Read Pochuri Naga 2 KÜSHUKÜRAZHÜKU 3 Bible Online

2 KÜSHUKÜRAZHÜKU 3 - Pochuri Naga bible

2 KÜSHUKÜRAZHÜKU 3

¹Jüti sanü Solomon tü Jerusalem vü Moria Küzhi vü, VÜWA nüh mapa David vü küüngu, David nüh kütuohke küsa azhie, Jebuswa Ornan mütha kütsipe vünüh VÜWA zhehwa sate.

²Ma nüh kükaji mahvi müzü nü asa künyiawa rülo künyiawa vü sate.

³Saküüwuowa zheh küsa kenüh hamari tü Solomon nüh küüteri: küüte kürüwiwa vünüh achu thuoüji akete rorake, thi aveh thuoüji akete mükeke.

⁴Azhehlo atüvü atela achu thuoüji akete mükeke, azhehwa kümza siezarike sa; ma kümsie thuoüji akete müzake nü mükeke. Alovü thuoüji ma nüh suna alatha nüh küzhute.

⁵Azhehlo vü thuoüji ma nüh asuohthso nüh saküüri nü suna kümhiewa nüh küzhute taji jüma rügivü aluophi thi akievehrheke.

⁶Ma nüh azhehwa tü amekükhraloh nüh vi saküzü. Suna thuoüji Parvaim suna.

⁷Jükenüh ma nüh azhehwa tü, arüvühri nga, akhejiri nga, azieringa, thi amükhieri nga suna nüh vi küzhute; thi ma nüh aküsaküpe asa künyi azieri vü tüke kheh.

⁸ Thi ma nüh azhie kümtsetsawa nga sa; ma chu azhehwa aveh sie zarikesa, aveh kete mükeke thi achu kete mükeke; ma nüh jüma suna kümhietsawa rhieküto mükeke küüluoh nüh vi azieri küzhute.

⁹Suna küüzho müshe müza münga nü rürake nüh vi küzeteri sa. Thi küjüke ateri nga ma nüh suna vi küzhute.

¹⁰Azhie kümtsetsawa lovü ma nüh athsoh vi aküsaküpe asa künyi sanü suna nüh vi küzhute.

¹¹Küsaküpe asa künyi küsa tü apie mükeke: küsü aküsa küsüvü apie münga kütawa nü azhehwa azie ju thi küpawa nga apiemünga kütawa nü küsü nüh küsüwa vü küpeke;

¹²aküsaküpesa hama tü aküsa küsü vü apie münga, thi kütawanü azhehwa azie shike, thi aküsa küpawa nga apie münga, thi kütawa nü aküsaküpe sa apowa küsa sie küperü.

¹³Küsaküpe sa hamasü aküsa tü apie mükeke shohkütawa; küsaküpe sa hamasü tü masü ajih rügivü tsie nü azhehlovü küprüke.

¹⁴Thi ma nüh küzietethsüwa tü akhem küsümo, alo müruküchiechie, thi mürilo nüh vi sanü aküsaküpe asa tü jüla sake.

¹⁵Azhepo vü ma nüh tovüh künyi ma kümsie küüto türamnga, küsü rügivü apie münganga müsie.

¹⁶Ma nüh azho kümjie küsa akieveh tovüh künyi rügivü sake; thi akatoh müzake sanü akievehri vü sake.

¹⁷Ma nüh tovüh künyi tü kükhurüzheh atüvü toke, küsü zhieseh vü, thi küpawa zhiehtü vü ti toke nü zhieseh wathuoüji Jakhim, ma zhühnyo, ma nüh vizhutsü, ti ji, thi zhiehtü wuowa thuoüji Boaz, ma zhühnyo, ma kükhra vünüh, ti ji.