Read Pochuri Naga 2 KÜSHUKÜRAZHÜKU 9 Bible Online

2 KÜSHUKÜRAZHÜKU 9 - Pochuri Naga bible

2 KÜSHUKÜRAZHÜKU 9

¹ Jüti küsa vü Sheba kajivühwa tü Solomon kütholah künara nü ma müte no nti akükhozhü küünari vi nü Jerusalem vü ru, ma küükrari khielohti arheküüngu müchuh küvü küsuosa, suna thi ame kükhra loh hozake ti vi nü ru. Ma nüh Solomon vü ru ünü ma nüh ma müshelovü kütü aveh küza kheh.

²Thinü Solomon tü ma nüh küüna aveh rületsü kheh; jüti küsa vü Solomon nüh kürüle müsara nüh ma vünüh küthi küm zanyoküsü nga münyie nüh sa.

³Thi Sheba kajivühwa nga Solomon kümahtsa, ma nüh azheh saküsa,

⁴ma shiekütsape rügivü ma shie, ma küjiri ape küpeh atso, ma sieperi nüh ma küno, thi mari thsümnyi küsari, ma huothsekütsüri, thi mari thsümnyi küsari, ma nüh VÜWA zheh vü kütso kükhurü küsari ti küngu vü ma vü asietse mütü nüh satewa.

⁵Jüti küsa vü ma nüh kajiwa vü, “Hi nüh eh zhih vünüh noh kürohri zhühke küünara tü azhütsathuoh,

⁶thitü hi tü ru nü hi mpa eh notha nüh müjie küngu küju nü azhükewa tü mütsotü nüh sa; thi halie, noh küji küzhila thuoüji künara müsa, hi nüh azhühke küünara nyieh vünüh nohtü küluohveh.

⁷Noh nyiri thuoüji aloküzheri! Noh siepe hamari tü aloküzheri, mari tü mükütuo wiethuoh nüh noh tüvü tsie nü noh kümahtsa künara!

⁸VÜWA noh Saküüwuowa nüh noh vü nolo thi VÜWA noh Saküüwuowa kenüh noh tü kaji küüsa nta ma kajipe rügivü sa! küpakenühnyunü noh Saküüwuowa tü Israel loküm kenüh thi ma nüh küsuokürho mari nyiehvü kaji küsamthuoh,” ti küza.

⁹Jüti sanü ma nüh kajiwa vü suna küüto anyie müzü küüluoh, arheküüngu hozake, thi amekürhe lohri ti tsü: Sheba kajivühwa nüh arheküüngu kajiwa Solomon vü kütsü üta nü münyiekreke wie.

¹⁰Jüma nyiehvü nga Huram sieperi thi Solomon sieperi nüh Ofir vünüh suna viküruri nüh rhenguthsoh thi amekürhe lohri viru.

¹¹Thi kajiwa nüh rhenguthsoh vi nü VÜWA zheh pahtiri thi kajiwazhehri, topito nga thi azah küsari kenüh atakhuri nga ti sa; jüma tüvü Judah azhih vü jükümjie küsari piketü müngu.

¹²Thi kajiwa Solomon nüh Sheba kajivühwa vü ma nüh viküruri küchie nüh ma nüh kümngu, ma nüh kükhuo aveh tsükheh. Jüti sanü ma tü sühle taji ma sieperi sie nü ma mpa ma zhihvü shele tewa.

¹³Jüti küsa tsothovü mahvi küsü vünüh suna ma küüzho Solomon vüküru küüto anyie mükeke nü küche kümjie ru;

¹⁴jüma nyiehvü nga azanyoküzhuri thi asüküsari ti nüh viküru; thi Arabia kajiri thi azhih jüla kümkhrüri aveh nüh Solomon vü suna thi rakasa viru.

¹⁵Kajiwa Solomon nüh suna küütsüh nüh vi ajoh huo kükajü müzakünyi sa; ajoh huo küsü vü suna küüto türü tu;

¹⁶ma nüh suna kütsüh vi nü ajoh huo müza küche sa; ajoh huo küsüvü suna akre müza küche tu; thi kajiwa nüh jümari vi Lebanon Küze Zheh lovü sa.

¹⁷Kajiwa nüh satürü kajipe küji küsü sanü suna alatha vi nü küzhute.

¹⁸Kajiwa tü apahti türo thi suna jinyipe küsü ti peh, jümari tü kajipewa sie küpeke, thi ape anato künyikhürü wuovü apiekükhahkepe sa thi amiewuo künyi kütsie apie kükhahkepe künyi nato vü sake,

¹⁹amiewuo türakünyi nüh jüla tsie, apahti türo rügivü pahti pohte küsüsü vü küsüsü sa. Haküthse kajipe küsü vü nga piketü müngu wie.

²⁰Kajiwa Solomon juhküzhuku aveh tü suna nüh sa kheh, thi Lebanon Küze Zheh ahuokhu aveh tü suna latha nüh sa kheh; Solomon tsotho vü rakasa tü zanyoküsü nga mükünyu kümjie sa,

²¹küpakenühnyunü kajiwa juhieri tü Huram sieperi sie nü Tarshish vü wa, mahvi küche vü küsüsükeri Tarshish juhieri tü suna, rakasa, satürü, anguri, thi arari vü ruruti.

²²Hakümjie vünüh kajiwa Solomon tü azhih vü kajiri aveh nyiehvü künyirhie nga thi kümahtsa nga küüluoh sa.

²³Thi azhih vü kajiri aveh nga, Saküüwuowa nüh Solomon müshe lovü thsekütsü kümahtsa küna nti ma küpehpe phah.

²⁴Mari nyi küsüsü wie nga ma kütsüsuo rakasa, suna thsümnyiri asierhe, küüngukümie, arawuhri thi rawuhküzahwari ti khielohta vinü mahvi kürüzhu ruruti.

²⁵Thi Solomon tü arawuhri thi rawuhkhekari kenüh azheh anyie müzü, thi rawuh anyie türakünyi ma nüh jümari vi rawuhkheka anyujiri thi Jerusalem vü kajiwa vü ti sa.

²⁶ Jüti sanü ma nüh Eufrates vünüh Filistinra zhih küju, thi Egypt rüshu küju kajiri aveh nyiehvü takrü sa.

²⁷Thi kajiwa nüh Jerusalem vü rakasa tü aloh kümjie muomuoküngura, thi amüse tü khielohti saküzhi nü Shefelah rürüvithsoh kümjie satsü.

²⁸Thi Solomon kenüh rawuhri tü Egypt vünüh thi azhih aveh vünüh süvi.

²⁹Solomon nüh küsa küpari, apowa vünüh sehkhe küju Nathan setsaküthsüwa zhühku vü, Shilonwa Ahija setsaküthsüzhü vü, thi Iddo setsazhüküphrawa Nebat atsa Jeroboam kenüh kümohtsari vü rhümsa ülo?

³⁰Solomon tü Jerusalem vü mahvi zürake Israel aveh nyiehvü kükajisa.

³¹Thi Solomon tü ma pari sie nü zehtewa taji ma pa David nyujiwa vünüh ma chohwum, thi ma tsa Rehoboam nüh ma müthoh vünüh kükaji sa.