Read Pochuri Naga 2 KÜSHUKÜRAZHÜKU 15 Bible Online

2 KÜSHUKÜRAZHÜKU 15 - Pochuri Naga bible

2 KÜSHUKÜRAZHÜKU 15

¹Saküüwuowa Sietse tü Oded atsa Azaria rügi vü ru,

²thi ma tü Asa mütu nti wa nü ma vü, “Eh zhü künaluo, Asa, thi Judah thi Benjamin aveh: Nohri nüh VÜWA vü pehküveh vü ma tü nohri sietseveh. Mükütüküzü nohri nüh ma phah thuoüji nohri ma ngura naveh, thitü mükütüküzü nohri nüh ma kulem thuoüji ma nga nohri kulem naveh.

³Israel tü tsotho hothake Saküüwuowa tsawa müpeh nüh teru, thi anavüra küsosie thi akhonyo müpeh nüh teru;

⁴thitü mari müshekümnomna vünüh VÜWA, Israel Saküüwuowa vü sühleru taji ma phah nü mari nüh ma ngura.

⁵Jüma tsothovü ma kenüh thawa nüh alievü shuwa nyutü ma kenüh turu nüh luovehkürüzih münyie, küpakenühnyunü azhih jülaküpehri aveh vü küsüro kümnomna sheh kenüh.

⁶Mari tü müjehmrie tewa, akuoküji nüh akuoküji sie kürünyuo, thi anyuji nüh anyuji sie kürünyuo, küpakenühnyunü müshekümnomna küpapa vi nü Saküüwuowa nüh mari saküüsühro kenüh.

⁷Thitü nohri thuoüji luovehji luo! Nohri ake tü müküüthasü tüm, küpakenühnyunü nohri küüroh tü suope satsüna küveh kenüh,” ti küza.

⁸Asa tü Oded atsa Azaria setsaküthsüzhü hamari künara ünü matü luovehjira nü Judah thi Benjamin azhih aveh vünüh thi Efraim küzhiho anyu vünüh ma nüh küvira anyujiri vünüh akükre anguori vijam nü VÜWA zheh atela tüvü küpeh VÜWA kükhurüpe waküthele.

⁹Jüti sanü ma nüh Judah thi Benjamin aveh, thi Efraim, Manase vünüh küru aveh, thi Simeon mari vü nyi priru küpehri ti sazhuh, küpakenühnyunü VÜWA ma Saküüwuowa nüh ma sietekütse küngu vü Israel vünüh anyito khielota ma vü teküru kenüh.

¹⁰Asa kükaji mahvi türamüngaawa asa kücheawa vü mari tü Jerusalem vü sezhuh.

¹¹Mari nüh küzhechiehra vünüh viküru vünüh shüvotsa müza türü thi nyihzhü anyie türü mari nüh jüma rülo vü küsahthuoh sanüVÜWA tsü.

¹²Thi mari tü mari luoveh aveh vi thi mari kürholi aveh vi VÜWA, mari para Saküüwuowa phah nti kütsathuozhüwa lovü tu,

¹³jüti sanü thawa nüh VÜWA, Israel Saküüwuowa mphah nüh sanaveh ünüh, ma mpa nüh rünguoluo nyutü khruoluo, krepariluo nyutü krevühriluo küsüwie naveh.

¹⁴Mari tü ajikhi kümsie vünüh atülü thi arütsü vi zie nüVÜWA vü küüshietsa.

¹⁵Thinü Judah aveh tü küüshiekütsa rügivü nyierakhruo; küpakenühnyunü mari tü mari luoveh aveh vi küshie nü mari kümngu aveh vi ma phah nü mari nüh ma küngura kenüh, thi VÜWAtaji mari vü kümnyie vi pohtepohshu küju tsü.

¹⁶Thi Maka, ma zah wie nga, kajiwa Asa nüh kajivüh azah küsawa vünüh vijam, küpakenühnyunü ma nüh akükre Kükhurüvü kenüh atsoküsü sakütsü kenüh. Asa nüh ma tsowa rehchiem nü tohkümnya taji Kidron kutso vünüh tsom.

¹⁷Thitü kümsie azhieri thuoüji Israel vünüh vimja. Jüta wie ketünga Asa luoveh tü ma rülo aveh vü müshekümsümüpeh.

¹⁸Thi ma nüh Saküüwuowa zheh vü ma pa küphrahzhu küteri thi ma mpa ma küphrahzhu küteri rakasa, suna, thi ahuo-khuri viru.

¹⁹Thi Asa nüh kükaji mahvi cherake nü münga küju arie müsa wienüh sa.