Read Pochuri Naga 2 KÜSHUKÜRAZHÜKU 14 Bible Online

2 KÜSHUKÜRAZHÜKU 14 - Pochuri Naga bible

2 KÜSHUKÜRAZHÜKU 14

¹Jüti sanü Abijah tü ma pari sie nü zehtewa taji mari nüh David nyujiwa vünüh ma chohwum; thi ma tsa Asa nüh ma müthoh vünüh kükaji sa. Ma tsotho vü azhihwa tü mahvi türake kümnyie vü peh.

²Thi Asa tü VÜWA ma Saküüwuowa tüvü mowa nü mhie thi kato nüh sa.

³Ma nüh aliera kükhurüpe, thi azhie kümsieri vijam nü tovühri zoriem thi Kükhurüvühri shüchiehm tü,

⁴thi Judah vü VÜWA, ma pari Saküüwuowa phah thi Khonyo thi azhütsüküsawa müzhe üti azhütsü.

⁵Thi ma nüh Judah nyujiri aveh vünüh azhie kümsieri thi arheküüngukükhurüperi nga vijam. Jüti sanü kajipewa tü ma kükhu vünüh kümnyie sara.

⁶Ma nüh Judah vü kümzho nyujiri sa, küpakenühnyunü azhihwa tü münyieküm kenüh. Jüma mahvi vü ma tü arie müsa, küpakenühnyunü VÜWA nüh ma vü luovehkürüzih kütsü kenüh.

⁷Thi ma nüh Judah vü, “Kürü taji anyuji hamari sa ünüh raluo, thi jümari tü azie, akhajie, akheri, thi arüpe nüh sam kielem ünüh raluo; azhihwa tü khinyi nga hiri azhi wie, küpakenühnyunü hiri nüh VÜWA hiri Saküüwuowa küphah kenüh; hiri nüh ma phah, jükenüh ma nüh luovehkürüzih awuowuovü tsü,” ti küza. Jüti sanü mari tü sataji tsarhiera.

⁸Jüti küsa vü Asa tü Judah vünüh thopahiri anyie müza küche peh, joh huo thi avi küvi, thi Benjamin vünüh joh huo thi lawih küvi anyiri anyie müza künyi nü zerake peh; hamari aveh tü asükütükümzho nyiri kheh.

⁹Ethiopiari Zera tü mari siesaluo nti thopahiri atie küsü thi rawuhkheka müza küche sie nü shuhru taji Mareshah küju ru.

¹⁰Jüti küsa vü Asa tü ma mütu nti tseshuwa, thi mari tü Mareshah vü Zefatha anyuo vünüh arie küsape ri taji peh.

¹¹Jüti küsa vü Asa tü VÜWA ma Saküüwuowa vü zie taji, “O VÜWA, kükra na küsa noh kümjie küsa küsü nga münyie luo, akükhrawa thi küthachuwa masü azhievü. Hiri kükraluo, O VÜWA hiri Saküüwuowa, küpakenühnyunü hiri tü noh vü rüngake küveh kenüh, thi noh nyo vünüh hiri tü riehkhuo hama sie saluo nti tseveh, O VÜWA, nohtü hiri Saküüwuowa wie; anyiri nüh noh sie küsaluo sarakümmüküsa tümluo,” ti küza.

¹²Jüti küsa vü VÜWA nüh Asa thi Judah masü atüvü nüh Ethiopiari cham nü Ethiopiari tü zhütewa.

¹³Asa thi ma vü nyi kütse anyiri tü Gerar küju mari kükawa, thi Ethiopiari tü nyi küsü nga mükükhe nüh rehthe khehm; küpakenühnyunü mari tü VÜWA thi ma thopahiri tüvü kuorieteküwakenüh. Judah nyiri tü zanyo zheküvira khieloti vü tewa.

¹⁴Thi mari nüh anyujiri Gerar kümkieshe aveh rehriem; küpakenühnyunüVÜWA kükrü tü mari vü küpeh kenüh.

¹⁵Thi mari nüh mieshümiesa küpehra juhthsüzheh rehriem nü khielota vünüh nyihzhü thi ut vitewa. Jüti sanü mari tü shele Jerusalem vü teru.