Read Pochuri Naga EZRA 3 Bible Online

EZRA 3 - Pochuri Naga bible

EZRA 3

¹Asa türüawa ru ünüh Israel atsari tü nyujiri vü pehteküwavü, anyiri tü küsü vünüh Jerusalem vü sezhuhtewa.

²Jüti küsa vü Jozadak atsa Jeshua tü ma lühpuo navüri, Shealtiel atsa Zerubbabel thi ma küshuküra nyiri sie nü sühra taji Saküüwuowa anyi Mosa Khonyo vü rhüküsa üta kütso kükhurüri sa nta küsa kenüh Israel Saküüwuowa kükhurüpewa sa.

³Azhih jüla anyiri kükrü mari vü küpeh kenüh mari tü kükhurüpewa ma mpa ma pe vü sa, jüti sanü mari nüh arüne thi arüza jüma rügivü nüh VÜWA vü kütso kükhurüri sa.

⁴Thi rhüküsa üta mari tü aphrüri akhu sanü rülorülo müvijimkümhie azhühkhowa küürüh müzhe taji rülorülo kütsokükhurüri sa,

⁵ jüma sevü müküütuo kütso kükhurüri, asa kürüthe vü kükhurüri, küteke küsa VÜWA akhuri, thi nyi küsüsü VÜWA vü loküzhe küthse kükhurüri.

⁶Asa türüawa kütsü VÜWA vü mari nüh satewa. Thitü VÜWAkükhurüzhehwa ape thuoüji müjie khake wie.

⁷Jüti sanü mari nüh ame vi alohzhehküsari thi athsohzhehküsari vü tsü, thi Persia kajiwa Sairas nüh kütsü üta Lebanon vünüh juhküji Joppa vü viru na küsa kenüh ashie, aküzhu, thi vüjuh ti vi nü Sidonri thi Tair ri vü tsü.

⁸Jüti küsa vü mari tü Saküüwuowa zheh Jerusalem vü küru mahvi künyiawa asa künyiawa Shealtiel atsa Zerubbabel thi Jozadak atsa Jeshua masü nüh, mari jienüri aveh, navüri, Leviri, thi aküsiküsa vünüh shele Jerusalem vü küru aveh ti kürü nü küsate küsüsa. VÜWA zheh vü küürohwa note na küsa kenüh mari nüh Leviri mahvi mükeke vünüh wiehvü küchieke sa.

⁹Thi Jeshua tü ma tsari thi ma küshuküranyiri, Kadmiel thi ma tsari, Judah atsari ti kürü nü Henadad atsari thi Leviri, ma tsari thi küshuküra nyiri sie nü Saküüwuowa zheh vü küüroh nyiri küno sa.

¹⁰ Azhehküsari nüh VÜWA kükhurüzhehwa ape khake ünü, anavüri tü Israel kajiri David nüh küjokütsü müzhe nü mari navükruzhuri thse taji atütü vi, thi Leviri, Asaf atsari nüh VÜWA siake na küsakenüh Küüchirü khuri vi ti sa;

¹¹jüti sanü mari tü sahzhihluo nü azah sa, VÜWA siake thi kümnatsü ti sataji, “Ma tü mhieküm kenüh küpakenühnyunü ma mükükhaphrükhale küümze tü Israel vü küüzhike kenüh,” ti sa. Mari nüh Jüta VÜWA küsiake vü anyiri aveh tü khielohta aküzie sa, küpakenühnyunü VÜWA zheh apewa tü khakekümthuoh kenüh.

¹²Thitü anyiri hozake nüh nyiehrakhruo nü zie wie ketünga azheh apokhuwa nguküm navüri, Leviri, apara zhehlori vü alüri thi kükhruori hozake tü azheh hama ape kükhake küngu vü zie kümsiesheh nü kriete küwa sa;

¹³jükenüh anyiri tü anyiri nüh kükrie jikhi vünüh nyiehrakükhruo jikhi thsü mküpara nüh sa, küpakenühnyunü anyiri nüh khielota küzie kenüh ajikhiwa tü alehküsuo vünüh küünara kenüh.