Read Pochuri Naga 1 KÜSHUKÜRAZHÜKU 16 Bible Online

1 KÜSHUKÜRAZHÜKU 16 - Pochuri Naga bible

1 KÜSHUKÜRAZHÜKU 16

¹Mari nüh kütsathuozhü küthseku tü kha nü David nüh juhthsüzheh khakeküsawa lovü turu taji mari nüh kütso kükhurü thi kütsathuo kükhurü Saküüwuowa tüvü tsü.

²Thi David nüh kütso kükhurü thi kütsathuo kükhurü jukümsevü ma nüh VÜWA nyo vünüh tsia nyiri tsü.

³Jüti sanü Israel aveh vü, krevükrepa aveh vü müsaküveh lohse, asa suope küsü, thi rheliviju tieshu küsüsü ti tsü kheh.

⁴Jüma nyiehvü nga ma nüh Leviri wuori VÜWA kütsathuozhü küthseku tü vünüh Israel Saküüwuowa vü khuo na küsa, kümna tsüna küsa, thiVÜWA siake na küsa kenüh chieke.

⁵Asaf nüh lehvüwa, thi ma sevü künyiawa thuoüji Zekharia, Jeiel, Shemiramot, Jehiel, Matithia, Eliab, Benaia, Obededom, thi Jeiel, hamari nüh atakhuri thi topitori khu naveh; Asaf nüh küüchirü khuriakhi kükhu naveh,

⁶Benaia thi Jahaziel navü künyi nüh Saküüwuowa kütsathuozhü küthsekutüvü mükütuo nüh atütüri khu naveh.

⁷Jüma rülo vü David nüh Asaf thi ma jienüri nüh kümnakütsüzah VÜWA vü sakütsü na küsa kenüh küchieke pokhu sa.

⁸VÜWA vü kümna tsüluo, ma nyo ji luo, ma küürohri anyiri azavü küüthsüluo!

⁹Ma vü azah satsüluo, ma vü küsiake zah satsüluo, ma küngo küürohri aveh küza luo!

¹⁰Ma nyo kümtse vü kütholathovü; thari nüh VÜWA phahveh ünüh jümara luoveh tü nyierakhruo luo!

¹¹VÜWA thi ma kükhra phah luo, mükütuotü ma küpeh phah luo!

¹²Ma nüh küngo küüroh küsari müsheke luo, aküngori ma nüh küsa ma nüh ashih küphrazhuri,

¹³O ma siepewa Abraham tsatoriwa, Jacob atsari, ma nüh kürükari!

¹⁴Ma tü VÜWA hiri Saküüwuowa; ma shih thuoüji azhih aveh vü pehveh.

¹⁵Ma nü küsuokürho ma kütsathuozhüwa müshe peh, ma nüh azhütsüküsa zhüri, awuhleri anyie küsü kenüh,

¹⁶ma nüh Abraham sie kütsathuozhü küsa, ma nüh Isaac vü phrahteke nü küüshie,

¹⁷ jüma tü ma nüh Jacob vünüh zhühkhe üta sakümzhora, Israel kenüh küsuokürho kütsathuozhü küsü,

¹⁸Ma nüh, hi nüh noh vü Kanan zhih tsü naveh, noh suope aka küsü kümjie, ti küza.

¹⁹Mari nyito küzüla vü, pike mpa küürüh vü, thi jüla aküpriri,

²⁰Kuohji küsü vünüh kuohji küsü vü tsekütsevü, kajipe küsü vünüh anyiri küpa vü,

²¹ma nüh nyi küsü nga mari kümrü müküsa; makeri’a nüh ma nüh kajiri phra,

²²ma nüh, “Hi nüh thsekümri müpa tümluo eh setsaküthsüri vü sa mükü mnomna tüm,” ti küza.

²³VÜWA vü azah satsüluo, azhih aveh! Rülo küsü vünüh rülo küsü ma küülolewa küza luo.

