Read Pochuri Naga 2 KAJIRI 5 Bible Online

2 KAJIRI 5 - Pochuri Naga bible

2 KAJIRI 5

¹ Naman, Siria kajiwa thopahiri sierhüwa tü ma küsosiewa sie nü anyiküji thi tso kümsie sheh, küpakenühnyunü ma vünüh VÜWA nüh Siria vü kükhrara tsü. Ma tü luoveh küzeri küsü, thitü hujirü pem.

²Siria tü mari nüh zhürüluo küprü vü Israelri azhih vünüh siepevüh küzah küsü sietewa, thi ma tü Naman vüvüh kühuo sa.

³Ma nüh ma küsosievühwa vü, “Eh vüwa tü Samaria vü küpeh setsaküthsüwa siepehvehthuoh üji! Ma nüh ma hujirü sakükurana nü,” ti küza.

⁴Jükenüh Naman tü tu taji ma Vüwa vü, “Hakümjie thi jata siepevühwa Israel vünüh küruwa nüh küzaveh,” ti küza.

⁵Thi Siria kajiwa nüh, “Khinyi waluo, hi nüh Israelri kajiwa vü rhüzhühle küsü küze naveh ünüh,” ti küza. Jükenüh ma tü rakasari ase türake suna anyie türo thi akhu thsümnyi türake ti vi nü tewa.

⁶Thi ma nüh rhüzhühlewa vü nü Israel kajiwa vü ru, jüma tü, “Rhüzhühle hama noh juthuoh üji noh nüh ma hujirü sakükutsü nati küsa kenüh eh siepewa Naman noh vü küzeveh ünüh ti küsathsüluo,” ta rhüsaveh.

⁷Jüti küsa vü Israel kajiwa nüh rhüzhühlewa chieno ünü ma tü ma thsümnyiri müzükhrih taji, “Hi tü Saküüwuowa nüh zothe nü sakürhole naveh nü anyi hamatü nyi küsü ma hujirü sakükutsüüti azhü hi vü küzeveh ülo? Ke müsheno wie, ma tü mokümjie hi sieküraluo nta phahveh ünüh,” ti sa.

⁸Thitü Israelri kajiwa nüh ma thsümnyi müzükhrihmthuoh ta Saküüwuowa anyiwa Elishah nüh küünara vü ma nüh kajiwa vü wuori küze taji, “Noh tü mokenüh noh thsümnyi müzükhrihmthuoh lo? Israel vü setsaküthsüri küsü pehveh ta küsa ma tü thsünaküsa kenüh khinyi ma tü hi vü küru luo,” ti küza.

⁹Jükenüh Naman tü ma rawuhri thi rawuhkhekari vi nü Elishah mükhievü tsie.

¹⁰Thi Elishah nüh ma vü zhühleküvüri küze taji, “Wa nü Jordan vünüh türü keri phrühm luo, jüta thuoüji noh sa tü salera naveh ünüh, thi noh tü mütsera naveh ünüh,” ti küza.

¹¹Thitü Naman tü arüshu nü tewa taji, “Halie, hi nüh kümshe thuoüji ma tü hi vü shuhrutsa wie taji tsie nü VÜWA ma Saküüwuowa nyo ji, thi ma ke vi athsopo nyiehvü müzhe nü hujirüwa sakükutsü na tünti sa.

¹²Damaska vü arühgu Abana thi Fharpar masü tü Israel vü ajuh aveh nyiehvü küümpha nyu ülo? Jümasü vünüh hi tü phrühm nü mümtsera ülo?” ti küza. Jükenüh ma tü sühle nü aheküze vünüh tewa.

¹³Thitü ma siepewa tü ma shehnyiru nü ma vü, “Eh pa, mükütüküzü setsaküthsüwa nüh zanyo küji küsa kenüh azhütsüveh üji nohtü jüma müsanüh sanaveh ülo? Jükenüh ma nüh küüza kümjiephrühm nü mütseküm küzakelenga müsara nüh sam lo?” ti küza.

¹⁴Jükenüh ma tü Saküüwuowa nyiwa zhü müzhe taji tsuo nü türükeri ma mpa nüh Jordan lovü tunüte; thinü ma sa tü atsakütazüra sa kümjie salera nü ma tü mütsera.

