Read Pochuri Naga 2 KAJIRI 4 Bible Online

2 KAJIRI 4 - Pochuri Naga bible

2 KAJIRI 4

¹Jüti küsa vü setsaküthsüra tsari küsü avüvüh nüh Elishah vü zie taji, “Noh siepewa eh vüpa tü sümthuoh; thi noh siepewa tüVÜWA krü ta küsa noh nüh thsü, thitü ame küünawa tü ru nü ehtsa künyi vi ma tühkha küsa nta rupehveh,” ti küza.

²Elishah nüh nyimzawa vü, “Hi nüh noh kenüh mowa sa üti lo? Hivü küza luo; azheh vü noh tü mowa pehveh lo?” ti nyimzawa vü küna. Nyimzawa nüh, “Noh siepevühwa tü avüjuh leh huo küsüküchie nüh zanyo küsü nga münyie luo,” ti rületsü.

³Thinü ma nüh, “Alievü wa nü noh zhephruri vünüh aküfükürütso na luo, thi küzüla müna tümluo.

⁴Jüti sanü azhehlo vü tu nü noh thi noh tsari sie nü amükhie kheketaji avüjuh vi aküfüri vü thse luo, thi küsü promthuoüji anatovü vikesaluo,” ti küza.

⁵Jükenüh nyimzawa tü ma vünüh wa nü ma thi ma tsari ti amükhiekhethuoke nü ma tsari nüh aküfüri viküru vü ma nüh avüjuh vi nü thse.

⁶Aküfüri tü prom ünü nyimzawa nüh ma tsa vü, “Küfü küpa hivü viru le luo,” ti khuo. Thinü ma nüh ma vü, “Küpa münyiethuoh,” ti küza. Jüti küsa vü avüjuhwa tü müshu nüh satewa.

⁷Nyimzawa tü ru nü Saküüwuowa nyiwa vü küza, thinü ma nüh, “Wa nü avüjuhri zhu nü noh shewiri thuom luo, jüti sanü noh thi atsari tü kümnyie vünüh rhora naveh ünüh,” ti küza.

⁸Rülo küsü Elishah tü nyirhievühri küsü kürho pe Shunem vü kuotsewa ünü ma nüh ma tü ashie pike tsa üti khopeke. Jükenüh ma tü aleh jüvü kari küwasasa vü ashie tsa nti jüla sühletututi.

⁹Jüti küsa vü ma nüh ma vüpa vü, “Halie, khinyi thuoüji hi nüh thsüvehthuoh nü hamatü mükütuowiethuoh nüh hiri lehkhuji vü rukariwa küpeh huo Saküüwuowa anyi kümtseri küsü wiethuoh.

¹⁰Tinü azheh küsü sakhe nü küshothuo sataji azie sho, thi makenüh jülovü aze küsü, toküsape küsü, rüngakepe küsü thi lati küsü ti sa ünüh raluo, jüti sanü ma nüh hiri vü küru vü jüla pehra naveh,” ti küza.

¹¹Rülo küsü ma tü Jüla ru nü azhehlo jüla sühleru nü münyiepeh.

¹²Thi ma nüh ma siepewa Gehazi vü, “Shunamwa ji luo,” ti küza. Ma nüh nyimzawa küji vü nyimzawa tü ma tüvü tsiepehveh.

¹³Thinü nyimzawa vü küza luo, noluo, noh nüh hiri kenüh küsüro hama aveh vütüthuoh; noh kenüh mowasana lo? Noh kenüh noh tü kajiwa nyutü thopahiri sierhüwa vü küüza zhühnyo küsünga pehveh ülo? ti küna. Nyimzawa nüh, “Hi tü hi mpa eh nyiri azavü kürho saveh,” ti rületsü.

¹⁴Jüti kürüle vü ma nüh, “Thinü nyimzawa kenüh mowa sa tsü nalo?” ti küna. Gehazi nüh, “Nyimzawa tü atsa münyie, thi mavüpa tü khruomthuoh,” ti rületsü.

