Read Pochuri Naga 1 KÜSHUKÜRAZHÜKU 22 Bible Online

1 KÜSHUKÜRAZHÜKU 22 - Pochuri Naga bible

1 KÜSHUKÜRAZHÜKU 22

¹Jüsevü David nüh, “Hala nüh VÜWA Saküüwuowa zheh peh naveh thi hala nüh Israel kenüh kütso kükhurüpe peh naveh,” ti küza.

²David nüh Israel zhih vü küpeh alieri saküsehrü nü küsezhuhüti azhütsü, thi ma nüh aloh kürhethuori tü Saküüwuowa zheh sana küsa kenüh aloh huküsari küche üti ma nüh anyiri vizhu.

³David nüh küjietemürü kenüh amükhieri kheriri kenüh thi kümchiri kenüh amürü müküüzara tsü, thi asahwuo nga müküüterhühra küchetsü,

⁴thi amüse zhehthso mükürüh wiethuoh nüh tsü; küpakenühnyunü Sidonri thi Tair ri nüh amüse khielohti David vü viküru kenüh.

⁵David nüh, “Eh tsa Solomon tü rünguoveh thi müjie sheke, thiVÜWA kenüh azheh sana saküvehwa tü küsasheh küüluoh müsaji mümhie, azhih aveh vü tholah thi kütholathovü azhi müsaji mümhie; jükenüh hi tü jüma kenüh küüche sanaveh,” ti küza. David tü ma müjie küsü tüvü atsokrüri müküüzara küchesa.

⁶Jüti sanü ma nüh ma tsa Solomon ji nü Israel Saküüwuowa VÜWAkenüh azheh küsü sa üta azhühzho tsü.

⁷David nüh Solomon vü, eh tsa, eh Saküüwuowa VÜWA nyo vü azhehküsü sana küsa eh luoveh lovü tümthuoh.

⁸Thitü VÜWA zhü hi vü ru taji, “Noh tü azüh khielota küthü thi arie küjiji sashehmthuoh; tinü noh thuoüji eh nyo vü azhehmüsarathuoh, küpakenühnyunü azhih nyiehvü noh tü eh tüvü azühkhielohta küthü kümthuoh kenüh.

⁹Halie, atsa nyimpari küsü wuo noh tsü naveh; ma tü luovehkürüziri küsü sanaveh. Hi nüh ma mükünongüri poteposhu vünüh luovehkürüzi vi ma tsü naveh; küpakenühnyunü ma nyo tü Solomon, luovehkürüzi ta ji naveh, thi ma tsotho vü hi nüh Israel vü luovehkürüzi thi küüzoh tsünaveh.

¹⁰Eh nyo kenüh ma nüh azheh küsü sanaveh. Ma tü eh tsa sanaveh; thi hi nüh ma pa sanaveh, thi hi nüh Israel vü ma kükaji kajipewa tü küsuokürho vizhu naveh,” ti küza.

¹¹Tinü eh tsa, VÜWA nüh noh siekütsewa saluo, jüti küsa vünüh ma nüh noh kenüh küüza üta noh tü noh Saküüwuowa VÜWA zheh tü küsara sanaveh.

¹²VÜWA mpa nüh kümahtsa thi küthsüra noh vü küüliewa saluo, jüti sanü ma nüh Israel nyiehvü ashu tsü thuoüji noh tü noh Saküüwuowa VÜWA khonyo küsara saluo.

¹³Jüta küsa vü nüh mükütüküzü noh nüh VÜWA nüh Mosa vü Israel kenüh azhükütsü zhühkhe thi zhühkhori azhüküzhü ti müzhe thuoüji noh tü tsarhie naveh. Müzho luo, thi luoveh jimhie luo. Mükrü tüm; luoveh müzah tüm.

¹⁴Hozake kümnomna vünüh hi nüh VÜWA zhehwa kenüh suna 3,400rhiehküto nyiehvü nüh thi rakasa rhiehküto 34,000 nyiehvü nüh, asahwuo thi amürü müküüterhüra vünüh küchetsüthuoh, küpakenühnyunü jüma tü jüzake küpeh kenüh; azhehthso thi aloh nga hi nüh küchetsüthuoh. Noh tü hamari nyiehvü nüh mphahpheleüji mümhie.

¹⁵Noh tü küürohri küwale vünüh pehveh: aloh kürhothuori, alohzhehküsari, apezeküsari, thi kesienyiri küpapa küsari mükücherhühra, küüroh vü kümahtsa.

¹⁶Suna vü, rakasa vü, sahwuo vü, thi amürü vü ti. Sühra nü saluo! VÜWA nüh noh siekütsewa saluo, ti küza.

¹⁷David nüh Israel sierhü aveh vü nga ma tsa Solomon kükra üti azhütsü taji,

¹⁸“VÜWA nohri Saküüwuowa tü nohri sietse müveh ülo? Thi awuowuo vünüh ma tü nohri vü luovehkürüzi tsümsa ülo? Küpakenühnyunü ma nüh azhih jüla kürhori vizhu nü eh ke vü thsekümthuoh kenüh; thi azhihwa tü VÜWA thi ma nyiri tüvü thsemthuoh.

¹⁹Khinyi thuoüji noh müshe thi noh luoveh tü VÜWA noh Saküüwuowa phah na küsa kenüh thse luo. Sühra nü VÜWA Saküüwuowa kümtsezheh saluo, jüta küsa vünüh VÜWA kütsathuozhü küthseku thi Saküüwuowa kümtse ahuo-khuri tü VÜWA nyo kenüh azheh küsüsaküsawa vü vituru naveh,” ti küza.