Read Pochuri Naga 2 KÜSHUKÜRAZHÜKU 35 Bible Online

2 KÜSHUKÜRAZHÜKU 35 - Pochuri Naga bible

2 KÜSHUKÜRAZHÜKU 35

¹Jüti sanü Josiah tü Jerusalem vünüh shuküwa sa; thi mari nüh asa pokhuwa rülo türamzüwa vü tsekükari nyihzhütsawa fethe.

²Ma nüh navüri tü mari küürohri vü chieke nü VÜWA zheh vü küsaküphra kenüh mari küchütsü.

³Thi ma nüh Israel aveh küsosie VÜWA vü kümtse Levirivü, “Kümtse kütsathuozhü küthseku tü David atsa Israel kajiwa Solomon nüh saküsa azhehwa vü saluo; nohri safü rügivü nüh mükhaluoketünga azhümnyiethuoh. Khinyi thuoüji VÜWA noh Saküüwuowa thi ma nyiri Israelri kütsü saluo.

⁴Nohri para zheh vünüh küsuoküsa müzhe nü Israel kajiwa David thi ma tsa Solomon nüh küjokütsü müzhe luo.

⁵Thi noh jienü apara zhehlo vü ariehkhuori vünüh anyiri nüh saküveh müzhenü kümtse zhiewa vü tsie luo, thi Leviri para zhehlo vü nyiküsüsü nga amüthoh tsüluo.

⁶Jüti sanü tsekükari nyihzhüzahwa fethe taji nohri mpa nohri sakümtse luo, thi VÜWA zhü Mosa vünüh küüzawa müzhe nü sana küsa kenüh nohri ajienüri kenüh küche luo,” ti küza.

⁷Jüti küsa vü Josiah nüh saküveh nyiri jüla pehküvehri aveh kenüh tsekükariri kükhurü vü aküthse nyihzhüzah thi nyihsütsa anyihnyih vünüh anyie cherake, thi shüvotsazah anyie küche; hamari aveh kajiwa zhi vünüh kheh wie.

⁸Thi ma kajitsari nga thsengüsheh nü anyiri vü navüri vü, thi Leviri vü thse. Hilkiah, Zekharia, thi Jehiel Saküüwuowa zheh vü lehvü küjiri nga tsekükari kükhurü kenüh navüri vü nyihzhüzah thi nyihsüzah anyie künyi nü müza türo thi shüvotsazah müza küche ti tsü.

⁹Konania nga, thi Shemaia, thi Nethanel ma nüri, thi Hashabia thi Jeiel thi Jozabad, Leviri lehvüri nga Leviri vü tsekükari kükhurüri kenüh nyihzhüzah thi nyihsüzah anyie münga thi shüvotsazah müza münga ti tsü.

¹⁰Küürohwa kenüh kücheju küm vü navüri tü mari ape vü tsie, thi kajiwa nüh azhükütsü müzhe nü Leviri tü mari chieküürüpevü tsü kheh.

¹¹Jüti sanü mari tü tsekükari nyihzhüzahwa fethe taji navüri tümari vünüh küvira azühwa küthejake küvehvü Leviri nüh fetheküsara sahu müzuo.

¹²Thi Mosa lasipha vü rhüküsa üta VÜWA vü khurü na küsa kenüh saküveh nyiri papara zheh riehkhuo sanü pehküvehri müzhe taji mari nüh jümari küsuotsü na küsa kenüh kütso kükhurüri küjike nü sa. Jükümjie mari nüh shüvotsazahri nga sa.

¹³Thi azhühkhori müzhe nü mari nüh anyih vünüh tsekükari nyihzhüzahwa rü; thi mari nüh kümtse kütsüri aküfüri vünüh shu nü shiti viwa saküveh nyiri vü tsü.

