Read Pochuri Naga 1 KÜSHUKÜRAZHÜKU 21 Bible Online

1 KÜSHUKÜRAZHÜKU 21 - Pochuri Naga bible

1 KÜSHUKÜRAZHÜKU 21

¹Saküüwuowa nüh David küchü nü Israel küürüh nti sa.

²Jükenüh Joab thi thopahiri sierhüri vü, “Wa nü Beersheba vünüh Dan küju Israel kürüh taji hi nüh mari nyito thsü na küsa kenüh azhühkewa hi vü viru luo,” ti küza.

³Thitü Joab nüh, “VÜWA nüh ma nyiri vü mari zake küzhi müzakeringa thsephrekütsüwa saluo! Mari tü eh vüwa kajiwa nyu ülo, mari aveh tü eh vüwa sieperi ülo? Thinü mokenüh eh vüwa tü hama müsaji mümhie lo? Mokenüh ma tü Israel rügivü müküleh vitselo?” ti küza.

⁴Thitü kajiwa zhü tü Joab nyiehvü tewa. Jükenüh Joab tü tsezhutewa nü Israel aveh vü wa taji Jerusalem vü shele teru.

⁵Jüti sanü Joab nüh anyiri küürüh küürüjiwa vi nü David tsü. Israel aveh küürühji, anyuchuwa küvi anyiri 1,100,000, thi Judah vünüh 470,000 anyuchuwa küviri.

⁶Thitü ma tü küürüh vü Levi thi Benjamin thuoüji müchieke, küpakenühnyunü kajiwa nüh azhükütsü thuoüji Joab tü küürüh vü rükümkenüh.

⁷Thitü azanyo hamavü Saküüwuowa tü mülozhe nüh saküm kenüh ma nüh Israel kürhie.

⁸Thinü David nüh Saküüwuowa vü, “Hi nüh jüma sakümwa vü hitü khiemuo shehmthuoh, noh siepewa künakhie vijamtüluo; küpakenühnyunü hi nüh zhe sheh nü jüma sakümthuoh kenüh,” ti küza.

⁹Thinü VÜWA nüh David setsazhüküphrawa Gad vü,

¹⁰“David vü wa nü, ‘VÜWA nüh hakümjie küzaveh, Hi nüh zanyoküche noh tsüveh; tinü hi nüh noh vü satsü na küsa kenüh jümari küsü rüka luo,’ ti küza üti,” küza.

¹¹Jükenüh Gad tü David tüvü ru nü ma vü, “VÜWA nüh hakümjie küzaveh, ‘Khiemawa noh müshe nüh vi luo:

¹²mahvi küche kümkhuojih ünü; nyutü noh küümaküshiri nüh asaküche zoriekhem nü noh mükünongüra anyuchuwa nüh noh zheruküphasa nyinü; nyutü VÜWA nyuchuwa nüh mahvi küche Sahna kükho azhihwa vü tsü nü VÜWA zhühlewa nüh Israel natonahuori aveh küüzorie na lo?’ ti küna. Tinü hi tü hi küüzewa vü mowa shelerüle naveh ünüh kürathuo luo,” ti küza.

¹³Jüti küsa vü David nüh Gad vü, “Hi tü müshekümnomna vü pehmthuoh; tinü hi tü VÜWA kevü küütum luo, küpakenühnyunü ma külohna tü ji shehm; thitü hi tü anyira ke vünü mükütu tümluo,” ti küza.

¹⁴Jüti sanü VÜWA nüh sahna kükho Israel rügi vü küze nü Israel nyiri tü anyie rürake süm.

¹⁵Thi Saküüwuowa nüh Jerusalem zoriem üti rügi zhülewa küze; thitü ma nüh zorie nti saküveh vü VÜWA nüh jüma ngu nü kümsüwa sakükhaphrüm taji ma nüh küzorie rügizhülewa vü, “Jü walethuoh, noh ke sam le luo,” ti küza. Jüti küsa vü VÜWArügizhülewa tü Jebuswa Ornan müthaküfepe vü tsieveh.

