Read Pochuri Naga NEHEMIA 12 Bible Online

NEHEMIA 12 - Pochuri Naga bible

NEHEMIA 12

¹Navüri thi Leviri hamari tü Shealtiel atsa Zerubbabel, thi Jeshua masü vü nyi kükhruri: Seraia, Jeremia, Ezra,

²Amaria, Maluk, Hatush,

³Shekaniah, Rehum, Meremot,

⁴Iddo, Ginethoi, Abijah,

⁵Mijamin, Madia, Bilga,

⁶Shemaia, Joiarib, Jedaiah,

⁷Salu, Amok, Hilkiah, Jedaiah: Hamari tü Jeshua rülo vü navüra lehvüri thi mari jienüri.

⁸Thi Leviri: Jeshua, Binui, Kadmiel, Sherebia, Judah, thi Matania, ma tü ma jienüri sie nü kümnakütsü azari vü ashu sa.

⁹Bakbukia thi Unni masü jienüri tü küürohkülih vü mari küwiejie vü tsie.

¹⁰Thi Joshua tü Joiakim apa, Joiakim tü Eliashib apa, Eliashib tü Joiada apa,

¹¹Joiada tü Jonathan apa, thi Jonathan tü Jadua apa.

¹²Thi Joiakim rülo vü anavüri, apara zhehlori alüri: Jümari; Seraia tü Meraia; Jeremia tü Hanania;

¹³Ezra tü Meshulam; Amaria tü Jehohanan;

¹⁴Malukhi tü Jonathan; Shebania tü Josef;

¹⁵Harim, tü Adna; Meraiot tü Helkai,

¹⁶Iddo tü Zekharia; Ginnethon tü Meshulam;

¹⁷Abijah tü Zikhri; Miniamin tü Moadia, Piltai;

¹⁸Bilga tü Shamua; Shemaia tü Jehonathan;

¹⁹thi Joiarib tü Matenai; Jedaiah tü Uzzi;

²⁰Salai tü Kalai; Amok tü Eber;

²¹Hilkiah tü Hashabia; Jedaiah tü Nethanel.

²²Leviri kenüh thuoüji, Eliashib, Joiada, Johanan, thi Jadua, apara zhehlo vü alüri thi anavüri nga ti; Darius Persiawa kükaji küju zhüke saveh.

²³Levi atsari, apara zhehlora alüri tü Eliashib atsa Johanan rülo küju Küshukürazhüku Lasipha lovü rhüsaveh.

²⁴Thi Levi navüri: Hashbia, Sherebia, thi Kadmiel atsa Jeshua, Saküüwuowa anyi David nüh azhükütsü müzhe nü siake thi kümna kütsü kenüh mari ajienüri sie nü mari anyiehvü sazhihluo nü künote sa.

²⁵Matania, Bakbukia, Obadia, Meshulam, Talmon, thi Akub ti akheriri zanyoküsa zhehri vü rieh huo sa tsie nü akheri kühuori sa.

²⁶Hari tü Jozadak atsa, Jeshua atsa Joiakim, thi Nehemia kümkhrüwa thi navüwa Ezra zanyoküthsüwa tsotho vü rho.

²⁷Jerusalem shiehku kümüthü vü sieru nü kümüthüwa akhu vü aloküwie vünüh, kümnatsü nü azah sa, küüchirükhuri, atakhu, thi topitori khu ti sana küsa kenüh mari nüh Leviri phah mari azhie aveh vü wa.

²⁸Jüti küsa vü azah küsa atsari tü luowie vünüh Jerusalem mükieshe thi Netofatri anyu vünüh sezhuh khe;

²⁹jüsevü nga Betgilgal, Geba asuo vünüh thi Azmaveht vünüh ti sezhuh khe; küpakenühnyunü azah küsari tü mari mpa nüh anyu sanü Jerusalem mükiele taji küpeh kenüh.

³⁰Thi anavüri thi Leviri tü mari mpa sa küsütha; thi mari nüh anyira kheriri thi ashiehku ti sa küsütha.

