Read Pochuri Naga 2 KAJIRI 6 Bible Online

2 KAJIRI 6 - Pochuri Naga bible

2 KAJIRI 6

¹Jütsothovü setsaküthsüra tsari nüh Elishah vü, “Noluo, noh zhüvü nüh hiri nüh rho küveh azhiewa tü hiri kenüh zah shemthuoh.

²Hiri Jordan vü küze nü hiri athsoh küsüsü viküru nü azhieküsü hiri kenüh sanü jüla kürholuo,” ti küza. Thinü ma nüh, “Waluo,” ti küza.

³Jüti küüza vü mari nyi küsü nüh, “Noh lo mükhu tü noh siepewavü nyiküwa saluo,” ti küza. Thinü ma nüh, “Hi tü wa naveh,” ti rületsü.

⁴Jükenüh ma tü mari vü nyiwa. Thi mari tü Jordan vü ru ünü athsohri shüchieh.

⁵Thitü nyi küsü tü athsoh shüchiehveh ünü ma müvü tü ajuhlovü küzhoke tetu nü ma tü zie taji, “Ehzah, eh küsosiewa! Jümatü küvite nü,” ti küza.

⁶Saküüwuowa nyiwa nüh, “Khiela küzhoke tetu lo?” ti küna. Ma nüh ma vü azhiewa küjo küütsavü, ma nüh atsuona küsü jeshi nü jüla jake taji amüvüwa tü saküürhu.

⁷Thi ma nüh, “Khuh vi luo,” ti küza. Jükenüh ma nüh ma ke thsuowanü jüma khuh vi.

⁸Küsükeri Siria kajiwa nüh Israel sie nü arie saküveh vü, ma nüh ma sieperi sie zaluo taji, “Jükümjie küsa vü thi azhie hakümjie küsa vü eh kürünape sanaveh,” ti küza.

⁹Thitü Saküüwuowa nyiwa nüh Israelri kajiwa vü azhü küzetaji, “Azhie hama rukari küwawa nyu ti küsa azhüzhüluo, küpakenühnyunü Siriari tü jüvü tsetsuo na saküveh kenüh,” ti küza.

¹⁰Thi Israelri kajiwa nüh Saküüwuowa nyiwa nüh ma vü küüza azhiewavü wuori küze. Hakümjie vünüh ma nüh ma vü hamna tsü nü matü küsükeri nyutü künyikeri nyiehvü ma mpa nüh ma külolera.

¹¹Thi zanyo hama kenüh Siria kajiwa müshe tü sühro ji shehküm sanü ma nüh ma sieperi ji taji mari vü, “Hiri thawa nü Israelri kajiwa kenüh ünüh noh tü hi vü thama kütsa ülo?” ti küna.

¹²Thinü ma sieperi küsü nüh, “Nyi küsü nga nyu, eh vüwa, O kajiwa; thitü Elishah, Israel vü küpeh setsaküthsüwa nüh noh nüh noh zeku vünüh küüza zhüri vi Israelri kajiwa vü küzazati,” ti küza.

¹³Thi ma nüh, “Hi nüh wuori küze nü ma revi na küsa kenüh makhiela pehveh ünüh wa taji noluo,” ti küza. Jüti küsa vü wuori nüh, “Halie, ma nü Dothan vü pehveh,” ti küza.

¹⁴Jükenüh ma nüh jüla rawuhri, rawuhkhekari thi thopahiri hozakeküze; thi mari tü arüza vü ru nü anyujiwa mükieshe.

¹⁵Saküüwuowa nyiwa siepewa tü rüne kümto sühra nü alievü wa ünü, halie, thopahiri küsü tü rawuhri sie thi rawuhkhekari vi tisanü anyujiwa mükiesheküm ngu. Jüti küsa vü siepewa nüh, “Ehzah, eh küsosiewa! Hisü tü moti sanathuoh lo?” ti sa.

¹⁶Ma nüh, “Mükrütüm luo; küpakenühnyunü hisü siekütseri tümari siekütseri nyieh vünüh zhiküveh kenüh,” ti küza.

¹⁷Jüti küzam nü Elishah tü kükhuo sataji, “O VÜWA, hi nüh noh vü khuoveh, tinü ma tü küüngu na küsa kenüh ma notha saphietsüluo,” ti küza. Jükenüh VÜWA nüh vizawa notha tü saphietsü nü ma tü küüngu; thi halie, aküzhi tü anyih küvi rawuhri thi rawuhkhekari nüh Elishah mükieshe nü pro küveh ngu.

