Read Pochuri Naga 2 KÜSHUKÜRAZHÜKU 6 Bible Online

2 KÜSHUKÜRAZHÜKU 6 - Pochuri Naga bible

2 KÜSHUKÜRAZHÜKU 6

¹Jüti küsa vü Solomon nüh, “VÜWA tü küzomthsüthsü vü kürho sanaveh ta ma nüh küza.

²Hi nüh noh kenüh saküümsie zheh küsü samthuoh, noh kenüh küsuokürho küürho azhie küsü,” ti küza.

³Jüti sanü Israel kümhuwa aveh tsieküveh vü kajiwa nüh sühlenü Israel kümhuwa aveh vü tsiatsü.

⁴Thi ma nüh, “Israel Saküüwuowa VÜWA tü kütsia küvüwa saluo, ma nüh eh pa David vü ma po vünüh küphrahzhuwa ma kenüh saju tsütaji,

⁵‘Hi nüh eh nyiri Egypt zhih vünüh küvizhu rülo vünüh nosü küju eh nyo sana küsa kenüh azheh küsü sa nta Israel kuohri avehvü anyuji küsü nga mürüka, thi eh nyiri Israel nyiehvü kaji küsana küsa kenüh nyi küsü nga hi tü mürüka;

⁶thitü hi nüh eh nyo sana küsa kenüh Jerusalem rükamthuoh thi ehnyiri Israel nyiehwa küsana küsa kenüh David rükamthuoh,’ ti küza.

⁷Jüti küsa vü Israel Saküüwuowa VÜWA nyo sana küsa kenüh azhehküsü sa nta eh pa David luoveh lovü tü.

⁸Thitü VÜWA nüh eh pa David vü, ‘Eh nyo kenüh azheh küsü sa nta noh luoveh lovü kütü jüma tü noh müshe mhie sheh;

⁹jütawie ketünga noh nüh azhehwa tü küsawa nyu, thitü noh tsa nohvü wuotsü na küsawa nüh azhehwa eh nyo kenüh sanaveh,’ ti küza.

¹⁰Khinyi thuoüji VÜWA nüh phrahzhu küsawa tü sajümthuoh; küpakenühnyunü hi tü eh pa David müthoh vü sühra nü VÜWA nüh phrahzhu küsa üta Israel kajipe vü shupeh küvehthuoh kenüh, thi Israel Saküüwuowa VÜWA nyo kenüh azheh küsü samthuoh.

¹¹Thi VÜWA nüh Israel nyiri sie kütsathuozhü saküsa kütsathuozhü küthseku hi nüh jüla savehthuoh,” ti küza.

¹²Jüti sanü Solomon tü Israel kümhuwa aveh küpeh vü VÜWASaküüwuowa kükhurüpe atüvü tsie nü ma ke künyi thsuozhu nü.

¹³Solomon nüh sahwuo kütsiepe küsü achu apie münga, kümza apiemünga thi kümsie apie küche ti sanü anyula vü sataji ma tüjüma rügivü tsie. Jüti sanü ma nüh Israel kümhuwa aveh pehküveh vünüh khotsü nü ma ke künyi atülü vü thsuoküze taji;

¹⁴ma nüh, O VÜWA Israel Saküüwuowa, atülü vü nyutü azhihvü nga Saküüwuowa noh kümjie, luoveh aveh vi noh tüvü kütse noh sieperivü kütsathuozhü küsa münyie luo;

¹⁵noh nüh noh siepewa David eh pa sie nü noh nüh ma vü küzhüchüh sajura; ah, noh nüh noh po nüh küphrahte sa thi nosü jüma nohke nüh sajutsü.

¹⁶Jükenüh khinyi thuoüji, O VÜWA, Israel Saküüwuowa noh nüh ma vü küphrahzhuwa noh siepe David eh pa vü saluo, noh nüh, ‘Noh nüh ehtüvü kütse üta mükütüküzü noh tsari nüh eh khonyo vü tsethi mari lehkhuji vü azhü mpa nüh zhüra ti thuoüji eh tüvü Israel kükajipe rügivü nyi küsü nga shumpeh nüh küsawa nyu ta phrahteke küsawa satüluo,’ ti küza.

¹⁷Khinyi thuoüji jükenüh, O VÜWA, Israel Saküüwuowa, noh nüh noh siepewa David vü küüza zhüwa tü sakümzho luo.

¹⁸Thitü Saküüwuowa tü anyiri sie azhih vü kürho satsanaveh ülo? Halie, atülü thi atülü kümsietsawa wie nga noh müküpehra nü; hi nüh azheh saküsawa thuoüji küzakele nga zahveh lo!

¹⁹Jüta wie ketünga noh siepewa kükhuo thi ma küzhiekezhiekhri chiekeluo, O VÜWA eh Saküüwuowa, noh siepewa nüh krie thi kükhuo küsa künatüluo;

²⁰noh notha tü arülo thi rüza aveh azheh hamawa, noh nüh noh nyo santa küphrahtezhu azhiewa vü ko peh nü noh siepewa nüh azhie hamawa vü kükhuo küsa künatüluo.

²¹Thi noh siepewa thi noh nyiri nüh azhie hamawa wuovü kükhuo küsavü mari küzhiekezhiekhri künatüluo; ah, noh kürho pe azhie atülü vünüh künaluo; thi noh nüh küünakera vü nojütsüluo.

²²Mükütüküzü nyi küsü nüh ma zhiephruwa vü khiemuom nü küüshie nta sataji azheh hama kükhurüpe vü ru nü küüshie tsa,

²³thuoüji noh nüh atülü vünüh küna nü satsü thi noh siepewa ashih saluo, müküleh küsari vü mari müküleh khuhke vi mari lüvü viru luo, thi künyitsari vü mari künyitsa müzhe taji ajisuo tsüluo.