¹⁴Jüsevü mari tü mari mpa makeri’a nüh thi anavüri kenüh ti küche, küpakenühnyunü Aron atsa navüri tü kütso kükhurü kenüh thi aküthüri kenüh ti arüza küju pre küpeh kenüh; jükenüh Leviri tü mari mpa makeri’a nüh thi Aron atsa navüri kenüh ti küche.

¹⁵Asaf, Heman, thi kajiwa setsazhüküphrari Jeduthun nüh azhükütsü müzhe nü mari ape vü peh; thi akheri kühuori tü akherikheri vü peh; mari tü mari küüroh vünüh kari küwaleh nyunüh sa, küpakenühnyunü ma jienü Leviri nüh makeri’a nüh kücheküvehthuoh kenüh.

¹⁶Jükümjie vünüh kajiwa Josiah nüh azhükütsü müzhe taji tsekükari sana küsa kenüh thi VÜWA kükhurüpewa rügivü nüh kütso kükhurü ti sana küsa kenüh VÜWA küsaküphra aveh kenüh jüma rülo vü küche kheh.

¹⁷ Jüti sanü jüla pehküveh Israel nyiri aveh tü jüma tsothovü tsekükari wa sara, thi ahzhi müküthse akhuwa rülo türü sara.

¹⁸Samuel setsaküthsüwa tsotho vünüh nosü küju Israel vü tsekükari hakümjie vünüh müjie sa wie; Israel kajiri küsünga, Josiah, navüri, Leviri, Judah aveh, Israel pehküvehri aveh, thi Jerusalem vü küpehri tü hakümjie vünüh tsekükari akhu müsawie.

¹⁹Josiah kükaji mahvi türatüzeawa vü tsekükari akhuwa tü sara.

²⁰Zanyo hama aveh Josiah nüh kükhurüzhehwa kücheküm sevü Egypt kajiwa Neko tü Karkhemish vü Eufrates vü nüh saluo nti tsewa, thi Josiah tü ma sie saluo nti tsezhuwa.

²¹Thitü ma nüh zhühleküvüri ma vü küze taji, “Hiri tü küsünüh küsü vü mowa sa nti lo, Judah kajiwa? Hi tü nosü noh siesaluo nti tsemveh, thitü hi nüh azhehlo küsü sie saluo küvehwasie kürühnyuo nti kütse wie; thi hi tü pre üta Saküüwuowa nüh azhütsü. Hi siekütse Saküüwuowa küwuluo lem luo, ma nüh thama noh küüzorie kenüh,” ti küza,

²²jütawie ketünga Josiah tü ma vünüh küürelewa nyu, ma siesaluo na küsa kenüh ma tü ma mpa ma tso saküpa. Ma tü Saküüwuowa apo vünüh Neko azhüri müküna nüh sam nü Megiddo kütake vünüh arie vü nyitu.

²³Lawih küviri nüh kajiwa Josiah ka; thinü kajiwa nüh ma sieperivü, “Hi sietewaluo, küpakenühnyunü hi tü müsamnasheh kümthuohkenüh,” ti küza.

²⁴Jüti küüza vü ma sieperi nüh rawuhkheka vünüh ma shohzhu nü ma rawuh kheka akünyiawa lovü thse taji Jerusalem vü vüru. Thi ma tü süm nü ma para rükuri lovü nüh chohwum. Judah thi Jerusalem aveh nüh Josiah kenüh rümuo.

²⁵Jeremia nga Josiah kenüh kürümuo khi sa; thi azah küsapari thi küsa vühri nga mari kürümuo vü nosü küju nga Josiah phrahte tsewieveh. Mari nüh Israel vü hamari tü azhühkho küsü sa; halie, jümari tü kürümuori vü rhükesaveh.

²⁶Josiah nüh küürohkülih küsa küpari, thi ma nüh zanyo kümhie küsa müzhe nü VÜWA khonyo lovü mowa rhüsaveh ünüh,

²⁷thi ma küürohri, apo vünüh sehkhe küju, halie, jümari tü Israel thi Judah Kajiri Lasipha lovü rhüke saveh.