Read Pochuri Naga 2 KÜSHUKÜRAZHÜKU 16 Bible Online

2 KÜSHUKÜRAZHÜKU 16 - Pochuri Naga bible

2 KÜSHUKÜRAZHÜKU 16

¹Asa kükaji mahvi cherake nü türo vü Israel kajiwa Basha tü khrunü Judah sie saluo taji Ramat sara, jüti sanü nyi küsü nga Judah kajiwa Asa vü küwaküru küsa ma nüh samtsü.

²Thinü Asa nüh VÜWA thi kajiwa zhih vünüh künyirhie rakasa thi suna ti vi nü Damaska vü kürhowa Siria kajiwa Benhadad vü jümari küze taji,

³“Eh pa thi noh pa masü azhievü kümjie hisü azhievü nga aküka küsü peh ünüh raluo; halie, hi nüh noh vü rakasa thi suna küzeveh; wa nü Israel kajiwa Basha nohsü akükawa phrüriem luo, jüti sanü ma tü hi vünüh viteküwam luo,” ti küza.

⁴Jüti küüzavü Benhadad tü kajiwa Asa azhü vi taji ma thopahiri sierhüri küze nü Israel nyujiri sie küüsaluo, thi mari tü Ijon, Dan, Abel Beth Maacah, thi Naftali zanyoküsape nyujiri aveh chatera.

⁵Thi Basha nüh jüma küünara vü Rama saküvehwa lem nü maküürohwa tü khem.

⁶Jüti sanü kajiwa Asa nüh Judah aveh vi nü mari nüh Rama alohri, thi ma zheh küsa athsohri Basha nüh vi saküvehri vü tewa taji ma nüh Geba thi Mizpa sa.

⁷Jüma tsotho vü setsazhüküphrawa Hanani tü Judah kajiwa Asa vüru taji ma vü, “Küpakenühnyunü noh nüh VÜWA noh Saküüwuowa vü mürüngake nüh Siria kajiwa vü rüngake küm kenüh Siria kajiwa thopahiri tü noh vünüh mürie tewathuoh.

⁸Ethiopiari thi Libyanri tü thopahiri müküsarhühra thi rawuhkheka thi rawuhnyiri ti khielohta müpeh ülo? Tü noh nüh VÜWA vü kürüngake kenüh ma nüh mari vi noh ke vü thsem,

⁹küpakenühnyunü ma wuovü thara luoveh nüh müshe kümsü münyienüh jümara müthoh vünüh ma kükhra kütsana küsa kenüh VÜWAnotha tü azhih ajü vü notsuo nokhru ti küsa kenüh. Noh tü hamawa vü zanyomthsü nüh samthuoh; küpakenühnyunü noh tü nosü vünüh tuvü arie sanaküvehthuoh kenüh,” ti küza.

¹⁰Jüti küüza vü Asa tü setsazhüküphrawa vü arüshu nü mürükieveh nüh ma küri taji küsizheh lovü thsem, küpakenühnyunü ma kenüh ma tü aheküze vü pehküvehthuoh kenüh. Thi Asa tüjüma tsothovü anyi wuori vü khuke müsü nü sakümnomnatsü.

¹¹Asa nüh küüroh küliri apo vünüh sehkhe küju Judah thi Israel kajiri Lasipha lovü rhüsaveh.

¹²Asa kükaji mahvi cherake nü tüguh vü ma tü ma mpha vü aküna petewa, thi akünawa tü müsü sheh tewa; tü ma küna jüta pehwie ketünga ma tü VÜWA mphah nüh sanü nahziküthsüri küükraphahtewa.

¹³Thi Asa tü ma kükaji mahvi zürake nü küsü vü süm nü ma pari sie zehtewa.

¹⁴Mari nüh ma vi nü ma mpa nüh küphieke rüku David nyujiwa vü chohwum. Mari nüh ma vi azawuh arheküüngu küsari nüh küüngukümie müküzüküzü thseküpro küsawa lovü thse nü mari nüh maküchiekürhe vünüh anyih khieloti tso.