Read Pochuri Naga 2 KÜSHUKÜRAZHÜKU 26 Bible Online

2 KÜSHUKÜRAZHÜKU 26 - Pochuri Naga bible

2 KÜSHUKÜRAZHÜKU 26

¹Jüti küsa vü Judah nyiri aveh nüh Uzziah mahvi türatüro kükhruowa vi nü ma pa Amazia müthoh vünüh kaji küsa.

²Kajiwa nüh ma pari vü nyi zehteküwa sevü nüh ma tü Elot sataji jüma vile nü Judah tsüm.

³Uzziah kükajite vü ma mahvi tü türatüro thuoh, thi ma tü Jerusalem vü mahvi tünyieke nü künyi kükaji sa. Ma zah nyo tü Jeholia, Jerusalem vühri.

⁴Ma tü ma pa Amazia nüh küsa aveh sataji VÜWA notha vü mowa nü mhieveh ünüh sa.

⁵Ma vü VÜWA kükrü süphiekütsüwa Zekharia tsotho küju ma tü ma mpa ma vi nü Saküüwuowa küphah sa; ma nüh VÜWA küphah küjunü Saküüwuowa nüh ma sakütsarhietsü.

⁶Ma tü tsezhuwa nü Filistinri sie arie sataji Gat azie, Jobne aziethi Ashdod azie zokhuoriem; jüti sanü ma nüh Ashdod suothso thi Filistinri azavü wuori vü anyujiri sa.

⁷Saküüwuowa nüh ma kükra nü Filistinri, Gurbal vü kürho Arabri thi Meunri sie küüsaluo.

⁸Amonri tü lesakhrü vi Uzziah tsü, thi ma kütholah tü Egypt rüshuküju nyuohwa, küpakenühnyunü ma tü khra shehteküru kenüh.

⁹Jüma nyiehvü nga Uzziah tü Jerusalem vü Jükeh Kheri vü nga, Anyuo Kheri vü nga thi Angle vü nga khajie rie nü jümari sakümzho.

¹⁰Thi ma nüh reza vü khajie rie kheh, thi juhkhre hozake chüh, küpakenühnyunü ma tü Shefela vü nga thi kütake vü nga mieshümiesa khielohta küpeh kenüh, thi ma tü küzhiho vü nga thi azhihazhikhu vü nga azhuh küürohri thi rhelivirhu küürhiesheri peh, küpakenühnyunü ma tü azhi sa külo kenüh.

¹¹Jüma nyiehvü nga Uzziah tü nyihla rienyiri arie küsatseri peh, kajiwa sierhüri küsü Hanania nüh küjokütsü kükhu vünüh müzhe nü Jeiel kürhüwa thi Maseia küjiwa masü nüh jizhuh nü küürüh müzhe taji küsuo.

¹²Apara zheh vü alüri anyiri kümzho luovehküze aveh küürüh anyiekünyi nü müza türo.

¹³Mari nüh azhükütsü kükhu vünüh khra müzho sheh nü arieküsara kajiwa kükra taji mükünongüri sie küsaluora thopahiri anyie müza küche türü nü müza münga.

¹⁴Thi Uzziah nüh thopahiri aveh kenüh ajoh huori, aviri, thekulüweri, mürükruzhuri, alawihri, thi thumkavüh kenüh alohri ti küche.

¹⁵Thi ma nüh akhajie rügiri vü thi ajükehri vü sanü ashüchuri thi aloh küjiri ka na küsa kenüh kümtsamla nyiri nüh kaküüze müsamrüriküvizhu nü ma nüh Jerusalem vünüh sa. Jüti sanü ma küthola tü nyuoh sheh tewa, küpakenühnyunü ma khra küveh küju taji küükrükükra sanü küükra kenüh.

¹⁶Thitü ma tü khrateru ünü rhiehza shutewa nü ma küzorie vü tewa. Küpakenühnyunü ma tü VÜWA ma Saküüwuowa vü rie nü rheküüngu kükhurüpe rügi vünüh rheküüngu tso ntiVÜWA kükhurühzheh lovü kütu kenüh.

¹⁷Thitü Azaria navüwa tü luovehküze nyiri VÜWA navüri zerake masevü nyitu;

¹⁸ thi mari tü kajiwa Uzziah vü ruoluo nü ma vü, “VÜWA vü rheküüngu küütso nta sakümtseküsa navüri nüh. Kümtsezheh hala nüh shutewaluo; küpakenühnyunü noh tü müküleh samthuoh, thi jüma nüh VÜWA Saküüwuowa vünüh küsiake küsü nga noh vü küruwa nyu,” ti küza.

¹⁹Jüti küüza vü Uzziah tü arüshutewa. Jüti küsa vü ma tü rheküüngu tso nta ma ke vü kütsokuwa vi pehküveh vü ma nüh anavüri vü arüshu ünü rheküüngu kükhurüpe vü VÜWA zhehlovü nüh navüri tüvü nüh ma tie rügivü hujirü shuteru.

²⁰Jüti küsa vü Azaria navü lehvüwa thi navüri aveh nüh mavü no, thinü halie, ma tie rügivü hujirü satewa! Thi mari nüh prelepreza alievü ma küchiezhum, thi ma mpa ma wie nga pre nü alievü shutewa, küpakenühnyunü VÜWA nüh ma kürhiekütsü kenüh.

²¹Jüti sanü kajiwa Uzziah tü ma sühleh küju hujirü peküm sa, matü hujirü peküm kenüh azheh küpa küsü vü kürho sa, küpakenühnyunü ma tü VÜWA zheh vü müchie kenüh sakümthuohkenüh. Thi ma tsa Jotham nüh kajiwa zhehlowa vü anyieh sanü azhih jüla anyiri kete.

²²Uzziah nüh küüroh külih küpari apo vünüh akhe küju Amoz atsa Isaya setsaküthsüwa nüh rhü.

²³Jüti sanü Uzziah tü ma pari sie zehtewa nü kajiri azhi küchohwu azhuhwa vünüh mari nüh ma pari sie chohwum, küpakenühnyunü mari nüh, “Ma thuoüji hujirü küperi,” ta küsa kenüh. Jüsevü ma tsa Jotham nüh ma müthoh vünüh kükaji sa.