Read Pochuri Naga NEHEMIA 3 Bible Online

NEHEMIA 3 - Pochuri Naga bible

NEHEMIA 3

¹Thinü Eliashib navüri kümsiewa tü ma jienü navüri sie sühranü Nyihzhü Kheriwa sa. Mari nüh jüma müthü nü ma mükhieri sake; mari nüh Müzake Khajie küju Hananel Khajie küju müthü.

²Ma sevü Jeriko nyiri nüh sa. Mari sevü Imri atsa Zekur nüh sa.

³Thi Hasenaah atsari nüh Anga Kheriwa sa; mari nüh ma arüvühri thi ma mükhieri, ma küziehtevühri, thi ma tsükhieri sa.

⁴Mari sevü Hakos atsa, Uriah atsa Meremot nüh küthe. Thi maseri vü Meshezabel atsa, Berekhia atsa Meshulam nüh küthe. Maseri vü Bana atsa Zadok nüh küthe.

⁵Thi mari sevü Tekoari nüh küthe; thitü mari sierhüri tüVÜWA küüroh vü mari aku müthse.

⁶Pasea atsa Joiada thi Besodeia atsa Meshulam masü nüh kürüwi Kheriwa küthe; masü nüh ma arüvühri thi ma mükhieri, ma küziehtevühri, thi ma rüperi sake.

⁷Masü asevü Gibeonri Melatia thi Meronotri Jadon masü nüh küthe, Gibeon thi Mizpa nyiri tü Rühgu Tuwuovü anyu kümkhrüwa azhiekükhuvü küpehri.

⁸Masü sevü Harhaia atsa Uzziel, suna küsari nüh küthe. Ma sevü Hanania, kürhengu küsari küsü nüh küthe; mari nüh Jerusalem tü Kümza Ziewa küju sakümzho tsü.

⁹Masü sevü Hur atsa Refaia, Jerusalem küzhila suofo takrüwa nüh küthe.

¹⁰Masü sevü Harumaf atsa Jedaiah nüh ma zheh kürüwie vü küthe; ma sevü Hashabniah atsa Hatush nüh küthe.

¹¹Harim atsa Malkhija thi Pahatmoab atsa Harshab masü nüh ache küpaküsü thi Nyithüri Khajiewa küthe.

¹²Ma sevü Halohesh atsa Shalum Jerusalem suofo küzhila takrüwa, mathi ma tsavühri nüh küthe.

¹³Hanun thi Zanoa vü arhieri nüh Anyuo Kheriwa küthe; mari nüh jüma sale nü ma mükhieri, ma küziehtevühri, thi ma rüperi sake nü aziewa ale müza müzü nü zürake, thi wa Tsüne Kheri küjuküthe.

¹⁴Rebhat atsa Malkhija Bet-hakherem suofo takrüwa nüh Tsüne Kheriwa küthe; ma nüh sale nü ma mükhieri, ma küziehtevühri, thi marüperi sake.

¹⁵Kolhoze atsa Shalum, Mizpa suofo vü takrüwa nüh Küwuzhujuh Kheriwa küthe; ma nüh jüma sale nü satem taji ma mükhieri, maküziehtevühri, thi ma rüperi sake; thi ma nüh kajiwa phahri Shela ajuhkümsheke wa azie, thi David Nyujiwa vünüh kütsuo apahtiri küju sa.

¹⁶Ma sevü Azbuk atsa Nehemia, Betzur suofo küzhila takrüwa nüh David rükuri thsopo vü ajuhkhre chüh nü ajuh kümsheke, thi kümzho nyiri azhehküju küthe.

¹⁷Ma sevü Leviri nüh küthe: Bani atsa Rehum nüh; ma sevü Hashabia, Keila suofo küzhila takrüwa nüh ma suofo küthe.

¹⁸Ma sevü mari jienüri nüh küthe: Henadad atsa Bavai Keila suofoküzhila takrüwa nüh küthe.

¹⁹Ma sevü Jeshua atsa Ezer, Mezpa takrüwa nüh küparietsokrü küsape kükhru küwiejie ajükeh vü küthe.

²⁰Ma sevü Zabai atsa Barukh nüh küche küpa küsü ajühke vünüh navü kümsiewa Eliashib zheh mükhie küju küthe.

²¹Ma sevü Hakoz atsa, Uriah atsa Meremot nüh küpa küche küsü Eliashib zheh mükhie vünüh Eliashib zheh pohte küju küthe.

²²Ma sevü navüri, kütake nyiri nüh küthe.

²³Mari sevü Benjamin thi Hashub masü nüh masü azheh küwiejie vü küthe. Masü asevü Anania atsa, Maseia atsa Azaria nüh ma mpa mazheh nato vü küthe.

²⁴Ma sevü Henadad atsa Binui nüh küche küsü, Azaria zheh vünüh ajükeh küju küthe.

²⁵Apohte küju küthe. Uzai atsa Palal nüh ajükeh küwiejie thi Khajiewa küshupe vünüh kajiwa zheh kürüzihwa ariekühuo nyulaküju küthe. Ma sevü Parosh atsa Pedaia nüh küthe,

²⁶thi kükhurüzheh navüri Ofel vü kürhori nüh Ajuh Kheri thsopoküsü zhieshu wuovü thi Khajie shuküwa vü küthe.

²⁷Ma sevü thuoüji Tekoari nüh ache küpa küsü khajie aküji küsazhuküwiejie Ofel shiehku küju küthe.

²⁸Rawu Kheri anyiehvü navüri nüh papa zheh küto vü küthe.

²⁹Mari asevü Imer atsa Zadok nüh ma mpa ma zheh küwiejie wuovü küthe. Ma sevü Shekaniah atsa Shemaia, Zhieshu Kheri kühuowa nüh küthe.

³⁰Ma sevü Shelemia atsa Hanania thi Zalaf atsa künyiawa Hanun masünüh ache küpa küsü küthe. Ma sevü Berekhia atsa Meshulam nüh ma zhehlo küwiejie vü küthe.

³¹Ma sevü Malkhija, suna küsari küsü nüh kükhurüzheh sieperizheh, thi asüküsara zheh, künote Kheri küwiejie, thi ajühkewa rügivü azhehlo küwiejiewa küthe.

³²Suna küsari thi asüküsari nüh ajühkewa rügivü azhehlo thi Nyihzhü Kheri masü azhie vü küthe.