³¹Jüti sanü hi nüh Judah kajitsari sie ashiehkuwa rügivü ru nü riehkhuo küji künyi chieke taji kümna tsü thi ri nü alovü tu. Riehkhuo küsü thuoüji azhie wuovü wa;

³²thi mari asevü Hoshaiah thi Judah kajitsari küzhila tu,

³³jüsevü Azaria, Ezra, Meshulam,

³⁴Judah, Benjamin, Shemaia, thi Jeremia tu,

³⁵thi anavüri atsa tütü küvi wuori nga: Jonathan atsa Zekharia, Shemaia atsa, Matania atsa, Mikaiah atsa, Zekur atsa, Asaf atsa;

³⁶thi ma küshukürari, Shemaia, Azarel, Milalai, Gilalai, Maai, Nethanel, Judah, thi Hanani, Saküüwuowa nyi David azah tsokrüri vi nü Ezra zanyoküthsüwa nüh mari atüvü tsewa.

³⁷Mari tü ajuhwi Kheri vünüh kümsho mari tüvü David nyujiwa kürieke vünüh shiehku tsekükhruwa vü, David azheh nyiehvü, Ajuh Kheri zhieshu wuovü wa.

³⁸Kümna kütsüri riehkhuo küpawa azhu wuovü wa, thi hi tü anyi küzhilari sie nü mari ase nyi nü ashiehkuwa rügivü Anyithüwa Khajie nyiehvü kümza khithuowa vü wa,

³⁹thi Efraim Kheri anyiehvü, Kheri Kürüwiwa vü, Anga Kheriwa vü, Hananel Khajiewa thi müzake Khajiewa, Nyihzhü Kheriwa vü; jüti sanü mari tü Rieh huo Kheriwa vü tsietewa.

⁴⁰Jüti küsa vü kümna kütsü riehkhuo künyi khürü tü Saküüwuowa zhehwa vü hi thi aküjiri küzhilawa ti hi sie tsie;

⁴¹thi navüri Eliakim, Maseia, Miniamin, Mikaiah, Elioenai, Zekharia, thi Hanania tü tütü vi nü tsie;

⁴²thi mari ase vü Maseia, Shemaia, Eleazar, Uzzi, Johanan, Malkhija, Elam, thi Ezer ti wa Jegrahia nüh mari sierhü sanü azahküsari nüh reihi.

⁴³Thi mari tü jüma rülo vü küsathuori kükhurü aküji sanü nyierakhruo, küpakenühnyunü mari tü Saküüwuowa nüh nyiehrakükhruo küji vi nü mari nyiehra sakükhruo; krevühri nga thi atsari nga nyiehrakhruo. Jüti sanü Jerusalem nyiehrakükhruo tü kületsuo vü küju nga künara.

⁴⁴Jüma rülo vü anyiri nüh zanyoküsazhehri kenüh, vizhuhküsari, apokhu aviri türake sanü küsü küthseri navüri kenüh Khonyo vünüh müsaji mkümhie suohperi mari vü vizhuh nta thi anyura zhuhri ti awiepa nyiehvü nyi chiekesa; küpakenühnyunü Judah tü anavüri thi anasa Leviri rügivü nyiehrakükhruo kenüh.

⁴⁵ Thi mari tü David thi ma tsa Solomon nüh azhükütsü müzhe nü azahküsari thi kherikühuori üta mari Saküüwuowa küürohkülih thi saküümtha küürohküli mari nüh sazhu,

⁴⁶küpakenühnyunü David rülo vü thi khanavü Asaf tsotho vü azah küsari lehvü küsü, thi Saküüwuowa küsiake thi kümnakütsü azahri pehkhe.

⁴⁷Jüti küsa vü Zerubbabel thi Nehemia rülo vü Israel aveh tü azahküsari thi akheri kühuori kenüh suope to peh huo nü mari nüh Leviri kenüh totsü thi Leviri nüh Aron atsari vü totsü, ti sa.