¹⁵Thinü ma nüh, “Nyimzawa ji luo,” ti küza. Thi ma nüh nyimzawa küji vü nyimzawa tü alehpie vü tsiepeh veh.

¹⁶Jüti küsa vü ma nüh, “Hama zale vü, atsothowa ruthuoüji noh tü atsa nyimpari küsü kheke naveh,” ti küza. Nyimzawa nüh, “Nyu, eh vüwa, O Saküüwuowa nyiwa; noh siepevühwa vü mürie tüm,” ti rületsü.

¹⁷Thitü nyimzawa tü atsa moh nü nyimpari küsü jüma tsotho kümjie küsa pasü vü Elishah nüh nyimzawa vü küüza üta wuo.

¹⁸Atsawa tü khruosühra ünü rülo küsü ma tü ma pa vü kümahwieri azavü wa.

¹⁹Jüti küsa vü ma nüh ma pa vü, “O, eh lü, eh lü,” ti sa. Apawa nüh ma sieperi vü, “Ma zah vü waluo,” ti küza.

²⁰Thi ma nüh ma küruoke nü ma zah vü sieru ünü atsawa tü ma zah thüchi rügi vü rünyi küüzeto küju peh nü süm.

²¹Thinü nyimzawa nüh khru nü ma vi Saküüwuowa nyiwa aze rügivü küzeh nü mükhie khekem taji tsezhutewa.

²²Jüti sanü nyimzawa nüh ma vüpa ji nü ma vü, “Asieperi küsüthi rawuh küsü ti hi vü küze nü hi tü shiti Saküüwuowa nyiwavü küwa taji shele küüru luo,” ti khuo.

²³Ma nüh ma vü, “Nosü noh tü mokenüh ma vü wa na lo? Hatü asathenga nyu, nyutü kümnyi rülo nga nyu nü,” ti küza. Nyimzawa nüh, “Jümatü moküsama,” ti rületsü.

²⁴Jüti sanü ma tü arawuhwa ape küche nü ma siepewa vü, “Hi nüh nohvü müjie küüza küju nü müküüzhihke tü zhe küüjo luo,” ti küza.

²⁵Jükenüh nyimzawa tü alievü tsezhutewa nü Saküüwuowa nyiwa vü Karmel küzhi vü ru. Saküüwuowa nyiwa nüh nyimzawa ma vü kütseküngu vü ma nüh ma siepewa Gehazi vü, “Tulie, Shunamvühwa tü noluo tuwuovü;

²⁶ma mütu na küsa kenüh küsükeri vünüh zhüwa nü ma vü, noh tümhieveh tünüh? Noh vüpa tü mhieveh tünüh? Atsawa nga mhieveh tünüh?” ti küna. Nyimzawa nüh, “Mhiekhehveh,” ti rületsü.

²⁷Jüti sanü nyimzawa tü aküzhi vü Saküüwuowa nyiwa vü ru ünü ma jih küthuophohke. Thi Gehazi tü ru nü nyimzawa shohja nti ru. Thitü Saküüwuowa nyiwa nüh, “Ma mpa jüti küsam luo, küpakenühnyunü ma tü khielota müshemnomna küveh kenüh; thi VÜWAnüh hi vü müküza nüh hi vünüh küthimthuoh ünüh,” ti küza.

²⁸Thinü nyimzawa nüh, “Hi tü atsa nyimpari küsü kenüh khuoülo? HI mümramizhi tüm üti hi nüh müküza ülo?” ti küza.

²⁹Ma nüh Gehazi vü, “Noh küshih tseke nü eh rühkütsüh vi taji waluo. Mükütüküzü noh tü nyi küsüküsü nga mütuwie ketünga ma müküze tüm; thi nyi küsüküsü nga noh küze wie ketünga müsashele tüm; jüti sanü eh rühkütsühwa tü atsawa rügi vü saluo,” ti küza.

