Read Pochuri Naga 1 KÜSHUKÜRAZHÜKU 20 Bible Online

1 KÜSHUKÜRAZHÜKU 20 - Pochuri Naga bible

1 KÜSHUKÜRAZHÜKU 20

¹Mahvi jümawa thsehthe vü, kajiwa nüh arie vü wawati küsa tsothovü Joab nüh thopahiri siezhuwa nü Amonra nyu sachakem tü taji Rabbah wu. Thitü David thuoüji Jerusalem vü peh. Thi Joab nüh Rabbah prü nü feriejamtü.

²David nüh mari kajiwa kajilüwe ma lü rügi vünüh vi ünü jümawa tü suna küüto cherake nü müzü küzho thi amekükhra loh küsü tüla; thi jüma vi nü David lü rügivü thse. Ma nüh anyujiwa vünüh zanyo zheküvira khielohti viru.

³Jüti sanü ma nüh jüla küpeh nyiri siezhuru nü mari vithsohkürhovüh, akathiri thi amüvüri vi taji mari küüroh; hakümjie vünüh David nüh Amonri nyuji aveh vü sa. Jüsevü David thi anyiri aveh tü Jerusalem vü shele teru.

⁴Ham sevü Gezer vünüh Filistinri vü arie shuteru; jüti küsa vü Hushatwa Sibekai nüh Sipai rehthem, ma tü küraji rasuori küthsoküzhiri küsü; thi Filistinri tü saküsajim tü.

⁵Jüvü Filistinri sie arie sa le nü Jair atsa Elhanan nüh Gitwa Goliath anü Lami rehthem, ma vikuoh tü atakha rike.

⁶Jüsevü nga Gat vünüh arie sa lehü, jülatü anyi kürajirasuo küsü peh, ma tü ake awuowuo vü tüjü türoro pe, thi ampha awuowuo vü tüjü türoro pe, küürühji mükeke nü müzü pe, manga kürajirasuori vü atharuori.

⁷Thi ma nüh Israel vü Shimea atsa Jonathan, David anü nüh ma rehthe.

⁸Hamari tü Gat vü kürajirasuori vünüh küturu; thi mari tü David thi ma sieperi ake vünüh külum.