¹⁸Siriari tü ma sie saluo nü turu ünü Elishah tü VÜWA vü kükhuo sataji, “Hi nüh noh vü khuoveh, tinü, notha küüju vi anyi hamari kürhie luo,” ti khuo. Jükenüh Elishah nüh kükhuo müzhe nü ma nüh nothaküüju vi mari kürhietsü.

¹⁹Elishah nüh mari vü, “Hamatü lehkhuji nyu, thi hamatü anyujiwa nyu; eh senyi luo, hi nüh nohri sie nü noh nüh phahküveh anyiwa vüwa naveh ünüh,” ti küza. Thi ma nüh mari sie nü Samaria vü tewa.

²⁰Mari tü Samaria kejura ünü Elishah nüh, “O VÜWA, mari küüngu na küsa kenüh anyi hamari notha saphietsüluo,” ti khuo. JükenühVÜWA nüh mari notha saphietsü, thinü mari tü ngura, thi halie, mari tü Samaria azhila vü pehla.

²¹Israelri kajiwa nüh mari küngu vü ma nüh Elishah vü, “Eh pa, hitü mari rehthe üti ülo? Hi tü mari rehthe üti ülo?” ti küna.

²²Ma nüh, “Noh mari mürehthera. Noh tü noh rekütseri noh nyuchuwa thi thumkavüh nüh zothe nti ülo? Mari tü tsa thi zhu ti sanü mari küsosiewa vü tewa na küsa kenüh alohse thi ajuh vi mari tüvü satüluo,” ti küza.

²³Jükenüh ma nüh makeri’a nüh kütsazhu küji küsü küche; thi mari nüh tsa thi zhuküm sevü ma nüh mari küzem, jüti sanü mari tümari küsosiewa vü tewa. Thi Samaria tü zhürüluo küprümüsawiethuoh nüh Israel azhih vü teru.

²⁴Jüsevü Siria kajiwa Benhadad tü ma thopahiri küpeh aveh jizhuh nü khru taji Samaria zhe.

²⁵Mari nüh jüma küzhe vü Samaria tü müküüzara kümkhuojih sa, rawuh küsü alü vü rakasa zerake thi mükhrietü asü küüjeh müzakünyi vü rakasa münga ti müjie küju nü mari zhe peh.

²⁶Jüti küsa vü Israelri kajiwa tü aziewa rügivü kuotsewa ünü nyimzari küsü tü ma vü zie taji, “Kükratsüluo, eh vüwa, O kajiwa,” ti khuo.

²⁷Thi ma nüh, “Mükütüküzü VÜWA nüh noh mükükra thuoüji khiela nüh hi nüh noh kükra na lo? Amütha küfepe vünüh nyutü rhelivijuh kütsüzhupe vünüh ülo?” ti küza.

²⁸Jüti küüza vü kajiwa nüh nyimzawa vü, “Noh küsüro tü mowalo?” ti küna. Nyimzawa nüh, “Nyimza hama nüh hi vü, ‘Nosü hisü noh tsa tsala na küsa kenüh noh tsa tsanaveh ünüh,’ ta küza lie.

²⁹Jükenüh hisü tü eh tsa shu nü tsam. Thi rülo künyiawa hi nüh ma vü, Hisü noh tsa tsana küsa kenüh ma nüh ma tsa küthimlie,” ti rületsü.

³⁰Nyimzawa zhüri kajiwa nüh küünara vü ma tü ma thsümnyi müzükhrihm, jüti küsa vü ma tü aziewa rügivü kuotsewa, thi anyiri nüh noküze, thinü halie, akükhu vü ma satsa nyiehvü anyirü vüveh,

³¹ma nüh, “Saküüwuowa nüh hi vü jüti sa kütsüwa saluo, thi jüma nyiehvü nga sakütsüwa saluo, mükütüküzü Shafat atsa Elishah lü tü nosü küju ma safü rügivü pepeh huoveh üji,” ti küza.

³²Jüti küsa tsotho vü Elishah tü ma zheh vü shupehveh, thi kükhruori tü ma vü nyi pehveh. Jüti küsa vü kajiwa tü ma tü vünüh nyi küsü küze; thitü zhühleküvüwa müjie teruküju tü vünüh Elishah nüh kükhruori vü, “Anyi küfethewa hama tü mokümjie eh lüzahthuo üta küze nüh nohri tü nguveh ülo? Noluo, zhühleküvüwa ru thuoüji amükhie khehm luo, thi ma vünüh amükhiewa küchie phohke luo. Ma sevü, jütü ma küsosiewa kütseajüzhe khi nyu ülo?” ti küza.

³³Ma nüh jüüta mari sie jühle küveh vü kajiwa tü ma vü turu taji, “Küsüro hamatü VÜWA vünüh! Ma kenüh hi tü VÜWA huopehwie naveh ülo?” ti küza.