Read Pochuri Naga 1 KÜSHUKÜRAZHÜKU 11 Bible Online

1 KÜSHUKÜRAZHÜKU 11 - Pochuri Naga bible

1 KÜSHUKÜRAZHÜKU 11

¹Jüti küsa vü Israel aveh Hebron vünüh David vü sezhuh khe taji, “Halie, hiri tü noh rü thi noh sa.

²Tsotho teküwa vü Saul nüh kaji sa wie ketünga noh nüh hiri siezhunü Israel sieküruwa tü noh; thi VÜWA noh Saküüwuowa nüh nohvü, ‘Noh nüh eh nyi Israel huo naveh, thi noh nüh eh nyiri Israel nyiehvü kaji sanaveh,’ ta küza saveh,” ti küza.

³Jükenüh Israel kükhruori aveh tü kajiwa Hebron vü ru; thi David nüh Hebron vünüh mari sie VÜWA tüvü nüh kütsathuozhü sanü David thse taji VÜWA zhü Samuel vünüh küüzawa müzhe nü ma vi Israel nyiehvü kaji küsa.

⁴David thi Israel aveh tü Jerusalem, jüma tü Jebusri nüh azhih jüla kürhope Jebus vü wa.

⁵Jebus vü kürhieri nüh David vü, “Noh tü hala küturu wa nyu,” ti küza. Jüta wie ketünga David nüh Zion jüma tü David nyuji kümzhowa vitewa.

⁶David nüh, “Thari nüh Jebusri fethe khu naveh ünüh levü thi sierhüwa küsanaveh,” ti küza. Jüti küüza vü Zeruia atsa Joab nüh apokhu sanü khru, thi ma nüh levü satera.

⁷Jüti sanü David tü shiehku kümzhowa lovü kürho sa; jükenüh jüma tü David nyujiwa ta ji.

⁸Thi ma nüh anyujiwa tü Millo vünüh sa mükiele ju; thi Joab nüh nyuji küpari küthe kheh.

⁹Thi David tü küjiküji tewa, küpakenühnyunü VÜWA nüh masie kütse kenüh.

¹⁰Hamari tü levüri David anyi kümzho ma kajipe vü ma kürüzo müzhonü Israel aveh kürü taji Israel kenüh VÜWA zhü müzhe nü ma kaji küsa.

¹¹Hamatü David nyiri kükhra küürüh küsü: Hakmonri Jashobeam, küche azhievü levü sa; ma nüh küsükeri vünüh ma vi vikewietaji anyi müza küche siesaluo nü zothem.

¹²Mari küche azhievü akükhra ma sewa thuoüji Ahowa Dodo atsa Eleazar.

¹³Filistinri nüh arie kenüh sezhuh küveh vü ma tü Pasdamim vü David vü nyi pehveh. Azhie jüla tü ape küsü vü khuozhikürümie khielota pehveh, thi anyiri tü Filistinri vünüh zhütewara.

¹⁴Thitü ma tü ape jüla azhievü ma kütsiepe sanü münyite nü ma nüh Filistinri rehthe khehm; jüti sanü kükhrara küji vünühVÜWA nüh mari külole.

¹⁵Filistinra thopahiri nüh Refaim anyuo vü kürünape sanü pehküveh vü levü nyiri cherakera nyi küche tü Adulam lopielokrüwa vü David vü tsuo.

¹⁶Jüti sanü David tü anyukümzhowa lovü pehtewa; thi Filistinri anyu rieh huori tü jüti küsa vü Bethlehem vü pehveh.

¹⁷Thinü David nüh, “O wuori nüh Bethlehem juhkhre akheri kütuohvü pehküvehwa vünüh ajuh viru hi tsü nü küüzhu ngü chiekele,” ti luozhe.

