Read Pochuri Naga 2 KAJIRI 23 Bible Online

2 KAJIRI 23 - Pochuri Naga bible

2 KAJIRI 23

¹Jüti küsa vü kajiwa nüh anyi wuori küze, thinü Judah thi Jerusalem kükhruori aveh ru ma vü sezhuh khe.

²Thi kajiwa tü VÜWA zheh vü khru, ma kükhru vü Judah nyiri aveh, Jerusalem vü kürho nyiri aveh, aküzahluo thi aküjiluo nyi khrukheh; thi VÜWA zheh vünüh kütsathuozhü lasipha küngurawa zhüri mari nüh küünara vünüh ma nüh chie.

³Jüti sanü kajiwa tü alokhuo tovüh kütuoh vü tsie nü VÜWA sevü tsenta, ma zhükütsüri, pohvüri thi ma zhühkheri ma luoveh vi thi ma kürholi aveh vi nü müzhe nü lasipha hama lovü rhüküsa kütsathuozhüri sanaveh ta VÜWA tüvü kütsathuozhü sa; thinü anyiri aveh nga kütsathuozhüwa vü kütsarü küsü sa.

⁴Jüti küsa vü kajiwa nüh Hilkiah navü kümsiewa, anavüri senyiwa, thi lehpie kühuori vü VÜWA zheh vünüh Baal kenüh, Kükhurüvü kenüh, thi atülü vü küpe rieh huo kenüh saküsa aküfüri alievü vizhuru üti azhütsü; thi ma nüh jümari Jerusalem alievü Kidron zhuh vünüh tsom nü jümara weji vi Bethel vü wa.

⁵Thi ma nüh anguo navüri, Judah kajiri nüh shie sanü Judah nyuji thi Jerusalem natonahuo azhie kümsieri vü asierhe tso üta küsari, thi Baal vü, arünyi vü, asa vü, awutsiri, thi atülü vü küpe riehkhuo vü kütsori nga vijakhehm.

⁶Jüti sanü ma nüh VÜWA zheh vünüh Kükhurüvü alievü vizhu, Jerusalem alievü nüh Kidron kutso vü viru nü Kidron kütso vünüh jüma tsom nü fekümnya taji jüma zhitho viwa nü müza rükupevü jam.

⁷Thi ma nüh VÜWA zheh vü küpeh nyimpari künakhie küüphroküphriehra zhehri, Kükhurüvü kenüh nyimzari nüh to nü thuo küsari zoriejam.

⁸Ma nüh Judah nyujiri vünüh navüri aveh siezhuru nü navüri nüh asierhe kütsope azhie kümsieri Geba vünüh Beersheba küjusakümnem, thi anyujiwa kümkhrüwa Joshua kheri lehpie, anyujiwa kheri azhu wuovü azhie kümsieri zoriejam,

⁹jütawie ketünga azhie kümsieri vü anavüri tü VÜWA kükhurüpe Jerusalem vü müru nüh sam nü mari jienüri aza vünüh ahzhi müküthse alohse tsa.

¹⁰Thi ma nüh Tofeth, jüma tü Hinnom atsara nyuovü küpehwa sakümnem nü nyi küsü nga ma tsa nyimpa nyutü ma tsavühwa tsonü Molek vü kükhurü müsanüh sanaveh.

¹¹Judah kajiri nüh arünyi vü rawuhri müthü nü VÜWA zheh vükütu lehpie, Nathanmelek zhehlo wiepa; jüma tü kükhurüzheh nyula vünüh küsari vijam; thi ma nüh anyih vi nü rünyi rawuhkhekari tsom.

¹²Thi Ahaz wiepa rügiwa luomuo vü kükhurüpe Judah kajiri nüh küsari, thi VÜWA zheh vü anyula künyi vü Manase nüh kükhurüpe küsari ma nüh azhih vü shoh-o nü zokhuoriem taji jümara zhitho viwa nü Kidron kutso vü jam.

¹³Thi Jerusalem zhiehshu vü azhie kümsieri, küütsaküsü küzhizhiehshu vü Israel kajiwa Solomon nüh Sidonri kükrewa Kükhurüvüwa kenüh, Moab kükrewa Khemosh kenüh, thi Amonri kükrewa Milkom kenüh küsari kajiwa nüh sakümnem.

¹⁴Ma nüh lokhuo tovühri zokhuoriem, Asherim shüchiem, jüti sanü anyiri arü nüh azhie jümari saküprom.

¹⁵Jümpa mükümyu Bethel vü kükhurüpewa Nebat atsa Jeroboam, Israel saküükhiemuowa nüh azhie kümsie kükhake, kükhurüpe jümawa thi azhie kümsiewa ti ma nüh shohchiem nü ma lohri ma nüh zokhuoriem, tohkümnya nü azhitho küsam; jüsevü nga ma nüh Kükhurüvüwa tsom.

¹⁶Josiah nüh sühle küno vü aküzhiwa vü arükuri ngura; thinü ma nüh wuori küze nü arükuri lovü nüh arüri viru nü kükhurüpewa rügivü nüh tso nü jüma sakümnem, VÜWA zhü Saküüwuowa nyiwa nüh zhüchüh nü zanyo hamari müsezhukütsü müzhe nü hamari sa.

¹⁷Jüti küsa vü ma nüh, “Tu hi nüh nguküveh tü mowa müsheküpehlo?” ti küna. Jüti küüna vü anyuji jüma nyiri nüh ma vü, “Jümatü, Judah vünüh küru Saküüwuowa nyiwa zanyo hamari müsezhutsü nü noh nüh Bethel vü kükhurüpewa vü küsawa rükulie,” ti rületsü.

