Read Pochuri Naga NEHEMIA 8 Bible Online

NEHEMIA 8 - Pochuri Naga bible

NEHEMIA 8

¹Jüti sanü anyiri aveh tü anyi küsü kümjie vünüh Ajuh Kheri atüvü anyulavü sezhuh khe; thi mari nüh Ezra zanyoküthsüwa vüVÜWA nüh Israel vü kütsü Mosa Khonyo lasiphawa viru üti küza.

²Thi Ezra navüwa tü Khonyowa kümhuwa, nyimpari nga thi nyimzari nga thi thari nüh aküthsü vünüh künara naveh ünüh aveh tüvü asa türüawa rülo pokhu vü viru.

³Anyula vü küprüke nü Ajuh Kheri atüvü nüh arüne kümto vünüh wa müshükütsaleh küju nyimpari thi nyimzari thari nüh thsüraveh ünüh jümara tü vünüh ma nüh jüla nüh chie; thi anyira khüna tü Khonyo lasiphawa vü kümrheke kheh.

⁴Ezra zanyoküthsüwa tü jüti küsa tsotho vü vi naveh ti athsoh nüh saküsawa akhajie rügivü tsie; thi ma nato ma zhie wuovü Matithia, Shem, Anaia, Uriah, Hilkiah, thi Maseia ti tsie pehveh; thi ma zhu wuovü Pedaia, Mishael, Malkhija, Hashum, Hashbadana, Zekharia, thi Meshulam ti tsie pehveh.

⁵Thi Ezra nüh anyiri aveh notha vünüh lasiphawa shah, küpakenühnyunü ma tü anyiri aveh anyiehwa küsa kenüh; ma nüh lasiphawa küshah vü anyiri aveh tsie kheh.

⁶Jüti sanü Ezra nüh VÜWA, Saküüwuowa küjiwa tsiatsü; thinü nyiri aveh nüh, mari ake rügivü thsuoke taji, “Amen, Amen,” ti rüle; thi mari tü mari alü vü küngietsuo nü mari nyieh azhih vü tsuotaji VÜWA khurü.

⁷Jüsevü nga Jeshua, Bani, Sherebia, Jamin, Akub, Shafethai, Hodia, Maseia, Kelita, Azaria, Jozabad, Hanan, Pelaia, thi Leviri nüh kükra nü Khonyowa anyiri saküthsü, thi anyiri nüh zota mari apevü pehkhe.

⁸Thi mari nüh lasipha, Saküüwuowa Khonyowa vünüh chie kümtseshehke tsü; mari nüh azhühnyowa küzaküthsü tsü, jüti küsavünüh anyiri tü chieküvehwa thsüra.

⁹Nehemia nüh kümkhrüwa sa, Ezra zanyoküthsüwa nüh anavüwa sa, thi Leviri nüh sosie nü anyiri aveh vü, “Rülo hama tü VÜWA nohri Saküüwuowa vü mütsem; tinü münyiehkhe tüm, nyutü mükrie tüm,” ti küza. Küpakenühnyunü anyiri aveh nüh Khonyo zhüriküünara vü mari aveh tü krieteküwa kenüh.

¹⁰Thinü ma nüh mari vü, “Nohri azheh vü tewa khe nü ashihrhietsa thi akhah kümnge ti zhu nü thari nüh zanyo küsü nga küchemüsanüh jümara suohpe nga satsüluo; küpakenühnyunü rülo hamatü hiri VÜWA vü kümtse kenüh; tinü ashemsü tüm, küpakenühnyunü VÜWA nyierakükhruowa tü nohri saküükhrawa küsakenüh,” ti küza.

¹¹Jüti küsa vü Leviri nüh anyiri aveh saküüzohm taji, “Zohmti pehluo, küpakenühnyunü rülo hamatü müthaküm kenüh, ashemsütümluo,” ti küza.

¹²Thi anyiri aveh tü tsa, zhu thi asuohperi küze thi nyierakükhruo aküjisa nti mari zheh vü tewa kheh, küpakenühnyunü mari nüh phrahzhukütsü zhüri mari nüh küthsürathuoh kenüh.

¹³Rülo künyiawa anyiri aveh vü apara zhehlovü alüri, navüri thi Leviri ti sie nü Khonyo zhüri thsü na küsa kenüh Ezra zanyoküthsüwa vü sezhuh khe.

¹⁴Jüti küsa vü mari tü VÜWA nüh Mosa vünüh azhükütsü Israel nyiri tü asa türü akhu tsotho vü ashüh zhehri lovü kürho khonyo lovü rhüküsa ngura,

¹⁵thinü mari tü mari nyujiri aveh vü thi Jerusalem vü ti müzhüchüh üji mümhie nüh sataji, “Ahori vü tsezhuwa nü Olive tsuona thi ato vü Olive thsoh, akawuo, aluophi, thi küpa thsoh küjehpuhkerinyawa viru nü rhüküsa üta ashühzhehri saluo,” ti küza.

¹⁶Jüti küüzavü anyiri tü alievü wa nü jümari viru, anyi aveh wienga mari mpa mari luomuo rügivü mari aluori vü Saküüwuowa aluorivü, Ajuh Kheri nyula vü thi Efraim Kheri nyula vü ti ashühzhehrisa kheh.

¹⁷Jüti sanü kümhuwa sietewa taji sheleküruri aveh ashühzhehri sanü jümari vü kürho sa; küpakenühnyunü Nun atsa Jeshua tsotho vünüh Israel nyiri jüma tsotho vü küju jükümjie müküsakenüh. Jüti küsa vü nyierakükhruo küji sa.

¹⁸Thi rülo küsü nüh rülo küsü, arülo apokhuwa vünüh rülo sehkhewa küju ma nüh Saküüwuowa Khonyo lasiphawa vünüh chie. Mari tü akhuwa rülo türü sanü rülo tüzeawa thuoüji azhühkhowa müzhe taji küükheke kümhu küsü sa.