Read Pochuri Naga EZRA 9 Bible Online

EZRA 9 - Pochuri Naga bible

EZRA 9

¹Hamari sakheh küm sevü aküjiri tü hi vü ru taji, “Israel nyiri, navüri thi Leviri tü mari mpa nüh azhih jüla nyiri vünüh thi mari kükreri vünüh, Kananri vünüh, Hitri vünüh, Perizri vünüh, Jebusri vünüh, Egyptri vünüh, thi Amonri vünüh küpatemwa,

²küpakenühnyunü mari tü mari tsavühri wuori vi nü mari vüvüh sathi mari tsara vüvüh küsa kenüh; jüti sanü küshuküra kümtsewatü azhih jüla anyiri sie sanyieküm sa. Thi müküzhütsa nyitsa hala tü aküjiri thi lehvü nyiri ake nüh apokhuwa,” ti küza.

³Hi nüh hama küünara vü eh kruzhuri thi eh thsü müzükhrü nü ehsheh thi eh khane shoh taji saküngothseh ünü shupehtewa.

⁴Retewa nü sheleteküruri müküzhütsa nyitsa kenüh, thari nüh Israel Saküüwuowa zhü künara nü khekhe ta küüshü aveh ünüh mari aveh tü hi ngothseh ütaji münüleh shupehküveh küsahthuo küju hi mükieshepeh.

⁵Thi münüleh küsahthuo tsotho vü hi assa küsa vünüh eh kruzhumüzükhrih kümri thi eh thsü müzükhrih kümwa müphie ti sanü hi tü sühra taji eh kho khotsü nü VÜWA eh Saküüwuowa vü eh kethsuoküze taji,

⁶“O! eh Saküüwuowa, hi tü eh nyieh vü toke na küsa zükrü nü ehnyie mürumthuoh lie, eh Saküüwuowa, küpakenühnyunü hiri nüh müküle sa küm tü hiri alü nyieh vünüh müsietewathuoh, thi hiri nüh müküleküsa tü atülüri vü tekükuothuoh kenüh.

⁷Eh pari tsotho vünüh nosü küju hiri tü namuo küji shehmthuoh; thi hiri künakhie kenüh hiri, hiri kajiri, thi hiri navüri tü azhih hama kajira ke vü, anyuchuwa vü, aküsi vü, chivüteküwavü, thi khielota küzükrü vü thsem nü ha nosü kümjiesamthuoh.

⁸Thitü khinyi thuoüji hiri küümto sana küsa kenüh, thi makümtse azhievü lozhe nü kürhora küsü hiri tsü na küsa kenüh tsotho pike kenüh küütso VÜWA hiri Saküüwuowa nüh kütsamthuoh, jüti sanü hiri Saküüwuowa nüh hiri notha saküwietsü nü hiri atükha vünüh akürho pike hiri tsü na küsa kenüh wiethuoh,

⁹küpakenühnyunü hiri tü atükha nyiri küsa kenüh; jütawie ketünga hiri Saküüwuowa hiri tükha vünüh hiri tü mükule, tü hiri Saküüwuowa zheh saküürho wuori hiri vü tsü, saküümsüri küthe, thi Judea thi Jerusalem vü hiri vü künyuotetsü nta Persia kajira tüvü nüh mükükhaphrü küümze hiri vü jutsü.

¹⁰“Thi khinyi thuoüji, O, hiri Saküüwuowa, hama sevü nü hiri tü mowa küza nathuoh lo? küpakenühnyunü hiri tü noh nüh azhükütsüri kule kümthuoh kenüh,

¹¹noh nüh noh sieperi setsaküthsüri vünüh azhütsü taji, ‘Azhih nohri nüh kuokütuwa, nohri küüvi nta küsawa tü, azhih jüla nyiri nüh sakümneküm mükümtse azhih küsü mari müküzükrüri nüh pohte küsü vünüh pohte küsü küju saküprom nü sakümnem.

¹²Jükenüh noh tsavühri vi nü noh tsari vü mütsü tümluo, nyutü nohri atsari kenüh mari tsavühri müvi tüm, thi mari siekütsarü nyutü mari kütsarhie mphah tüm, jüti sanü nohri müzhora taji azhih hama kümhie tsara taji jüma vi küsuokürho nohri tsari vü akaküvi tsü naküveh kenüh,’ ti küza.

¹³Thi hiri nüh kümsü küsa kenüh thi hiri künakhie aküji kenüh hiri vü hamari aveh ruküm sevü noh hiri Saküüwuowa nüh hiri müküjuri kenüh kümnomna künguleh zake hiri vü mütsü nüh hakümjie vünüh hiri sakümtokütsü ngura,

¹⁴hiri tü noh nüh azhükütsüri vüriem lenü akükre küüroh küsa anyiri vü küzaluo sale naveh ülo? Noh nüh hiri müjie küpokah küju nü noh tü hiri vü arümshu tüm naveh ülo, jüti sanü kümto küsü nga münyie nüh sam, nyutü nyi küsü nga mürieteküwa müsa tüm naveh ülo?

¹⁵O VÜWA, Israel Saküüwuowa, noh tü müshom, küpakenühnyunü hiri tü mürietewa nü ha nosü üta kümto kenüh. Halie, hiri tü nohtüvü müküleküsa vünüh pehveh, küpakenühnyunü hama kenüh nyiküsü nga kütsiera münyieluo,” ti küza.