¹⁸Jüti küüza vü akükhra nyi kücheri tü Filistinra kürünape zokhuotu nü akheri kütuohvü pehküveh Bethlehem juhkhrewa vünüh ajuh tie nü vi David vü ru. Thitü David tü jüma müzhu nti sa; ma nü jüma VÜWA vü küshokem tü taji,

¹⁹“Hi tü Saküüwuowa tüvü nüh hama sana küsa hi vünüh kükiehtuom luo. Hi tü anyi hamara kürho züh zhu naveh ülo? Küpakenühnyunü mari kürho thse nü mari nüh jüma viküru kenüh,” ti küza. Jükenüh ma tü jüma küzhuwa nyu. Zanyo hamari tü akükhra nyi kücheri nüh küsa wie.

²⁰Jüti küsa vü Joab anü Abishai nüh cherakeri vü levü saveh. Thi ma nüh ma vi vikewie taji anyiri müza küche siesaluo nü mari rehthem taji mari küche nyiehvü nüh anyo küchara sa.

²¹Ma tü cherakeri vü küthora tsawa sanü mari sierhüwa sa; thitü matü mari kücheri müju wie.

²²Jüti küsa vü Jehoiada atsa Benaia tü Kabzel anyi luoveh küzeküsü, aküji küürohri küsa küsü; ma tü samwa kümjie küsa Moabri künyi fethe. Amüra tsa küveh rülo vü ma tü tsuo nü alokhu lovü nüh amiewuowa küsü nga rehthe.

²³Thi ma nüh Egyptri nga akru küji kümsie küsü rehthe, ma krukümsie apie künyi küüluoh. Egyptwa tü ma ke vü avi kükahjüküsü kha; thitü Benaia tü rühkütsüh küsü vi nü ma vü tsuo Egyptwa ke vünüh aviwa prü taji ma vi nü ma shüthem.

²⁴Zanyo hamari tü Jehoiada atsa Benaia nüh sa kheh nü akükhra nyikücheri nyiehvü nüh anyo vira.

²⁵Ma tü cherakeri azhievü kütholah sa, thitü ma tü mari kücheri müju wie. Thi David nüh ma vi nü ma kühuotewa nyiehvü sa.

²⁶Nyihlari kümzho nyiri tü Joab anü Asahel, Bethlehem wa Dodo atsa Elhanam,

²⁷Harod wa Shamot, Pelon wa Helez,

²⁸Tekoa wa Ikesh atsa Ira, Anathoth wa Abiezer,

²⁹Hushatwa Sibekai, Ahowa Ilai,

³⁰Netofa wa Maharai, Netofa wa Bana atsa Heled,

³¹Benjamin akuoh Gibeah wa Ribai atsa Ithai, Pirathon wa Benaia,

³²Gash kutso kütuoh vü kürhowa Hurai, Arbat wa Abiel,

³³Baharumwa Azmaveht, Shalbon wa Eliaba,

³⁴Gizon wa Hashem, Hararwa Shage atsa Jonathan,

³⁵Hararwa Sakhar atsa Ahiam, Ur atsa Elifal,

³⁶Mekheratwa Hefer, Pelon wa Ahija,

³⁷Karmel wa Hezro, Ezbai atsa Narai,

³⁸Nathan anü Joel, Hagri atsa Mikhar,

³⁹Amon wa Zelek, Berotwa Maharai, Zeruia atsa Joab rietsokrü küvüwa,

⁴⁰Itriwa Ira, Itriwa Gareb,

⁴¹Hitwa Uriah, Alai atsa Zabad,

⁴²Reuben kuohwa Shiza atsa Adina, ma tü Reubenri kuoh vü nyi cherake sie nü sierhü küsa küsü.

⁴³Maka atsa Hanan, Mitwa Joshafat,

⁴⁴Ashterat wa Uzzi, Aroer wa Hotham atsa Shama thi Jeiel,

⁴⁵Shimri atsa Jediael, thi ma nü Joha, Tizwa,

⁴⁶Mahav wa Eliel, thi Elnam atsa Jeribai thi Joshavia, thi Moab wa Itma,

⁴⁷Eliel thi Obed, thi Jasiel Mezob wa.