Read Pochuri Naga 1 KÜSHUKÜRAZHÜKU 10 Bible Online

1 KÜSHUKÜRAZHÜKU 10 - Pochuri Naga bible

1 KÜSHUKÜRAZHÜKU 10

¹Hama tsothovü Filistinri tü Israel siesaluo; thi Israel nyiri tü Filistinri tüvü nüh te nü Gilboa küzhi vünüh mari sühthem.

²Thi Filistinri nüh Saul thi ma tsari ase phara nü Filistinri nüh Saul atsa Jonathan, Abinadab, thi Malkhishua rehthem.

³Ariewa tü Saul vü müzho shehtewa nü lawih küviri nüh ma ngu taji lawih küviri nüh ma kaküvüm.

⁴Jüti küsa vü Saul nüh ma rietsokrü küvüwa vü, “Ahu mkütsi hamari nüh ru nü hi vi samküzhie nüh sana küsa kenüh noh nyuchuwa shozhu nü hi shüthem luo,” ti küza. Thitü ma rietsokrüküvüwa nüh müsa nti sa; küpakenühnyunü ma tü krü sheh kümkenüh. Jükenüh Saul tü ma nyuchuwa shozhu nü jüma rügi vünüh ma mpa ma nyethem.

⁵Thi ma rietsokrü küvüwa tü Saul süküm ngu ünü ma nga ma nyuchuwa rügi vünüh ma mpa khrothem.

⁶Hakümjie vünüh Saul, ma tsa küche thi ma zhehlo aveh ti kürüsüm.

⁷Israel nyiri anyuo vü küpehri aveh nüh thopahiri küte ngu, Saul thi ma tsari süküm ngu ti sanü mari nyujiri therajam taji tewa, jüti küsa vü Filistinri tü ru nü jümari vü kürho satewa.

⁸Rülo künyiawa Filistinri tü rehthekümra zhi müzhüh vi nta ru ünü Saul thi ma tsari Gilboa küzhi vü rehthe küsala ngu.

⁹Mari nüh ma zhiri müzhühvi, ma lü thuovi thi ma rietsokrüri vi ti sanü zhühleküvüri Filistinri azhih vü mari nyiazari thi anyiri vü zhühle küvüri küze.

¹⁰Jüti küsa vü mari nüh ma rietsokrü vi nü mari nyiazari kükhurüzheh lovü thsem, thi ma lü vi Dagon kükhurüzheh lovü tie sa.

¹¹Thitü Jabesh, Gilead aveh nüh Filistinri nüh Saul vü küsa aveh küünara vü,

¹²luoveh küzeri aveh sühra nü Saul kümo thi ma tsari kümo kha nü Jabesh vü ru. Thi anguzhe kükhu vünüh mari rüri chohwum nü rülo türü assa sa.

¹³Jükümjie vünüh Saul tü ma mükünyitsa zhütsa kenüh VÜWA nüh azhükütsü mümzhe nüh sam, jümpa mükünyu ma nüh tüshitüma siezaluo nü lehkhuji küüjo phah,

¹⁴thi VÜWA nüh lehkhuji küüjo thuoüji mphah nüh sa. JükenühVÜWA nüh ma rehthem nü kajipewa tü khaphrüle Jesse atsa David vü tsüm.