Read Pochuri Naga EZRA 8 Bible Online

EZRA 8 - Pochuri Naga bible

EZRA 8

¹Hamari tü ma pari zhehlora lüri, thi hama tü hi sie Babilon vü, Artaxerxes kajiwa nüh kükaji tsotho vü nyi kükhruküthsoküzhiri.

²Finehas atsari Gershon. Ithamar atsari Daniel. David atsari Hatuo,

³Shekaniah tsari. Parosh tsari Zekharia, ma vü sie zhükeküsa nyimpari müzake tünyieke.

⁴Pahatmoab tsari, Zerahia tsa Eliehoenai, thi ma vü nyimpari müzakünyi.

⁵Zatu atsari, Jahaziel atsa Shekaniah, ma vü nyimpari müza küche.

⁶Adin atsari, Jonathan atsa Ebed, ma vü nyimpari tünyieke.

⁷Elam atsari, Athalia atsa Jeshaia, ma vü nyimpari rürake.

⁸Shefetia atsari, Mikhad atsa Zebadia, thi ma vü nyimpari zerakeru.

⁹Joab atsari, Jehiel atsa Obadia, thi ma vü nyimpari müza künyinü türatüze nyiru.

¹⁰Bani atsari, Josifiah atsa Shelomit, thi ma vü nyimpari müzaküsü nü rorake nyiru.

¹¹Bebai atsari, Zekharia, Bebai tsa, thi ma vü nyimpari mükeke nütüze nyiru.

¹²Azgad atsari, Hakotan atsa Johanan, thi ma vü nyimpari müzaketürake nyiru.

¹³Adonikam atsari asevü nüh küruri mari anyori tü Elifelet, Jeuel, thi Shemaia, thi mari vü nyimpari rorake nyiru.

¹⁴Bigvai atsari, Uthai thi Zekhur, thi masü vü nyimpari rürakenyiru.

¹⁵Ahava vü liküwa rühgu vü hi nüh mari saküsezhuh nü hiri jüla rülo küche kürünape sapeh. Hi nüh jüla anyiri thi navüri noküüzele vü Levi atsa nyimpari küsü nga mphahra nüh sa.

¹⁶Jüti küsa vü hi nüh wuori küze nü sierhüsiewu küsa nyiri: Eliezer, Ariel, Shemaia, Elnathan, Jerib, Elnathan, Nathan, Zekharia, thi Meshulam, Joiarib thi Elnathan ti küüji,

¹⁷jüti sanü hi nüh mari tü Iddo, Kasihia azhievü sierhüsiewu anyiwa vü küze nü ma vü thi ma jienü kükhurüzheh sieperi vü mowa küza naveh ünüh mari vü küza taji azhie Kasifia vünüh Saküüwuowa zheh kenüh anavüri hiri vü küze luo ti küza küze.

¹⁸Thinü hiri Saküüwuowa ake kümhiewa nüh hiri vü Israel atsa, Mali atsari Levi atsa anyo vünüh Sheribia azhüküzhüri küsü thi ma tsari thi küshuküranyiri ti mari türatüze küze;

¹⁹jüsevü nga Hashabia thi ma nyiri thi ma tsa nyimpari ti mükeke;

²⁰kükhurüzheh sieperi müza künyi nü mükeke anyiehvü nüh David thi ma küjiri nüh Leviri küno kenüh athuo sasam. Hamari aveh nga anyo vünüh sasaveh.

²¹Hiri tü Saküüwuowa tüvü hiri mpa nüh, hiri atsari nga, thi hiri zanyori aveh nga sakürünyie nü hiri mpa hiri kenüh ma vünüh lehkhuji kümshowa phah na küsa kenüh Ahava rühgu vünüh assaküsa hi nüh zhüchüh,

²²küpakenühnyunü hiri lehkhuji vü kenüh hiri mükünongüri vünüh hiri rükie na küsa kenüh arienyiri thi rawuhnyiri riekhuo küsükajiwa vünüh khuo naküsa küzükrü kenüh; hiri nüh, “Saküüwuowa ake tü ma küphahri aveh vü kümhie peh, thi marüküshu kükhrawa tü ma kükuleri aveh vü pehveh ti küsa kajiwavü küüza kenüh,” ti küza.

²³Jükenüh hiri tü hama kenüh assa sanü Saküüwuowa phah, thi ma nüh hiri kükhuo künatsü.

²⁴Jüsevü hi nüh sierhüsiewu küsa anavüri türakünyi athuo sasa: Sherabia, Hashabia, thi masü küshuküra nyiri türake masü vü küthsesa.

²⁵Thi Saküüwuowa zheh kenüh kajiwa nüh, ma shikekütsüri nüh mavüwari, thi Israel aveh nüh kütsü rakasa, suna thi küfüküjuhriti küte nü navüri vü tsü;

²⁶hi nüh mari ke vü rakasa rhieküto mükeke nü künyi, rakasaküfüküjuh küüto rürake, thi suna küüto anyie küche nü müzamzüküte taji thse,

²⁷suna ake mükeke, küüto tüze küüluoh, thi aküfü, asahwuo ma me suname kükhra zake nüh küsa künyi.

²⁸Jüti sanü hi nüh mari vü, “Nohri tü VÜWA vü mütham, thi küfüküjuhri tü mütham; rakasa thi suna tü loküzhe vünühVÜWA, nohri para Saküüwuowa vü kütsü.

²⁹Nohri nüh VÜWA zheh küshothuo lovü nüh navüri Leviri, thi Jerusalem vü Israel zhehlori para lüri tüvü nüh jümari müjieküüte küju nü jümari huote thi note luo,” ti küza.

³⁰Jüti sanü jümari vü Saküüwuowa zheh Jerusalem vü viru na küsakenüh navüri thi Leviri nüh rakasa, suna thi küfüküjuh küüterivike küvi sa.

³¹Thi hiri tü Jerusalem vü wa na küsa kenüh Ahava rühgu vünüh asa pokhuwa rülo türakünyi vü tseshutewa; Saküüwuowa ke tü hirivü peh nü mükünongüri ake vünüh thi lehkhuji vü aküwu vünüh ti hiri vizhutsü.

³²Hiri Jerusalem vü ru nü jüla rülo küche pehtewa.

³³Rülo müzüawa vü Saküüwuowa zheh lovü nüh rakasa, suna thi küfüküjuhri tü Uriah tsa Meremot navüwa, thi Finehas atsa Eleazar nga ma sie peh nü, thi ma sü vü Leviri, Jeshua atsa Jozabad, thi Binui atsa Moadia ti nyi peh nü küte.

³⁴Aveh nga kürüh taji küte, thi küüte aveh nga zhüke kheh.

³⁵Jüma tsotho vü re nü teküwa aküsi küsa sheleteküruri nga Israel Saküüwuowa vü Israel aveh kenüh shüvotsazah türakünyi, nyihzhüvo guhrake nü türo, nyihzhüzah rürake nü türü tso nü kükhurüri sa; thi kükhiemuo kükhurüri nyihsüvo türakünyi tsonü khurü; hamari aveh nga VÜWA vü kütso kükhurü sa.

³⁶Jüma sevü nga mari tü kajiwa küphrahzhuri vi kajiwa kükhu vü küpehri thi Rühgu tuwuovü anyu kümkhrüri vü tsü; jüti sanü mari tü anyiri thi Saküüwuowa zheh küükraküzh