²⁴“Mükütüküzü noh nyi Israelri nüh noh vü khiemuoküm kenüh mükünongüri atüvü cham, thi mari nüh sheleru taji noh nyo waküzaküthsü nü azheh hala nüh noh vü kükhuo sa thi zhiekezhiekhri thuoüji;

²⁵noh nüh atülü vünüh küna nü noh nyi Israelra kükhiemuo nojatsüluo, thi mari sie nü azhih mari vü thi mari pari vü kütsü azhihwa vü sie sheleru luo.

²⁶“Mari nüh noh vü khiemuo küm kenüh atülü tü kheketewa nü atsohmürü nüh sakümvü, mükütüküzü noh nüh mari saküümnomna vü, mari nüh azhie hama wuovü kükhuo sanü noh nyo küza küthsü taji mari kükhiemuo vünüh sühle thuoüji,

²⁷noh nüh atülü vünüh künatü taji noh sieperi, noh nyi Israelri müküleh nojatsü nü lehkhuji kümhie mari nüh mütsejimükümhie vi mari sosie thuoüji noh nüh azhih vi mari akaküvi nta kütsüwa vü atsorü tsüluo.

²⁸“Mükütüküzü azhihwa vü kümkhuojih pehm, mükütüküzü sahna kümsü nyutü arükütu nyutü akhümiküka nyutü ashukrie nyutü akrevüh pehmthuoüji; mükütüküzü mari mükünongüri nüh mari nyuji wuori wu; sanakükho küsüküsü nga, küsaküna küsüküsünga peh wietü,

²⁹kükhuo küsüküsü nga, küzhiekezhiekhri anyi küsüküsü nga nüh nyutü Israel nyiri aveh nüh, ma mpa ma sakümnomna, thi ma mpa makülorü thsü nü azheh hama wuovü ma ke thsuoke thuoüji;

³⁰noh kürhope atülü vünüh künatü nü nojatsü thi ma lehkhujiri thsütsü taji noh nüh mari luoveh thsükütsü üta satsüluo (küpakenühnyunü noh tü, noh wie nüh anyi atsari luoveh küthsü kenüh);

³¹jüta küsa vünüh mari tü noh nüh hiri pari vü azhih kütsüwavü kürho rülo aveh vü noh krü thi noh lehkhujiri vü tse naveh.

³²“Jükümjie üta alienyiri, noh nyi Israelri mükünyu anyu lehküsuo vünüh noh nyo küjiwa, noh ke kümzhowa, thi noh pieküthsuozhu kenüh ru, thi ma nüh ru nü azheh hama wuovü kükhuosa ti thuoüji,

³³noh kürhope azhie atülü vünüh künatsü nü alienyiri nüh nohvü küji kümjie müzhe taji aveh satsüluo; jüti küsa vünüh azhih vü nyiri aveh nüh noh nyi Israelri kümjie noh nyo thsüranü noh krü naveh; thi jüti sanü mari tü hi nüh azheh saküsahamatü noh nyo vünüh ji ta küsa thsüra naveh.

³⁴“Mükütüküzü noh nyiri nüh mari mükünongüri siesaluo nta arieküsa vü wa thuoüji, noh nüh mowa lehkhuji vünüh mari küzanaveh ünüh, mari nüh noh vü, anyuji noh nüh rükaküsa hama thi noh nyo kenüh hi nüh azheh saküsawa wuovü kükhuo sa thuoüji,

³⁵noh tü atülü vünüh mari kükhuo thi mari küzhiekezhiekhri künatsü nü mari kümshowa satsüluo.

³⁶“Mükütüküzü mari nüh noh vü khiemuom, küpakenühnyunü nyiküsü nga kükhiemuo müküsa mükünyie kenüh, thi noh nüh marivü arüshum nü mari vi mükünongüri küsü vü tsüm taji aküsisa azhih küsuo vü saluo nyutü küshehnyi vü saluo sietewa;

³⁷jüüta wieketünga mari nüh mari si küwa azhih vünüh mari luoveh lovü thse nü khaphrü taji mari si küwa azhihwa vünüh noh vü zhiekezhiekhri nü, ‘Hiri nüh khiemuomthuoh, thi küreletewathuoh, thi khukekümsü samthuoh,’ ta küza,

³⁸mükütüküzü mari nüh mari siteküwa mari aküsi küsa azhih vünüh mari kümshe aveh vi thi mari luoveh aveh vi nü khaphrü taji, mari azhih noh nüh mari apari vü kütsü, noh nüh anyuji rüka küsa, thi noh nyo kenüh azheh saküsawa wuovü kükhuo sathuoüji,

³⁹noh nüh kürhope atülü vünüh mari kükhuo thi mari küzhiekezhiekhri künatüluo, thi noh vü khiemuo küm noh nyiri müküleh nojatsü nü mari kümshowa satsüluo.

⁴⁰“Khinyi, O! eh Saküüwuowa, noh notha tü ko luo thi azhih hama wa vünüh kükhuo küsawa vü noh khüna kümrheke luo.

⁴¹“Thi khinyi thuoüji sühraluo, O VÜWA Saküüwuowa, thi noh kümnyie pe azhiewa vü waluo, noh thi noh kükhrakümzho kütsathuozhü küthseku. Noh navüri O VÜWA Saküüwuowa, küülole vi küüzhute luo, thi noh kümtseri tü noh kümhiewa vü nyieraküükhruo luo.

⁴²O VÜWA Saküüwuowa, noh nüh thsekümwa anyiehmüküürele tümluo! Noh siepewa David kenüh noh mükükhaphrükhale küümze müsheluo,” ti küza.