Read Pochuri Naga NEHEMIA 9 Bible Online

NEHEMIA 9 - Pochuri Naga bible

NEHEMIA 9

¹Hama sa rülo mükeke nü müzü vü Israel nyiri tü sezhuh taji atsahkie küzhu, thi mari lüri rügivü azhih humlo, ti sanü assasa.

²Jüti sanü Israelri tü mari mpa nüh alienyiri aveh vünüh athuosatewa nü tsie taji mari kükhiemuori phrahzhukütsü sa.

³Thi mari tü mari ape vünüh tsie nü arülowa küüsuo müzü vü küsü VÜWA mari Saküüwuowa Khonyo lasiphawa vünüh chie; küpakenühnyunü küüsuo müzü vü küsü küpawa thuoüji mari tüVÜWA mari Saküüwuowa vü phrahzhukütsü kü sa kenüh, thi kükhurü vi sa, tiküsa kenüh.

⁴Leviri kürieke rügivü Jeshua, Bani, Kadmiel, Shebania, Buni, Sherebia, Bani, thi Khanani ti tsie nü mari tü VÜWA mari Saküüwuowa vü ajikhi zie kümsie.

⁵Jüti küsa vü Leviri, Jeshua, Kadmiel, Bani, Hashabniah, Sherebia, Hodia, Shebania, thi Pethahia nüh, “Sühra tsie nü küsuokürho vünüh küsuokürho küju VÜWA nohri Saküüwuowa tsiatsüluo. Noh kütholathohvü anyowa akütsiaküvü thi küsiake aveh anyieh vü saküümsiewa tsiakütsüwa saluo,” ti küza.

⁶Thinü Ezra nüh, noh mpa wie nüh VÜWA wie; noh nüh atülürisa, atülüwra atülüwa, ma vü küpehri aveh, Azhihwa thi ma rügivü küpehaveh, juhküjiri thi mari lovü kütüri; Noh nüh jümari aveh müshiesa; Atülüri vü küpehri nüh noh khurürü ti.

⁷Noh tü VÜWA, Abraham rüka nü Khaldeari Ur vünüh ma siezhuru nü anyo Abraham vi ma tsü,

⁸thi noh tüvü ma luoveh tü zhütsa nyitsa ta küsa noh nüh ngu nü Kananri, Hitri, Amonri, Perizri, Jebusri, thi Girgashri azhih vi ma küthsoküzhiri vü tsü nta ma sie kütsathuozhü sa; thi noh nüh küphrahzhuwa sajutsü, küpakenühnyunü noh tü künyitsa kenüh.

⁹ Thi noh nüh hiri pari Egypt vü kümnomna ngu thi Kümru Juhküjivü mari nüh küzie künatsü,

¹⁰jüti sanü athsoshiri thi küngori Faroah vü, ma siepehri aveh vü thi ma zhih vü anyiri aveh vü sashu, küpakenühnyunü mari nüh hiri pari vü küzele müke küsa noh nüh küthsü kenüh; thi nosü kümjie noh nüh anyo küsü sanü vi.

¹¹Noh nüh mari atüvü nüh juhküjiwa tehthuomtü nü mari tü juhküji azhila vünüh azhih küweh nü mari tü tsezhura; jüti sanü aloh küsü ajuh kümzhori vü veh küjake üta mari zhekütseri tü aküsheh lovü vehjakem.

¹²Rülo vü thuoüji akülu tovüh nüh mari küjo nü tse, thi arüzavü thuoüji mari khiewuovü müwa üji mümhie nüh mari wietsü na küsa kenüh anyihtovüh küsü nüh mari küjo nü tse, ti sa.

¹³Noh nüh atülü vünüh Sinai küzhi rügivü turu nü atülü marivü azhüküza nü mari vü kükato zhühkhori thi zhütsa Khonyori, kümhie zhühkheri, thi azhükütsüri mari vü tsü,

¹⁴thi noh nüh noh siepewa Mosa vünüh mari vü kümtse kümnyi rülo thi mari vü azhükütsüri, azhühkheri thi Khonyo küsü vi mari küthsütsü.

¹⁵Noh nüh mari kürüma kenüh atülü vünüh lohse tsü thi mari küürieh kenüh alokrü vünüh ajuh vizhutsü, thi noh nüh mari vübtsü nta küshieküsawa vü wa nü vi üta mari vü küza.

¹⁶Thitü mari thi hiri pari nüh amüke kuotisheh nü mari aku khroketaji noh nüh azhükütsüri müvi nüh sam;

¹⁷mari nüh müvi nüh sam nü noh nüh mari azavü aküngo vü amüshemüthse nüh sam; thitü mari aku khroke nü anyira kükhu vü kürho Egypt vü sheletewa nta asierhü küsü chuh. Thitü noh thuoüji noja nta lieke taji küpeh, külozhesheh thi noküümzesheh, zhihke nü arüküshu thi müküütsele külo küwuzhi Saküüwuowa küsü, thi mari kükule müsa.

¹⁸Mari mpa nüh akülü mieshüzah küsü sataji, “Hamatü Egypt vünüh nohri siezhuküru Saküüwuowa; ta sanü phramsü wie ketünga,

¹⁹noh nüh noh noküümze aküji kenüh reza vünüh mari mükule; akülutovüh mari küjokütsewa tü arülovü mari vünüh kari temwa, nyutü anyih tovüh mari khiewuovü müwa üji mümhie nüh makeria nüh arüza vü wiekütsewa tü mari vünüh kari temwa.