¹⁶Thi David nüh toke nü noküze ünü VÜWA rügizhülewa tü azhih thi atülü azhievü tsieküveh ngu, ma ke vü anyuchuwa shozhu nü Jerusalem rügivü thsuokeveh. Thinü David thi kükhruori tü tsakieh müphie nü mari anyieh fephohke tewa.

¹⁷Jüti küsa vü David nüh Saküüwuowa vü, “Nyiri kürüh üta azhükütsüwa tü hi nüh nyu ülo? Khiemuo nü khuke kümsü küsashehwa tü hi. Thitü anyihzhü hamari tü mowa sa lo? Noh ke tü, hi nüh noh vü khuoveh nü, O VÜWA eh Saküüwuowa, hi vü thi eh pa zheh vü müküwa tümluo,” ti küza.

¹⁸Jüsevü VÜWA rügizhülewa nüh Gad vü azhütsü taji David tü wanü Jebuswa Ornan müthakütsipe vünüh kükhurüpe küsüsa mkütoke üji mümhie ti David vü küza.

¹⁹Jükenüh David tü Gad azhü, ma nüh VÜWA nyo vünüh küüza vünüh khru.

²⁰Jüti küsa vü Ornan tü hiemtha feküveh vü sühleno ünü rügizhülewa ngukera nü ma thi ma tsa müzü ma vü nyipehküvehritü küthi.

²¹David tü Ornan vü küru vü Ornan nüh no ünü David ngura taji müthaküfepe vünüh tsewa, thi ma nyieh azhihvü vü tsuo nü David siakesheh.

²²David nüh Ornan vü, “VÜWA vü kükhurüpe küsü sana küsakenüh müthaküfepe azhiewa vi hi tsüluo, ma me khem ti küsavünüh jüma hi tsüluo, jüta küsa vünüh kürhuokesahnawa tü anyiri vünüh küprale tewa naveh ünüh,” ti küza.

²³Ornan nüh David vü, “Jüma vi luo; thi eh vüwa kajiwa nüh ma vü mowa nü mhieveh ünüh küsam luo; noluo, hi nüh shüvotsari kütso kükhurüri kenüh tsüveh, müthaküfe thsohri nüh athsohsa, thi hiemthari nüh atha kükhurü sa, ti saluo. Hi nüh aveh tsümthuoh ünüh,” ti küza.

²⁴Thitü kajiwa David nüh Ornan vü, “Nyu, tü hi nüh ame khem taküsa vünüh jüma sü naveh; hi nüh VÜWA kenüh noh zhi nü mowa nüh küviwa nyu, nyuwie ketünga hi tü ame müküsa zanyoküsü nga nüh vi kütso kükhurü kütsüwa nyu,” ti küza.

²⁵Jükenüh David nüh azhiewa kenüh Ornan vü küte nü suna akre müza türo thuom.

²⁶Jüti sanü David nüh VÜWA vü kükhurüpe küsü sanü kütsokükhurü thi kütsathuo kükhurü tsü taji VÜWA ji, thinü ma nüh kütso kükhurüwa kükhurüpe vünüh atülü anyih vünüh marüle.

²⁷Jüti küsa vü VÜWA nüh rügi zhülewa vü azhütsü nü ma tü ma nyuchuwa ma suochi lovü thsem le.

²⁸Jüma tsotho vü, David tü VÜWA nüh Jebuswa Ornan mütha küfepevünüh ma rüle kütsü ngura nü ma nüh ma küsahthuori jüla nüh sa.

²⁹Mosa nüh reza vü VÜWA juhthsü-kükhurüzheh küsawa thi kütsokükhurüwa kükhurüpe tü jüma tsotho vü Gibeon tü azhiekümsiewa vü pehveh;

³⁰thitü Saküüwuowa vü kürüna küsa kenüh David tü jüma tüvü müwara nüh sam, küpakenühnyunü ma tü VÜWA rügizhülewa nyuchukükrü kenüh.