Read Pochuri Naga 2 KÜSHUKÜRAZHÜKU 13 Bible Online

2 KÜSHUKÜRAZHÜKU 13 - Pochuri Naga bible

2 KÜSHUKÜRAZHÜKU 13

¹Kajiwa Jeroboam mahvi türatüze vü Abijah nüh Judah nyiehvü kükaji sate.

²Ma tü Jerusalem vü mahvi küche kükaji sa. Ma zah nyo thuoüji Gibeah wa Uriel tsavühwa Mikaiah. Thi Abijah thi Jeroboam masü azhievü arie sa.

³Abijah tü arieküsa luovehküze anyi thopahiri küshoshu anyie müzamüzü sie nü arieküsape vü tsezhutewa; thi Jeroboam nga arieküsari küshozhu anyie müza tüze ariepe sanü ri taji peh.

⁴Jüti küsa vü Abijah tü küzhiho anyu Efraim vü küpeh Zemaraim Küzhi rügivü tsie taji, “Eh zhü künaluo,” O Jeroboam thi Israel aveh!

⁵Israel VÜWA Saküüwuowa nüh küsuokürho kaji küsa amütsü vi nü kütsathuozhü sataji David thi ma tsari vü kütsü nohri tü küthsüleh nyu ülo?

⁶Jüta wie ketünga Nebat tsa Jeroboam, Solomon siepewa David atsa tü sühra nü ma Vüwa sie saluo;

⁷mame mükünyie nyuri saküümsüri ma vü sezhuh mükiele taji Solomon atsa Rehoboam zhü müküna nüh sa, Rehoboam tü rünguom thi müküzhühthuora thi mari tüvü mütsiera nüh sam.

⁸Thi nohri tü khinyi thuoüji David tsari ake vünüh VÜWA kajipewa sie kürükhrüluo nta saveh, küpakenühnyunü nohri tü ashiejiaküji küsü thi Jeroboam nüh nohri vü sakütsü nyizari kenüh suna mieshüzahri pehküveh kenüh.

⁹Nohri tü VÜWA navüri, Aron atsari, thi Leviri zhejam nü azhihküpa nyiri üta nohri mpa nüh navü samüm ülo? Thari nüh ma mpa masakümtse nta shüvotsazah nyutü nyihzhüvo türü vi nü runaveh ünüh nyiazari mükünyura navü saterarati.

¹⁰Thitü hiri kenüh thuoüji, VÜWA tü hiri Saküüwuowa, thi hiri tü ma kulemsa. Hiri tü Aron atsari thi Leviri mari küüroh kenüh VÜWAvü anasanavüri pehveh.

¹¹Mari tü rüne kürüzhu thi münüleh kürüzhu kütso kükhurüri sa thi arheküüngu kümtsuotsuo küüngukümie tso, suna latha toküsape rügivü küütsa lohse sa, thi münüleh kürüzhu alatiri ju peh na küsa kenüh suna latipe no; küpakenühnyunü hiri tü VÜWA hiri Saküüwuowa nüh azhükütsü müzhe küveh kenüh, thitü nohri thuoüji ma kulemthuoh.

¹²Halie, Saküüwuowa tü hiri lü vü peh nü hiri sietseveh, thi ma navüri tü mari arie tütü vi nü nohri sie arie küsa kenüh khunta pehveh. O Israel tsari, nohri tü nohri para Saküüwuowa VÜWA siemüsaluo tümluo, ti küza.

¹³Jeroboam tü asevü nüh mari mükieshe küzüle nti küze, Judah tüvü hakümjie vünüh ma riekhuo küze, thi kümkieshewa tü mari sevü nüh ru.

¹⁴Jüti küsa vü Judah nüh sühle no ünü, halie, ariewa tü kümtümüse kütse ngu; thinü mari tü VÜWA vü zie, thi anavüri nüh atütü khielota khu.

¹⁵Jüti sanü Judah nyiri tü arie jikhi sa kümsie. Thi Judah nyiri nüh zie ünü, Saküüwuowa nüh Jeroboam thi Israel aveh Abijah thi Judah tüvü nüh cham.

¹⁶Israel nyiri tü Judah tüvü nüh zhütewa, thi Saküüwuowa nüh mari vi mari ake vü thsem.

¹⁷Abijah thi ma nyiri nüh mari khieloti sühthe jam; jüti sanü Israel sühküzehküm küshozhu nyiri anyie müza münga sühthem.

¹⁸Hakümjie vünüh Israel nyiri tü jüma tsotho vü sakütsuom nü Judah nyiri nüh küsara satewa, küpakenühnyunü mari nüh VÜWA mari para Saküüwuowa vü kürüngake kenüh.

¹⁹Thi Abijah tü Jeroboam kükawa nü ma vünüh anyujiri vitera, Bethel thi ma nyuzari, Jeshana thi ma nyuzari, thi Efron thi ma nyuzari.

²⁰Jeroboam tü Abijah tsotho vü ma kükhra müvilera nüh sanü VÜWAnüh ma zothem.

²¹Thitü Abijah thuoüji müzho shutewa. Thi ma tü vüvüh türamzü vinü atsa nyimpari mükeke nü künyi thi nyimzari türatüro tipeh.

²²Abijah nüh küsari ma lehkhujiri thi ma nüh küphrari tü setsaküthsüwa Iddo zhühku vü rhük