Read Pochuri Naga 2 KÜSHUKÜRAZHÜKU 7 Bible Online

2 KÜSHUKÜRAZHÜKU 7 - Pochuri Naga bible

2 KÜSHUKÜRAZHÜKU 7

¹ Solomon nüh ma kükhuo küsa akhe sam ünü atülü vünüh anyih turu nü kütso kükhurüwa thi küsahthuowa tsoküram taji VÜWA kütholathovü tü kükhurüzhehwa protewa.

²Thi anavüri tü VÜWA zheh lovü mütura nüh sam, küpakenühnyunüVÜWA kütholathovüwa tü VÜWA zheh proteküwa kenüh.

³ Israel tsari nüh anyih tsuohtsa küturu thi kükhurüzheh rügivü VÜWA kütholathovü küturu küngu vü mari tü mari anyieh atela azhih vü küngietsuo nü VÜWA khurü thi kümna tsü taji, “küpakenühnyunü ma tü kümhie kenüh, ma mükükhaphrükhale küümze tü küsuokürho küzhikeveh,” ti sa.

⁴Jüti küsa vü kajiwa thi nyiri aveh tü VÜWA tüvü küsahthuokükhurü sa.

⁵Kajiwa Solomon nüh shüvotsa anyie müzake nü mükeke vi küsahthuokükhurü sa. Jüti sanü kajiwa thi anyiri aveh nüh Saküüwuowa zhehkümüthü sa.

⁶Anavüri nüh mari atovühri vü tsie; Leviri nga kajiwa David nüh mari nasa vünüh küsiake kükhurü küsa vü VÜWA vü kümnakütsü kenüh saküsa azah kenüh atsokrüri vi nü tsie, küpakenühnyunü ma mükükhaphrükhale küümze tü küsuokürhoküzhike küveh kenüh; mari küwiejie wuovü anavüri nüh tsie nü atütü khu; thi Israel aveh nüh sühra kütsie sa.

⁷Thi Solomon nüh VÜWA zheh atüvü küpeh anyula zhilawa sakümtse; jüla nüh ma nüh kütso kükhurü thi aküthü vi kütsathuokükhurüri sa, küpakenühnyunü Solomon nüh küsa asahwuo kükhurüpewa tü akütso kükhurü, atha kükhurü thi aküthü vi kükhurü müküluo kenüh.

⁸Jüma tsotho vü Solomon thi Israel aveh tü ma sie nü müza ashieji Hamath lehpie vünüh Egypt kutso küju sanü rülo türü akhu sa.

⁹Thi rülo tüzeawa thuoüji mari tü küükheke kümhu küsü vi; küpakenühnyunü mari nüh kükhurüpewa kenüh kümthü rülo türü thi akhu kenüh rülo türü ti küvi kenüh.

¹⁰Asa türüawa rülo mükeke nü küche vü ma nüh anyiri tü mari zhehvü küzem, VÜWA nüh David, Solomon thi ma nyi Israelri vü kümhieküütsa kenüh luoveh lovü nyiehrakhruo thi alowie nü tewa kheh.

¹¹Hakümjie vünüh Solomon tü VÜWA zheh thi kajiwa zheh mülahra; Solomon nüh VÜWA zheh vü sana küsa thi ma mpa ma zheh vü sana küsa kürüzhe aveh küsara vünüh sajura.

¹²Jüsevü VÜWA nüh arüza vü Solomon vü küüngu taji ma vü, “Hi nüh noh kükhuo künarathuoh, thi hi mpa eh kenüh azhie hama küsahthuo zheh küsü vünüh rükamthuoh.

¹³Hi nüh atülü khetem nü atsoh mürü nüh samthuoüji, nyutü azhihwa küzorie nta ashukrie vü azhütsü, nyutü eh nyiri azavü sahna kükho küze ti thuoüji,

¹⁴mükütüküzü eh nyiri eh nyo küjiri nüh mari mpa mari sakürünyie taji kükhuo sa thi eh tso phah nü mari khukekümsü vünüh sühle thuoüji hi nüh atülü vünüh künatsü nü mari kükhiemuo nojatsü thi mari azhih sakümhietsü naveh.

¹⁵Khinyi thuoüji eh notha tü ko nathuoh thi azhie hala nüh kükhuo küsa vü akhüna kümrheke nathuoh,

¹⁶küpakenühnyunü khinyi thuoüji küsuokürho eh nyo sana küsa kenüh hi nüh azheh hama rüka thi sakümtse kümthuoh kenüh; eh notha thi eh luoveh tü atsotho aveh jüla pehmnathuoh.

¹⁷Thitü noh kenüh thuoüji, noh pa David kümjie mükütüküzü noh nüh eh tüvü tse nü hi nüh noh vü azhükütsü aveh müzhe taji eh zhühkheri thi eh zhühkhori sara ti thuoüji,

¹⁸hi nüh noh pa David sie kütsathuozhü saküsa üta hi nüh noh kajipe aküjiwa vizhutsü naveh, hi nüh, Israel takrü sana küsa nyiküsü nga nüh noh küsazihwa nyu, ti küza.

¹⁹Thitü mükütüküzü noh nüh anato vü tseke nü eh zhühkhe thi eh zhükütsü hi nüh noh tüvü küsari kulem taji wa nyiaza küpari kütsü sa thi khurü, ti sa thuoüji,

²⁰hi nüh nohri tü hi nüh nohri vü azhih tsü küsa hama, thi eh nyo kenüh hi nüh sakümtse küsa azheh hamawa vünüh mütajam naveh, hi nüh eh notha vünüh vijam nü anyiri aveh azah vü zhüku küsü küüsa thi küüphranyuohm naveh.

²¹Thi azheh hama, sakümsie küsawa tü anyi aveh nüh kütsuokükhruküsari nüh ngu nü ngo taji, Mokenüh VÜWA tü azhih hamawa vü thi azheh hamawa vü hakümjie samlo? ta küsanaveh.

²²Jüti sanü mari nüh, küpakenühnyunü mari nüh ma pari VÜWASaküüwuowa Egypt zhih vünüh mari siezhuküruwa kulem nü küpa nyiazari küjehkemthuoh, mari khurü thi mari kütsü sakümthuoh kenüh; jükenüh ma nüh zanyo kümsü hamari aveh mari rügivü viru vehthuoh; ta küza naveh,” ti küza.