Read Pochuri Naga 2 KÜSHUKÜRAZHÜKU 19 Bible Online

2 KÜSHUKÜRAZHÜKU 19 - Pochuri Naga bible

2 KÜSHUKÜRAZHÜKU 19

¹Jüsevü Judah kajiwa Jehoshafat tü kümhieti ma zheh Jerusalem vü sheleterura.

²Thitü Hanani atsa Jehu setsazhüküphrawa tü ma mütu nti shuwa nü kajiwa Jehoshafat vü, “Noh tü khukekümsüri kükra thi thari nüh VÜWA mürhüveh ünüh jümari kükra naveh ülo? Hama kenüh noh sie küsaluo nta VÜWA vünüh arüküshuwa tü shuwathuoh.

³Jüta wie ketünga kümhie wuori noh vü nguveh, küpakenühnyunü noh nüh azhih hama vünüh Kükhurüvüri zoriem nü Saküüwuowa küphahvü noh luoveh küthse kenüh,” ti küza.

⁴Jehoshafat tü Jerusalem vü kürho sanü ma tü alievü anyiri azavü wa le, Beersheba vünüh Efraim küzhiho anyuri vü wa nü mari sie VÜWA ma pari Saküüwuowa vü ru le.

⁵Ma nüh Judah nyujiri kümzho azhih aveh vü nyuji vünüh lesari chiekesa,

⁶jüti sanü lesari vü, “Nohri nüh mowa sanüh müshe nonoluo, küpakenühnyunü nohri tü anyiri kenüh nyunü VÜWA kenüh lesana küveh kenüh; zanyoküürathuo vü ma tü nohri siepeh wieveh.

⁷Jükenüh khinyi VÜWA kükrüwa tü nohri rügivü peh luo; nohri nüh mowa saveh ünüh jümari vü azhüzhüluo, küpakenühnyunüVÜWA hiri Saküüwuowa vü kümshowa küreke le, nyutü kümrhümze müsa, nyutü athe müvi,” ti küza.

⁸Jümpa mükünyu VÜWA kenüh ashihküsa tsü na küsa kenüh thi küüjakünyari sathuotsü na küsa kenüh Leviri wuori, navüri thi Israel thahruo alüri Jerusalem vü chieke sa. Mari tü Jerusalem vü mari ape peh.

⁹Jüti sanü ma nüh mari vü azhühzho tsü taji, “Hakümjie vünüh nohri tü VÜWA kükrü vünüh, küzhütsa nyitsa vünüh, thi nohri luoveh ajü vi nü sanaveh:

¹⁰nohri jienüri mari nyujiri vü kürhori vünüh ashih, azüh küthüküm, khonyo nyutü azhükütsü, azhühkheri, nyutü azhühkhori küruvü nohri nüh mari süphietsü nü mari tü VÜWA tüvü mükülehvü temtu nüh sanü arüküshuwa tü nohri vü thi nohri jienürivü müru nüh sanaveh. Nohri hakümjie vünüh saluo, thi nohri tü müküleh vü temtu nüh sanaveh.

¹¹Thi halie, VÜWA rüleh aveh vü anavü lehvü Amaria tü nohri nyiehvüpehveh; Judah zheh vü kümkhrüwa Ishmael atsa Zebadia tü kajiwarüleh aveh vü pehveh; thi Leviri nüh aküjiri ta vünüh nohri kütsü sanaveh. Luoveh jisheh nü zanyo hamari saluo, thi VÜWAnüh kükatowa vü küpehwa saluo,” ti küza.