¹⁸Thinü ma nüh, “Jüti küpehm luo; nyi küsü nga nüh marüri vi mküütsele tümluo,” ti küza. Jükenüh mari tü ma rüri thi Samaria vünüh küshuhru setsaküthsüwa rüri ti nü jüti sam.

¹⁹Thi Samaria nyujiri vü Israel kajiwa nüh VÜWA rüsakümtho nü marüsaküshu taji azhie kümsieri vü mükütsotüra kükhurüri aveh Josiah nüh vijam; Bethel vü ma nüh küsa aveh müzhe nü mari vü sa.

²⁰Ma nüh jüla, kükhurüpe, azhie kümsieri rügi vü küpeh setsaküthsüri aveh ma nüh rehthem nü jümari rügi vünüh anyirarü tso. Jüti sanü ma tü Jerusalem vü sheleteru.

²¹Jüti küsa vü kajiwa nüh anyiri aveh vü, “Kütsathuozhü lasipha hama lovü rhü küsa üta VÜWA nohri Saküüwuowa vü tsekükarisaluo,” ti küza,

²²küpakenühnyunü Israel lesaküru lesari tsotho vünüh nosü küju tsekükari küsü nga jükümjie müküsa kenüh, nyutü Israel kajiri tsotho aveh vü, nyutü Judah kajiri tsotho aveh vü küsü nga samru;

²³thitü Kajiwa Josiah mahvi türatüzeawa vü tsekükari hamatü Jerusalem vünüh VÜWA vü sa.

²⁴Jüma nyiehvü nga lasiphawa vü rhüke küsa Khonyo zhüri VÜWA zheh vünüh Hilkiah navüwa nüh küphahrawa ma nüh vizhu na küsakenüh Judah thi Jerusalem zhih vünüh küngu tüshitümari, mah zhieri, kürheke tsori, anguori, thi akükreri aveh Josiah nüh vija khehm.

²⁵Ma tüvü kaji küsü nga ma üta Mosa. Khonyo aveh müzhe nü ma luoveh aveh vi, ma kürholi aveh vi thi ma kükhra aveh vi VÜWA vü sühleküru münyie; nyutü ma sevü nga ma kümjie küsa nyiküsü nga shumru.

²⁶Khinyiwienga VÜWA tü ma rükümtho aküze küji vünüh müjiesühle wie, jüma kenüh ma rüküshu tü Judah vü juzhutewa, küpakenühnyunü arüsaküümtho Manase nüh ma rüsakümtho kümkenüh.

²⁷Thinü VÜWA nüh, “Hi nüh Israel viküja üta Judah nga eh notha vünüh vijam naveh, hi nüh rükaküsa anyuji Jerusalem, thi azheh hi nüh, Eh nyo tü jüla peh naveh, ta küsawa nga jam naveh,” ti küza.

²⁸Josiah nüh küüroh küpari thi ma nüh küsari aveh tü Judah kajiri Küshukürazhüku Lasipha lovü rhümsa ülo?

²⁹Ma tsotho vü Faroah Neko nüh ma ngu ünü Megiddo vünüh marehthem.

³⁰Jüti küsa vü ma sieperi nüh Megiddo vünüh ma küsü rawuhkhekaküsü vünüh vü nü Jerusalem vü viru taji ma mpa ma rüku lovü chohwum. Jüti sanü azhie jüma nyiri nüh Josiah atsa Jehoahaz vi nü thsem taji ma pa müthoh vünüh ma nüh kaji küüsa.

³¹Jehoahaz kükajite vü ma mahvi mükeke nü küchethuoh, thi ma tü Jerusalem vü sa küche kükaji sa. Ma zah nyo thuoüji Hamutal, Jeremia Libna tsavühwa.

³²Thitü ma tü ma pari nüh saküru aveh sanü VÜWA notha vü mowanü müsüveh ünüh sa.

³³Thi Faroah Neko nüh ma vi Ribla, Hamath azhih vü nyura küsiküsa lovüthsem, jüti sanü ma tü Jerusalem vü kükaji müküsa nta küsakenüh, thi azhih jüla alekhrü rakasa kete anyie küche nü müzamzü thi suna kete cherake nü müzü vi na küsa kenüh.

³⁴ Jüti sanü Faroah Neko nüh Josiah kajiwa atsa Eliakim, ma pa Josiah müthoh vünüh kaji küsa thi ma nyo khaphrü nü Jehoiakim küsam. Thi ma nüh Jehoahaz vijam; thi ma tü Egypt vü teru nü jüla nüh süm.

³⁵Jehoiakim nüh rakasa thi suna vi Faroah tsüm, thitü ma tü Faroah azhü müzhe nü amewa tsü na küsa kenüh azhih jüla akhrü khrüh. Ma nüh Faroah Neko tsü na küsa kenüh nyi küsüsü vü ma nüh küüte müzhe nü azhih jüla nyiri vünüh rakasa thi suna ti küwuriekhrü vi.

³⁶Jehoiakim nüh kükaji te vü ma mahvi tü mükeke nü müngathuoh, thi ma nüh Jerusalem vü mahvi türaluoke kükaji sa. Ma zah nyo tü Zebida, Pedaia Rumah atsavühwa.

³⁷Thitü ma tü ma pari nüh saküru aveh müzhe nü sataji VÜWA nothavü mowa nü m