²⁰Mari süphie na küsa kenüh noh nüh noh Sietse kümhiewa tsü nü mari apo vünüh noh manna mükhete, thi mari küürieh kenüh ajuh vimari tsü.

²¹Mahvi zürake noh nüh reza vü mari sakürhotsü, mari tü zanyoküsü nga mükünyie müsa; mari thsümnyi tü sephatemwa thi mari mpha tü müvü.

²²Thi noh nüh kajiperi thi anyiri vi mari tsü, mari vü ajükeh aveh totsü; jükenüh mari tü Heshbon kajiwa Sihon azhih thi Bashan kajiwa Og azhih vi mari azhi sara.

²³Atülü wutsiri kümjie noh nüh mari küthsoküzhiri saküzhitsünü mari apari vü tu nü vi üta küüza azhihwa vü mari sieru.

²⁴Jüti sanü küthsoküzhiri tü tu nü azhihwa pehtera taji azhih jüla küpehri, Kananri mari atüvü nüh saküphemtü nü mari kajiri thi azhih jüla nyiri tü mari sieküütse amüshe küsa nta mari akevü thsem.

²⁵Thi mari nüh anyuji kümzhori, künyirhie azhih küsü revi, thi zanyo kümhie aveh azheh hozake küpro, phieke küsa juhkhre hozake, rhelivi zhuhri, Olive phahri ri thi athsohvi rhu küüsheküsha vi mari azhi sanü mari tü tsa taji mari küpro sanü thüra, jüti sanü mari tü noh kümhiewa vü no lotewa.

²⁶“Jüta wie ketünga mari tü azhümküvi thi noh sie saluo nü noh khonyowa mari asevü vehjakem nü noh setsaküthsüri, noh vü sheleteküüruna küsa kenüh mari vü hamna kütsüri zothem, jüti sanü mari tü noh phrahtemsü sheh.

²⁷Jükenüh noh nüh mari vi mari mükünongüri, mari saküümnomnari kevü thsem; thi mari kümnomna tsothovü mari nüh noh vü zieküüzevü atülü vünüh noh nüh künatsü; thi noh külohna küjiri müzhe nü noh küüloleri tsü taji mari nüh mari mükünongüri ake vünüh mari küloletsü.

²⁸Thitü mari münyie küm sevü mari tü noh tüvü kümsü salehü, thi noh nüh mari mükünongüri ake vü lejaküzem nü mari nüh mari nyiehvü kükehtem; tü mari nüh sühle nü noh vü küzie vü noh nüh atülü vünüh künatsü, jüti sanü noh külohna küzhile müzhe taji hozakeri wienga mari vizhutsü.

²⁹Thi mari tü Khonyowa vü shele küüsühle na küsa kenüh mari vü hamna tsü. Tü mari nüh khielohta kükuoti müke sanü noh nüh azhükütsüri müvi nüh sam, nyi küsü nüh jüma müzhe rhora na küsa noh zhühkhori vü khiemuoküm sanü müküzike asafüküreketewa thi mari aku kuotike nü müvi nüh sam.

³⁰Mahvi hozake noh nüh mari vü küzhike nü setsaküthsüri vünüh Sietse vünüh mari vü hamna tsü; tü mari khüna mütsü. Jükenüh ma nüh mari vi azhih jüla anyira ke vü thsem.

³¹Jüta wie ketünga noh nüh khielohta külohna kenüh mari vü asehkhe müsa nyutü mari mükule; küpakenühnyunü noh tü külozhile thi noküümzele Saküüwuowa küsa kenüh.

³²“Jükenüh khinyi, hiri Saküüwuowa aküji, akükhra thi kükrüküngo Saküüwuowa, kütsathuozhü thi mükükhaphrükhale küümze küsarawa, Assiria kajiri tsotho vünüh nosü küju kükho hirivü, hiri kajiri vü, hiri kajitsari vü, hiri navüri vü, hiri setsaküthsüri vü, hiri pari vü, thi noh nyiri aveh vü ruküm tü küzah ti müküsa tümluo.

³³Tü hiri vü küru aveh vünüh noh tü müsho, küpakenühnyunü noh thuoüji hiri vü nyitsa tü hiri nüh khukekümsü küsa kenüh;

³⁴hiri kajiri, hiri kajitsari, hiri navüri thi hiri pari tü noh khonyowa müsara nüh sam, nyutü noh nüh mari vü kütsü azhükütsüri thi hamnari vü luoveh mthse nüh sam.

³⁵Mari tü mari kajipe vünüh, noh kümhie aküji noh nüh mari vü kütsü vünüh, thi kükahjükahla thi künyirhie azhih noh nüh mari atüvü küsatüwa vünüh noh kütsü müsanüh sam; thi mari tü mari küüroh kümsüwa vünüh müsühle nüh sam.

³⁶Halie, noh nüh hiri pari vü kütsü azhihwa vünüh ma vi vinü makümhie küteri vi nyierakhruo üta küsawa vünüh hiri tü atükhari saveh, halie, hiri tü atükhari kheh.

³⁷Thi ma vi pe küülieri tü kajiri, hiri kükhiemuo kenüh hiri nyiehvü küthseri vü wa; mari tü mari müshe vünüh hiri satsarinyiehvü nga thi hiri mieshümiesa vü nga akükhra peh, thi hiri tü hozake amüshekümnomna vü pehmthuoh,” ti küza.

³⁸Hama aveh kenüh kütsathuozhü kümzho küsü sanü jüma rhü, jüti sanü hiri kajitsari, hiri Leviri, thi navüri tü jümawa vü