Read Pochuri Naga 2 KAJIRI 25 Bible Online

2 KAJIRI 25 - Pochuri Naga bible

2 KAJIRI 25

¹Ma nüh kükaji mahvi tüguawa, asa türake vü, thi asa jüma rülo türawa vü Babilon kajiwa Nebukhadnezzar tü ma thopahiri aveh sierunü Jerusalem siesaluo taji jüma mükieshe; jüti sanü mari nüh kümkieshe küüroh sa mükiele.

²Jüti sanü anyujiwa tü kajiwa Zedekiah mahvi türaluoke küju zhewie.

³Jüti küsa vü asa müzüawa rülo tüguh vü azhih jüla tü khieloti mükhuojih tewa nü anyiri kenüh ashie münyie nüh sam.

⁴Thinü anyujiwa tü veh rieküja küsü satewa; kajiwa phahri kütuohvü ashiehku künyi azhievü akheri lehkhujiwa vünüh Khaldeari nüh mükieshe pehwie ketünga kajiwa thi arienyiri aveh tü shutewa. Thi mari tü Araba küüprü vü tewa.

⁵Thitü Khaldeari thopahiri tü kajiwa zhewa nü Jeriko kütakeri vünüh ma phara; thi ma thopahiri thuoüji ma vünüh vohrie tewa kheh.

⁶Jüti sanü mari nüh kajiwa revi taji Babilon kajiwa vü Ribla vü sieteshuhru. Jüti küsa vü ma nüh ma lüvü ashih thsem.

⁷ Mari nüh Zedekiah atsari ma notha atüvü nüh rehthem nü Zedekiah notha künyi khrüzhumtü nü mürü kieveh nüh ma jih pheh taji masie Babilon vü tewa.

⁸Asa müngaawa rülo türüawa jüma tü kajiwa Nebukhadnezzar, Babilon kajiwa mahvi türatüguh vü azhezhiwa Nebuzaradan, kühuotewa ma tü Babilon kajiwa siepe küsü Jerusalem vü ru.

⁹Thi ma nüh VÜWA zheh, kajiwa zheh, thi Jerusalem vü azheh aveh ti tsom; azheh küji aveh ma nüh tsorie khehm.

¹⁰Khaldea thopahiri, rieh huo zhezhi siekütseri nüh shiehku Jerusalem samkiele küsa zophum.

¹¹Anyuji vü anyiri küükhe küsari thi jam nü Babilon kajiwa vü teküwari thi riehkhuo küpari virü nü Nebuzaradan rieh huo zhezhiwa nüh sietewa.

¹²Thitü rieh huo zhezhiwa nüh azhih jüla kümkhuotsa wuori rhelivirhu kütsashe thi azhih kükhahu nta kükhesam.

¹³Thi VÜWA zheh vü asahwuo tovühri, kütokeperi thi VÜWA zheh vü sahwuo juhküji tü Khaldeari nüh zokhuoriem nü sahwuori tü Babilonvü vü tewa.

¹⁴Mari nüh aküfüri, küüzhievühri, nyithikuri, arhesie kenüh akhuri, thi sahwuo küfüküjuh kükhurüzheh küüroh vü küviri aveh,

¹⁵anyihtahthsü nga, thi akeri nga ti vitekhehwa. Rieh huo azhezhiwa nüh mowa nü suna zhi nüh suna ti küsa vünüh, thi mowa nü rakasa zhi nüh rakasa ti küsa vünüh vitewa.

¹⁶VÜWA zheh kenüh Solomon nüh küsa atovüh künyiawa, juhküjiküsüwa, thi kütokeperi, sahwuo küfüküjuhri tü ma küüzhomüküütera sa.

¹⁷Lokhuotovüh kümsie tü ale türatüze, jümawa rügivü tü sahwuo; thi sahwuo hama kümsie tü ale küsü pike küluoh; ma lüvü küürohsaküüzüle aveh tü sahwuo nüh katoh sake nü küteh khe. Thi tovüh küpawa nga jükümjie vünüh sa.

¹⁸Jüti küsa vü rieh huo zhezhiwa tü Seraia navüwa, Zefania navü künyiawa, thi akheji kühuo kücheri, ti sietewa;

¹⁹thi nyujiwa vünüh arie nyiri khazhu küsawa aküji küsü, anyuji vünüh küngu kajiwa shikekütsüri nyi münga; azhih jüla anyiri küsezhuh nyihla sierhüri kürhüwa; thi anyuji vünüh küngura azhihjüla anyiri nyi rorake ti sietewa.

²⁰Rieh huo zhezhiwa Nebuzaradan nüh mari sie nü Babilon kajiwa vü Ribla vü ru.

²¹Thinü Babilon kajiwa nüh Hamath azhih Ribla vünüh mari müwiethe khehm. Jüti sanü Judah tü ma zhih vünüh nyura küsi siesatewa.

²²Thi Judah azhih vü anyiri münyie küveh, Babilon kajiwa Nebukhadnezzar nüh küükheri nyiehvü ma nüh Shafan atsa Ahikam atsa Gedalia vi kümkhrüwa vü chieke.

²³Jüti küsa vü anyunyu vü arienyira zhezhiri, thi mari nyiri nüh Gedalia tü Babilon kajiwa nüh kümkhrüwa chiekemthuoh ta küünaravü, mari tü mari nyiri sie Mizpa vü Gedalia atsa Ishmael, Karea atsa Johonan, Netofathitwa Tanhumet atsa Seraia, thi Makathita tsa Jazania, ti sie nü ru.

²⁴Thinü Gedalia nüh mari vü thi ma nyiri vü küshie taji, “Khaldea küjiri kenüh mükrü tüm, azhih jüla rholuo, thi Babilon kajiwa kütsü saluo, jüma nüh nohkeri nüh mhie naveh ünüh,” ti küza.

²⁵Thitü asa türüawa vü kajiwa thahruo vünüh Elishah ma atsa, Nethaniah atsa Ishmael tü nyi türake sieru taji Gedalia prü nü ma, Judahri, thi Khaldeari ti Mizpa vü ma sieküpehri zothem.

²⁶ Thinü nyiri aveh zahluo nyutü jiluo, thi arienyira zhezhiri tü sühra nü Egypt vü tewa, küpakenühnyunü mari tü Khaldeari kükrü kenüh.

²⁷Judah kajiwa Jehoiachin aküsi sateküwa mahvi cherake nü türü, asa türükünyi rülo mükeke nü türü vü Babilon kajiwa Evilmerodak kükaji te mahvi vü ma nüh lozhi shehke nü Judah kajiwa Jehoiachin aküsi küsa vünüh sakürüzih mütü;

²⁸thi ma nüh azhü külohnyi vünüh küza taji Babilon vü ma sieküpeh kajiri aperi nyiehvü nüh küsü vi ma tsü.

²⁹Jüti küsa vü Jehoiachin tü ma küsi thsünyawari fojam. Thi ma tü ma kürho vü mükütuo wiethuoh nüh rülorülo kajiwa shiekütsapevünüh ashie tsa;

³⁰Ma keluo kütsü, mükütuo wiethuoh nüh kajiwa nüh ma kürho küju suohpe küsü keluotsü.