¹⁵Jüti küsa vü ma tü, ma thi ma riehkhuo aveh Saküüwuowa nyiwa vü sheleru nü ma tüvü tsie taji ma nü, “Halie, Israel vü küchie nüh azhih aveh vü Saküüwuowa münyie ta küsa hi nüh thsüvehthuoh; jükenüh khinyi thuoüji noh siepewa vünüh kütsüsuo vi nyinü,” ti küza.

¹⁶Thitü ma nüh, “VÜWA, hi nüh akütsü sakütsewa rhoküveh kümjie hi tü zanyo küsü nga küviwa nyu,” ti küza. Thinü ma nüh vi üti ma khri, thitü ma nüh kürüm.

¹⁷Jüti küsa vü Naman nüh, “Nyu thuoüji, hi nüh noh vü khuoveh, tinü noh siepewa vü azhih rawuh khuo künyi vi noh siepewa tsükümsaluo; küpakenühnyunü nosü vünüh tuvü noh siepewa tü Saküüwuowa vü küchie nüh nyiaza küsü vü nga kütso kükhurü nyutü küsahthuo müsanüh sanathuoh.

¹⁸Zhühnyo hama vünüh thuoüji VÜWA nüh noh siepewa noküja satsüluo: Eh küsosiewa nüh eh pie vü rüngake nü Rimon zheh lovü hitü küngie kütsuo vü hama vünüh VÜWA nüh noh siepewa nojatsüluo,” ti küza.

¹⁹Ma nüh ma vü, “Luoveh kürüzih ti waluo,” ti küza. Thitü Naman tü ma vünüh pike tseketewa ünü,

²⁰Gehazi, Elishah siepe Saküüwuowa nyiwa nüh, “Noluo, eh küsosiewa tü Naman Siriawa ma ke vü viküru müvi nüh ma viküshelem. VÜWAnüh rhoküveh üta hi nüh ma sevü zhüwa nü ma vünüh zanyoküsü vi naveh,” ti küza.

²¹Jükenüh Gehazi tü Naman senyitewa. Thi Naman tü wuori ma sevü zhükütse ngu ünü ma tü ma mütu nti rawuhkheka vünüh terutaji, “Zanyo aveh nga mhieveh tünüh?” ti küna.

²²Thinü ma nüh, aveh nga mhieveh, eh küsosiewa nüh, “Efraim küzhiho anyu vünüh viza künyi setsaküthsüri atsa khintü nüh ru; hi nüh khuoveh, tinü rakasa akre küche thi akhu thsümnyi künyi ti masü tsüluo, a küzaveh lie,” ti küza.

²³Jüti küsa vü Naman nüh, “Lozhe nü rakasa akre anyie türo vi luo,” ti küza. Ma nüh ma khri taji rakasa atier türo chükhu künyivünüh tiehtsü, thi akhu thsümnyi nga künyi tsü, ti sanü masiepe künyi rügivü satsü nü masü nüh Gehazi tüvü nüh jümari vü.

²⁴Thi ma tü küzhiho vü ru ünü, ma nüh masü ake vünüh jümari vitaji azheh lovü sam nü masü küzem, thi masü tü tsetewa.

²⁵Ma tü tu nü ma küsosiewa tüvü tsie, thinü Elishah nüh mavü, “Gehazi, noh tü khievü watse lo?” ti küna. Jüti küüna vü ma nüh, “Noh siepewa tü khievüma wa,” ti rületsü.

²⁶Thitü ma nüh ma vü, “Anyiwa nüh noh mütu nta ma rawuh khekavünüh sühleküru vü hi tü asietse vünüh noh vü nyi müwa ülo? Atsotho jüma tü ame, thsümnyiri, Olive zhuhri, rhelivizhuhri, anyihzhü, shüvotsa, asiepepari thi asiepevühri küvi tsotho ülo?

²⁷Jükenüh Naman hujirü tü noh vü thi noh küthsoküzhi vü ti küsuokürho küpekem nathuoh,” ti küza. Jüti küsa vü ma tü matüvü nüh hujirü watü amüra kümjie müjicha nü shutewa.