tünyieke nü münga kükaji sa. Ma zah nyo thuoüji Hefziba.

² Thi ma tü VÜWA nothavü kümsü, Israel nyiri tüvü nüh VÜWA nüh akuoküji zheküjari nüh kükre amüke küsari müzhe nü satewa,

³küpakenühnyunü ma pa Hezekiah nüh zorieküm azhie kümsieri salenü Baal kenüh kükhurüpe khake, thi Israel kajiwa Ahab nüh küsa Kükhurüvü küsü sanü atülü vü küperi khurü thi jümari kütsüsa.

⁴Thi ma nüh VÜWA zheh vü kükhurüperi sa, jüma kenüh VÜWA nüh, “Hi nüh Jerusalem vü eh nyo sanaveh,” ta küza.

⁵Atülü vü küperi aveh kenüh ma nüh kükhurüperi VÜWA zheh awiepa künyi vü sa.

⁶Jüti sanü ma tü ma tsa tso nü kükhurü küsü kümjie sataji nyiazazhü küphra sa, thi tüshihtümari thi mahzhieri sie küzaluosa. Ma tü VÜWA notha vü kümsü khieloti sanü ma rüsakümtho nü arüsaküshu.

⁷Ma nüh Kükhurüvü atso khrüke nü küsawa tü azheh, VÜWA nüh David thi ma tsa Solomon vü, “Azheh hala, thi Jerusalem vü, Israel akuoh aveh vünüh hi nüh rüka küsa vü küsuokürho hi nüh eh nyo sanaveh;

⁸thi hi nüh Israel ajih tü hi nüh azhih vi ma pari vü tsüküsawa vünüh küüpuoküpe küüsalewa nyuthuoh, mükütüküzü mari tü hi nüh azhükütsüri müzhe nü azhüküzhü ti sa, thi eh siepewa Mosa nüh Khonyo kütsü aveh müzhe ti thuoüji,” ti küza.

⁹Thitü mari tü müzake nüh sanü Manase nüh mari küchü nüVÜWA nüh Israel nyiri tüvü nüh zorieküm akuoküjiri nüh küsanyieh vü kümsü küsa.

¹⁰Thi VÜWA tü ma siepe setsaküthsüri vünüh,

¹¹“Judah kajiwa Manase nüh akükre hamari sa, thi ma tüvüpehküru Amorri nüh khukekümsü zanyori küsa nyiehvü nüh Judah wienga sakükhiemuo küm sa.

¹²Jükenüh VÜWA, Israel Saküüwuowa nüh hakümjie küzaveh, Halie, hi nüh Jerusalem thi Judah lüvü kümsü viru nü thari nüh jüma künake naveh ünüh akhüna kümzhe sanaveh.

¹³Thi hi nüh Jerusalem nyiehvü thi Ahab zheh sühfo vü ti Samaria küütewa ali shohthso naveh; nyi aküsü nüh küfü küsho üta hi nüh Jerusalem shotsü naveh, shotsü nü khamleletsü naveh.

¹⁴Thi hi nüh eh ka kümtori vizhujam nü mari mükünongüri ake vü thsem naveh, jüti sanü mari tü mari mükünongüri aveh ashieküsü thi zheküviri sam naveh,

¹⁵küpakenühnyunü mari nüh eh notha vü mowa nü müsüveh ünüh sanü mari pari Egypt vünüh shuteküru vünüh nosü küju ehrükümtho nü eh rüsaküshu küm kenüh,” ti küza.

¹⁶Jüma nyiehvü nga Manase nüh Jerusalem pohte küsü vünüh pohteküsü küju müjie saküüpro küju nü ma tü müküükhiehra züh khielota küthü, ma nüh Judah saküükhiemuo nyiehvü nga nüh mari tü VÜWA notha vü mowa nü müsüveh ünüh sa.

¹⁷Manase nüh küüroh küpari, thi ma nüh küsari aveh, thi kükhiemuo ma nüh küphrake ti kajiwa Judah Küshukürazhüku Lasipha lovü rhümsa ülo?

¹⁸Jüti sanü Manase tü ma pari vü nyi zehtewa nü ma zheh, Uzah phahri vü chohwum, thi ma tsa Amon nüh ma müthoh vünüh kükaji sa.

¹⁹Amon nüh kükaji küsate vü ma mahvi mükeke nü künyithuoh, thi ma tü Jerusalem vü mahvi künyi kükaji sa. Ma zah nyo thuoüji Meshulemet, Jotba vühwa Haruz tsavühwa.

²⁰Ma nga mapa Manase kümjie VÜWA nothavü mowa nü müsüvehünüh sa.

²¹Ma pa nüh kütse lehkhuji aveh vü ma nga tse, thi ma pa nüh anguokütsü küünari aveh kütsü küna, thi jümari khurü;

²²ma tü VÜWA, ma pari Saküüwuowa kulem, jüti sanü VÜWA lehkhuji vümütse nüh sam.

²³Jüti küsa vü Amon sieperi tü ma vü küjurhü sanü kajiwa zheh vünüh ma fethem.

²⁴Thitü azhih jüla nyiri tü thari nüh kajiwa Amos vü küju rhü sanüh aveh rehthe khehm nü azhih jüla nyiri tü ma tsa Josiah vi nü ma müthoh vünüh kükaji sa.

²⁵Amosa nüh küsa küüroh küpari tü Judah kajiri Küshukürazhüku Lasipha lovü rhümsa ülo?

²⁶Jüti sanü ma tü Uzzah phahri ma rüku lovü chohwum nü ma tsa Josiah nüh ma müthoh vünüh kükaji sa.