Read Pochuri Naga 2 KÜSHUKÜRAZHÜKU 1 Bible Online

2 KÜSHUKÜRAZHÜKU 1 - Pochuri Naga bible

2 KÜSHUKÜRAZHÜKU 1

¹David atsa Solomon tü ma mpa nüh ma kajipe vizhu, thi VÜWA ma Saküüwuowa[1] nüh ma siekütse sanü khielohta vünüh ma saküji tsü.

²Solomon nüh Israel aveh sierhüri thi müzari lesari vü, Israel aveh vü thi sierhüri aveh vü, apara zhehlori alüri aveh vü küza.

³Solomon thi kümhu aveh ma sie nü Gibeon vü küpeh azhie kümsiewa vü wa; küpakenühnyunü müzakümhu juhthsüzheh, VÜWA siepewa Mosa nüh reza vünüh küsawa tü jüla pehküveh kenüh.

⁴ (Thitü David nüh Saküüwuowa kütsathuozhü küthseku tü ma nüh azhie kücheawa kenüh Kiriat Jearim vünüh viteru).

⁵ Jümpa mükünyu Uri atsa Bezalel, Hur atsanüh küsa sahwuo kükhurüpewa tü VÜWA juhthsü-kükhurüzheh tüvü nüh jüla pehlathuoh. Solomon thi kümhuwa tü VÜWA phah.

⁶Thi Solomon tü VÜWA tüvü nüh sahwuo kükhurüpewa vü tekhru, jüma tü müza juhthsü-kükhurüzhehwa vü pehveh, thi jüma rügivü nüh kütso kükhurü anyie küsü satsü.

⁷Jüma rüza vü VÜWA nüh Solomon vü ru taji ma vü, “Hi nüh noh vü mowa tsü naveh ünüh nga ti saluo,” ti küza.

⁸Thinü Solomon nüh Saküüwuowa vü, “Noh nüh eh pa David vü zanyo küji thi mükükhaphrükhale kümze kütsathuoh, thi hi tü ma müthoh vünüh kaji küsamthuoh.

⁹ O VÜWA Saküüwuowa, noh nüh eh pa David vü küphrahzhuwa khinyi thuoüji sajutsüluo, küpakenühnyunü noh nüh hi vi nü azhih vü azhitho zake anyiri nyiehvü kaji küsamthuoh.

¹⁰Tinü khinyi thuoüji anyi hamari tüvü tse shuwa thi tse turu ti küsa kümahtsa thi aküthsü ratsüluo, küpakenühnyunü noh nyiri zhühzhüh ta küsa hama thawa nüh atakrü sara na lo?” ti küza.

¹¹Saküüwuowa nüh Solomon vü, “Küpakenühnyunü noh nüh hama noh luoveh lovü tü, noh nüh kümkateri, künyirhie, küchiekürhe nyutü noh kümrhüra kürholi mükhuo, thi kürhosuo nga mükhuo, thitü kümahtsa thi aküthsü noh mpa noh kenüh khuo nü hi nüh anyi mari nyiehvü kaji küsa vü takrü sa nta nga ta küsa kenüh,

¹²kümahtsa thi aküthsü thuoüji noh vü tsümthuoh. Hi nüh künyirhieri kümkateri, thi küchiekürhe noh tüvü küru thi noh sevü küru kajiri küsü nga nüh müküpeh nga vi noh tsü naveh,” ti küza.

¹³Jüti sanü Solomon tü azhie kümsiewa Gibeon, müza juhthsü-kükhurüzhehwa vünüh Jerusalem vü teru. Thi ma tü Israel nyiehvü kükaji sa.

¹⁴ Solomon rawuhkhekari thi rawuhnyiri sazhuh khe; ma tü rawuhkheka müza türamzü thi rawuhnyiri anyie türakünyi ma nüh jümari rawuhkheka nyujiri vü Jerusalem vü kajiwa sie nü ape sapeh.

¹⁵Thi kajiwa nüh rakasa thi suna tü aloh kümjie zarike Jerusalem satsü, thi ma nüh amüse tü saküpro nü Shefela rürüvithsoh kümjie satsü.

¹⁶ Thi Solomon nüh rawuh küsü thuoüji Egypt thi Kue vünüh, kajiwa asüküsari tü ame vünüh jümari Kue vünüh vi.

¹⁷Mari tü rawuhkheka küsü vü rakasa müza türo nüh Egypt vünüh sü, thi rawuh küsü vü rakasa müzake nü tünyieke nüh sü; Jüta mari vünüh hamari tü Hitri thi Siria kajiri vü zhuküze.