Read Pochuri Naga EZRA 6 Bible Online

EZRA 6 - Pochuri Naga bible

EZRA 6

¹Jüti küsa vü Darius kajiwa nüh awuleh küsü sanü Babilon vü lasi küsape zheh vü lasi rhüküsari lovü aküphah sa.

²Thi Media anyu vü küpeh Ecbatana nyuji vünüh külulasi küsü phahra nü jüla rhü küsa: “Zhüküsü küsa.

³Sairas kajiwa mahvi pokhuwa vü Sairas kajiwa nüh küphrahzhu küsü tsü taji: Jerusalem vü Saküüwuowa zheh kenüh thuoüji, küsahthuo kükhurü küsa thi kütso jüma tü küüsale luo; makümsie apie mükeke nü türü thi aveh apie mükeke nü türü,

⁴aziewa tü aloh küjiji küche küüsho anyieh aveh vü azheh thsoküsüsü thse naveh; ma küsa amewa thuoüji kajira künyirhieku vünüh thuo naveh.

⁵Thi Saküüwuowa zheh Jerusalem vü küpeh kükhurüzhehwa lovü kütü suna thi rakasa küfüküjuhri Nebukhadnezzar nüh vizhu tewanü Babilon vü vi teküruri vile nü jümari küsüsü mari küsapevü vi shuhru Jerusalem vü küpeh kükhurüzhehwa lovü samle luo,” ti küza.

⁶Jükenüh khinyi thuoüji Rühgu Tuwuovü anyu kümkhrüwa Tatenai, Shetharbozenai, thi Rühgu Tuwuovü anyu vü küpeh nohri sie küsüküsa kümkhrüri tü küületsuom luo;

⁷Saküüwuowa zheh hama küüroh wa tü jüti vünüh küsam luo; Judahri kümkhrüri thi Judahri sierhüri tü Saküüwuowa zheh hama ma mpa mape vü küsam luo.

⁸Jüma nyievü nga Judahri kükhruo hamari kenüh mowa noh nüh sanaveh ünüh Saküüwuowa zheh küsalewa kenüh hi nüh küphrahzhuküsü sathuoh; küsame anyi hamari vü kütsü thuoüji kajira ameküturu, anyu lehkhrü Rühgu tuwuovü nüh küviwa vünüh müküzhike tü tsümluo.

⁹Jerusalem vü anavüri nüh müviji mükümhie üta mari nüh müviji mümhie thuoüji shüvotsazah kürünguo, nyihzhüvo, nyutü nyihzhü atülü vü Saküüwuowa vü tso nü kükhurü kenüh, thi hiemtha amütsü, akhah, nyutü vüjuh, ti müle nüh rülorülo mari vü tsü peh huo luo,

¹⁰jüti küsa vünüh mari tü aloküwie küsahthuori sanü atülüvü Saküüwuowa tsüra naveh, thi kajiwa thi ma tsari kenüh kükhuosara naveh.

¹¹Jüsevü nga hi nüh küphrahzhu küsü kütsü lehü thuoüji mükütüküzü nyi küsü nüh azhükütsü hama khaphrüm thuoüji mazheh vünüh atovüh küsü lozhum nü ma tü jüma rügivü huthuomtaji ma zhehwa tü kükuhshiepe küsam luo.

¹²Kaji küsüküsü nga nyutü anyiri thawa nüh hama khaphrü nta, nyutü Jerusalem vü pehküveh Saküüwuowa zheh zorie nta ake küsüthsuozhu naveh ünüh ma nyo jüla küüpeh nta küsawa Saküüwuowa nüh vijakümwa saluo. Hi Darius nüh küphrahzhu küsü saveh; hamatü azhüzhüsheh nü saluo, ti küza.

¹³Jüti küsa vü Darius kajiwa nüh azhü küüze müzhe nü Tatenai, Rühgu Tuwuovü anyu kümkhrüwa, Shetharbozenai, thi masüküsü sanü küürohri tü Darius nüh azah kütsü aveh azhüzhü nü sa.

¹⁴ Thi Judah kükhruori tü Hagai setsaküthsüwa thi Iddo atsa Zekharia masü nüh setsaküthsüzhü küphra vünüh azhehwa sanü kütsarhie sa. Mari tü Israel Saküüwuowa nüh azhükütsü thi Sairas thi Darius thi Persia kajiwa Artaxerxes mari nüh küphrahzhukütsü vünüh mari azhehwa tü sajura;

¹⁵jüti sanü azheh hamatü asa türakünyiawa rülo kücheawa, Darius kajiwa kükaji mahvi türoawa vü sajura.

¹⁶Jüti küsa vü Israel nyiri, anavüri, Leviri, thi anyiri küsisatewanü sheleteküruri aveh nyierakhruo nü Saküüwuowa zheh hama müthü taji aloküzhe sa,

¹⁷mari nüh Saküüwuowa zheh hama kümthü vü Israel kuohri küürühmüzhe nü shüvotsazah müzake, nyihzhüvozah müza künyi, nyihzhüzah müza müzü, thi Israel aveh kenüh kükhiemuo kükhurükenüh nyihsüvo türakünyi ti mari nüh tsü.

¹⁸Thi Mosa lasipha lovü rhüküsa üta Jerusalem vü Saküüwuowa küürohkülih kenüh mari nüh navüri chiekürüpe küsari vü vithse thi Leviri vi mari ape vü sa ti sa.

¹⁹Asa pokhuwa rülo türamzü vü anyiri küsi satewa nü sheleküruritü tsekükari khu sa,

²⁰küpakenühnyunü navüri thi Leviri tü mari mpa nüh mari saküsüthanü mari aveh tü sakümtse küm kenüh. Jüti sanü mari tü aküsi sanü sheleteküruri aveh kenüh thi mari lühpuo navüri kenüh, thi mari mpa makeri’a nüh ti tsekükari nyihzhüwa fethe;

²¹jüma tü aküsi vünüh sheleteküru Israel nyiri, thi Jüsevü nga mari vü nyi küruri aveh nüh tsanü VÜWA Israel Saküüwuowa khurü nti azhih jüla mükümtse nyiri vünüh ma mpa nüh athuosatewa.

²²Jüti sanü mari tü ahzhi müküthse akhu nyiehrakükhruo tirülo türü sa; küpakenühnyunü VÜWA nüh mari nyiehrasaküükhruotsü taji Assiria kajiwa luoveh mari vü saküürelekütsü kenüh, jüti sanü mari Israel Saküüwuowa zheh sa.