Read Pochuri Naga 2 KÜSHUKÜRAZHÜKU 30 Bible Online

2 KÜSHUKÜRAZHÜKU 30 - Pochuri Naga bible

2 KÜSHUKÜRAZHÜKU 30

¹Hezekiah nüh Israel aveh vü thi Judah vü azhü küze, thi VÜWAIsrael Saküüwuowa vü tsekükari sana küsa kenüh Jerusalem vüVÜWA zhehwa vü müru wie üji mümhie ti küsa rhüzhühle tsü nü Efraim thi Manase nga tsü,

²küpakenühnyunü kajiwa, thi ma kajitsari thi Jerusalem vü kümhu aveh tü asa künyiawa vü tsekükari sa nti küjühle vi küsakenüh,

³mari nüh jümawa ma tsotho vü müsara nüh saküm kenüh, küpakenühnyunü navüri tü mari mpa nüh anyi akütse vünüh mari samükümtse nüh sam, jü mpa mükünyu anyiri tü Jerusalem vü müküsezhuhra kenüh,

⁴jüti küsa vü kürüzhewa tü kajiwa thi kümhu aveh kenüh kükato üta sa.

⁵Jükenüh anyiri tü ru nü Jerusalem vünüh VÜWA, Israel Saküüwuowa vü tsekükari sa nta küsa kenüh Israel aveh vü, Beersheba vünüh Dan küju küzhüchüh küsü sa nti mari nüh azhütsü; küpakenühnyunü rhüküüze üta anyiri aküzhi sanü jüma müsanüh saküm kenüh.

⁶Jüti küsa vü kajiwa nüh azhükütsü üta kajiwa thi ma kajitsari vünüh rhüzhühle vünüh Israel thi Judah aveh vü azhühvüri tü wa taji, “O Israel nyiri, VÜWA, Abraham, Isaac, thi Israel Saküüwuowa vü sühletera nü Assiria kajiri vünüh mürie teküwa kümtori vü ma tü sühleküürum le luo.

⁷Nohri pari thi nohri jienüri, ma pari VÜWA Saküüwuowa vü müzhütsa nyitsa nüh sakümri kümjie müsa tüm, mari tü jüüta küsa vünüh nohri nüh mari küngu üta ma nüh mari tü küüzoküzam.

⁸Nohri tü khinyi thuoüji nohri pari kümjie mükuoti tüm, thitü nohri mpa nohri vi VÜWA vü tsü nü ma nüh küsuokürho sakümtseküsa ma kümtsezhehwa vü ru nü VÜWA nohri Saküüwuowa kütsü sataji jüvü nüh ma rüküshu küzewa tü nohri vünüh kürelera naveh,

⁹küpakenühnyunü nohri nüh VÜWA vü sühleru thuoüji nohri jienüri thi nohri atsari tü mari küsiri vünüh noküümze ngura nü azhih hala sheleru naküveh kenüh. Küpakenühnyunü VÜWA nohri Saküüwuowa tü lozhi thi külohnawa küsa kenüh, ma nyiehwa tü nohri vünüh küreleteküwawa nyu, mükütüküzü nohri nüh ma vü sühleru thuoüji,” ti küza.

¹⁰Jüti küsa vü azhühvüri tü Efraim anyu vü thi Manase vü, thi Zebulun küju anyuji vü wa; thitü mari nüh mari riesanü müküchieküzhü sa, thi mari riesa.

¹¹Asher nyiri, Manase nyiri, thi Zebulun nyiri pike mpa nüh mari mpa mari sakürünyie nü Jerusalem vü ru.

¹²Saküüwuowa ake tü Judah vü nga peh nü mari tü luoveh küsü tsü taji kajiwa thi kajitsari nüh VÜWA zhü vünüh azhütsü.

¹³Asa künyiawa ahzhi müküthse akhuwa sa nti anyiri khieloti kürü Jerusalem vü ru küsezhuh küji küsü sa.

¹⁴Mari tü küüroh sate nü Jerusalem vü küpeh kükhurüperi, thi arheküüngu kütso kükhurüpe aveh müzhüh nü mari nüh viwa Kidron anyuo vü vehjam.

¹⁵Jüti sanü mari nüh asa künyiawa rülo türamzüwa vü tsekükari nyihzhüwa fethe. Thi navüri thi Leviri tü saküzükrüm nü mari mpa mari sakümtse taji kütso kükhurüri VÜWA zheh lovü viru.

¹⁶Saküüwuowa nyiwa tü Mosa khonyowa müzhe nü mari tü mari küürohmüke navüri nüh mari nüh Levira ke vünüh azüh küviwa vikajake,

¹⁷küpakenühnyunü kümhu vü anyi hozake mari mpa mari samküümtse pehküveh kenüh; jükenüh VÜWA vü mütse na küsa kenüh müjiekümtseri aveh kenüh Leviri nüh tsekükari nyihzhü fethe naküveh kenüh,

¹⁸küpakenühnyunü anyiri shiejiwa, mari hozake wie nga Efraim vünüh, Manase vünüh, Issachar vünüh thi Zebulun vünüh ti mari mpa mari samküümtse nüh küsa kenüh, rhükütsüwa nyu nüh tsekükari zhiwa tsawie. Küpakenühnyunü Hezekiah nüh makeri’a nüh kükhuo sataji, “Kümhie VÜWA nüh küsüsü nojatsüluo,

¹⁹ma mpa nüh kümtsezhehwa kümtse wuhlehri mümzhe wie ketünga thari nüh luoveh vi Saküüwuowa, VÜWA ma para Saküüwuowa phah naveh ünüh nojatsüluo,” ta kükhuo kenüh.

²⁰Jüti kükhuo vü VÜWA nüh Hezekiah jikhi künatsü nü anyiri sakümhietsü.

²¹Thi Jerusalem vü küpeh Israel nyiri tü alo wiesheh nü rülo türü ahzhi müküthse alohse khuwa sa; jüti küsa vü Leviri thi navüri nüh VÜWA vü mari kükhra aveh vi nü rülorülo azah sataji VÜWA siake.

²²Hezekiah nüh VÜWA küüroh vü küüchü phrahte. Jükenüh anyiri tü rülo türü akhuwa ashie tsanü VÜWA ma pari Saküüwuowa vü kütsathuo kükhurü küsahthuo thi kümna tsü, ti sa.

²³Jüsevü kümhu ajü tü rülo türü akhu küpawa sa lehünti zhüküsü sa; jüti sanü mari tü rülo küpa türü alowie nü sa,

²⁴küpakenühnyunü Judah kajiwa Hezekiah nüh kümhuwa vü shüvotsazah anyie küsü thi nyihzhü anyie türü, thi kajitsari nüh kümhuwa vü shüvotsazah anyie küsü thi nyihzhü anyietürake kükhurü kenüh tsü. Jüti küsa vü navüri tü mari mpakhielohta sakümtse.

²⁵Jüti sanü Judah kümhuwa ajü, navüri thi Leviri, thi Israel vünüh tsezhu küru kümhu ajü, thi Israel azhih vünüh tsezhuküru küpriküzhüri ajü, thi küpriküzhüri Judah vü kürhori ti nyierakükhruo sa.

²⁶Jüti sanü Jerusalem vü nyierakhruo sheh, küpakenühnyunü Israel kajiwa David atsa Solomon tsotho vünüh nosü küju Jerusalem vü hakümjie küsü nga müküsa kenüh.

²⁷Jüti küsa vü navüri thi Leviri tü sühra nü tsia anyiri tsü, thi ma jikhiri tü künara nü mari kükhuo tü ma kümtse pe atülü vüru.