³⁰Jüti küsa vü atsawa zah nüh, “VÜWA thi noh nüh rhoküveh üta hinü noh küjawa nyu,” ti küza. Jükenüh ma tü sühra nü nyimzawa se nyitewa.

³¹Gehazi tü atüvü wa nü atsawa rügivü rühkütsühwa sa, thitü jikhi nyutü akürho thsoshi küsü nga müsa. Jükenüh ma tü mamütu nti sheleteru taji, “Atsawa tü müsühra lie,” ti küza.

³²Elishah tü azhehlovü turu ünü atsawa tü ma ze rügivü süzehküpehla ngura.

³³Jükenüh ma tü azheh lovü tu nü masü khethuoke taji VÜWA vü kükhuo sa.

³⁴Jüti sanü ma tü kuo nü atsawa rügivü zeh taji ma po vi ma po vü kütieke, ma notha vi ma notha vü kütieke; ma ke künyi vi ma ke künyirügivü küchuohke thi ma tü ma rügivü küchuohke ünü atsawa satsa tü zhe teru.

³⁵Thi ma tü te sühra nü küsükeri azheh lovü atüvü tseke le thi asevü tseke le ti sanü tse khru taji ma rügivü küchuoh le; thinü atsawa tü türü keri hathsih nü ma notha koteru.

³⁶Jüti küsa vü ma nüh Gehazi ji taji, “Shunamvüh hama ji luo,” ti küza. Jükenüh ma nüh ma ji. Thi nyimzawa nüh ma vü küru vü ma nüh, “Noh tsa küruoke luo,” ti küza.

³⁷Nyimzawa tü ru nü ma jih vü küluze taji azhih vü küngietsuo; jüti sanü nyimzawa tü ma tsa küruo nü alievü tewa.

³⁸Azhih jüla mükhuojih küveh vü Elishah tü Gilgal vü ru le. Setsaküthsüra tsari nüh ma tüvü shupehküveh vü ma nüh masiepewa vü, “Afüji kükeke nü setsaküthsüra tsari kenüh awihshuluo,” ti küza.

³⁹Mari nyi küsü tü awih te nti azhuh vü tsezhu tewa, thinü reza rhelivi ngura nü reza leh huo ma thüchi küpro lazhuhke nü viru, jümari tü mowa thuoh ünüh müthsüwiethuoh nüh rehkhuo nü aküfü lovü thse taji awihshu.

⁴⁰Jüti sanü masü tü anyi jümari küütsa nti küshoke. Thitü mari nüh awihwa tsa küveh vü mari tü zie taji, “O Saküüwuowa nyiwaküfü lovü aküsü pehveh,” ti zie. Thi mari tü jüma mütsara nüh sam.

⁴¹Thinü ma nüh, “Thinü ashie viraluo,” ti khuo. Thi ma nüh jüma küfü lovü vehjake taji, “Anyiri kütsana küsa kenüh jüma küshokeluo,” ti küza. Jüti küsa vü saküümsü aküfü lovü mütü nüh sa.

⁴²Nyi küsü Baal-shalisha vünüh ru nü, Saküüwuowa nyiwa kenüh aviküpe khuri lohse, khuozhikürümie tiehshu kütieh mükeke thi amütha kürüthe ma we lovü nüh, ti virutsü. Thi Elishah nüh, “Anyi hamari kütsaluo,” ti küza.

⁴³Thitü ma siepewa nüh, “Hi tü mokümjie hama vi nü anyi müzake tüvü sa üti lo?” ti küza. Thinü ma nüh shele, mari kütsana küsa kenüh jümari vi anyiri tsüluo, küpakenühnyunü VÜWA nüh hakümjie küzaveh, “Mari nüh tsa wie naveh thi suo tsatu wie naveh, ti küza,” üti küza.

⁴⁴Jükenüh ma nüh jüma vi mari tüvü sa. VÜWA zhü kümjie vünüh mari nüh tsanü suo tsatum.