²⁴Akuohjiri azhievü ma küthola zhüchüh luo, nyiri aveh azhievü ma küükrükükra küürohri,

²⁵küpakenühnyunü aküji tü VÜWA, thi aküji sheh vünüh küsiakeleh, thi ma tü nyiaza aveh nyiehvü küükhe vünüh künoleh,

²⁶küpakenühnyunü anyira nyiaza aveh tü anguo kheh wie; thitü VÜWA nüh atülüri sa.

²⁷Küsiake siakhri thi kükhrakümzho tü ma tüvü pehveh; kükhra thi loküzhe tü ma pe vü pehveh.

²⁸VÜWA vü kütuohtsüluo, O anyira tharuori, VÜWA vü kütholathovü thi kükhra kütuohtsüluo!

²⁹VÜWA kütholathovü ma nyo vü kütuohtsüluo; kükhurü küsü viru luo, thi ma tüvü raluo! Kümtse kükeke vü nü VÜWA khurü luo;

³⁰ma tüvü khekheti saluo, azhih aveh, ah, azhihwa tü tsie müzhoveh, piketü müküngahra wie.

³¹Atülüri alowie luo, thi azhih tü nyiehraküükhruo luo, thi akuoküjiri azhievü mari tü, VÜWA tü kükaji saveh, ti küza luo.

³²Juhküji, thi jüma saküüprori aveh tü küüshükhu luo, azhuh, thi jüla küpehri aveh tü küürietsie luo!

³³Jüta thuoüji aküze thsohri tü loküzhe kenüh azah sanaveh VÜWA tüvü, küpakenühnyunü ma tü azhihwa ashih sa nta kütse kenüh.

³⁴O VÜWA vü kümna tsüluo, ma tü mhieküm kenüh; ma mükükhaphrükhale küümze tü küsuokürho küzhikeveh!

³⁵hiri vizhutsüluo, O hiri küülole Saküüwuowa, akuoküjiri azhie vünüh hiri vizhuh thi külole luo, jüta thuoüji noh nyo kümtsewa vü hiri tü kümna tsüra naveh ünüh, thi noh küsiake vü küthola tsüra naveh ünüh.

³⁶VÜWA tü kütsia küvüwa saluo, Israel Saküüwuowa, küsuokürho vünüh küsuokürho küju, ti nga küza luo. Jüti küsa vü nyiri aveh nüh “Amen” ti sanü VÜWA siake.

³⁷Jüti sanü rülo küsü nüh rülo küsü müsaji mükümhie. Kütsathuozhü küthseku tüvü mükütuo nüh anasa sana küsa kenüh David nüh Asaf thi ma jienüri VÜWA kütsathuozhü küthseku tüvü küpeh,

³⁸jüsevü nga Obededom thi ma jienü rorake nü tüzeri nga jüla küpeh Jeduthun atsa Obededom, thi Hosa masü thuoüji kherikühuo küsanti küpeh.

³⁹Ma nüh navüwa Zadok thi ma jienü navüri vi nü Gibeon vü azhiekümsie VÜWA juhthsü-kükhurüzheh tüvü küpeh,

⁴⁰VÜWA Khonyo vü rhüküsa müzhe nü ma nüh Israel vü azhükütsü üta mükütuo nüh arüne thi münüleh kürüzhu kütso kükhurüpe rügi vünüh kütso kükhurü tsü na küsa kenüh.

⁴¹VÜWA vü kümna tsü naküsa kenüh Heman, Jeduthun rükaküsari thi anyo küchiezhuri ti mari vü thsephre, küpakenühnyunü ma mükükhaphrükhale küümze küsuokürho küzhike küveh kenüh.

⁴²Haman thi Jeduthun masü tü azah kenüh atütüri thi küüchirü khuvi, thi kümtse zah kenüh atakhuri vi, ti sa. Jeduthun atsari thuoüji akheri vü chieke.

⁴³Jüti sanü anyiri aveh tü papa zheh vü tewa, thi David nga mazhehlori tsiatsü nti ma zheh vü tewa.