Read Pochuri Naga ESTHER 2 Bible Online

ESTHER 2 - Pochuri Naga bible

ESTHER 2

¹Zanyo hamari sevü, kajiwa Ahasuerus rüküshu kriehteküwa vü matü Vashti thi ma nüh mowa sam nüh thi ma vü mowa küphrahzhuthuohünüh ma nüh müshekera.

²Thinü kajiwa sieperi ma kütsüsa küvehri nüh, “Aküzü kürünguo mükürüsa kajiwa kenüh küüphah luo.

³Thi kajiwa nüh ma kajipe anyu aveh vü aküjiri rüka nü aküzü kürünguo mükürüsari aveh Susa nyuji azhie vü, kajiwa akütsüküüna Hagai krevühri navüzheh ashuwa kükhu vü küüsezhuh; thi mari jührezhi vi mari tsü.

⁴Jüti sanü rülavü thawa nüh kajiwa külo sara naveh ünüh Vashti müthoh vünüh kajivüh küüsam luo,” ti küza. Kajiwa nüh hama lonü jükümjie sa.

⁵Jüti küsa vü Susa nyuji vü Judahri küsü ma nyo Mordekai, Jair atsa, Shimei atsa, Kish atsa, Benjaminra kuoh küsü peh,

⁶ma tü Jerusalem vünüh Babilon kajiwa Nebukhadnezzar nüh siteküwa aküsiri azavü Judah kajiwa Jekoniah vü nyitewa.

⁷Ma nüh Hadassah, jüma tü Esther ma püza atsavühwa sie nü shuhru, küpakenühnyunü ma tü ma pa nga thi ma zah nga mükünyie kenüh; rülavüwatü züsheh thi kalasheh, ma pa ma zah süküm sevü Mordekai nüh ma mpa ma tsa kümjie küje.

⁸Jükenüh kajiwa azah thi ma nüh azhükütsü küzhüchüh vü, thi rülavüri khielohta Susa suorezü Hegai navüzheh vü küsezhuh vü Esther nga kajiwa kajizheh vü Hegai krevühri ashu wa navüzheh vü siewa.

⁹Thinü rülavüwa tü ma külosara thi ma küütso chara nü ma nüh shiti ma jührezhi thi ma shie asuohpewa, thi kajiwa kajizheh vünüh rülavü kürüka türü ti nyimzawa tsü, jüti sanü ma thi ma rülavüri siewa ashie azhie kümhietsawa vü sa.

¹⁰Esther tü ma nyiri nyutü awari vü nga müküthsü, küpakenühnyunü müküthsü tüm üta Mordekai nüh azhühzho tsüküm kenüh.

¹¹Thi Esther tü mokümjie thi hala nüh sevü mokümjie satewa naveh ünüh thsü na küsa kenüh Mordekai tü rülotsotho nyimzara nyula atüvü tsewatseru ti sasati.

¹²Jüti sanü rülavüri tü papa tütü sanü kajiwa Ahasuerus vü wanta küsa vü krevühri kenüh wuleh khonyori kükhuvü asa türakünyiawa asevü, mari saküzü na küsa müküütuo tsotho küsa kenüh nyimzari kenüh asa türo athsorhe vüjuh thi asa türo küüngukümieri thi jürezhi nüh vi nü küteh,

¹³lakruowa tü hakümjie vünüh kajiwa vü tu ünü ma tü alahshie vünüh momowa vi nü kajiwa zheh vü küwa münguveh ünüh ma vü tsü.

¹⁴Münüleh vü ma tü wa, thi arüne vü ma tü alahshie künyiawa, Shashgaz, kajiwa kütsü küünawa amüsüri kühuowa ashu küsawa navüzheh vü sheleru; nyimzawa tü kajiwa nüh ma nolo thi anyo vünüh müküji nü nyimzawa tü kajiwa vü mütu le nüh sam.

¹⁵Mordekai püza Abihail atsavühwa, ma mpa ma tsavühwa kümjie küüjewa Esther kajiwa vü tu nta küsa ma müthoh ru ünü ma tü kajiwa akütsüküünawa Hegai müsüri ashu wa nüh shikekütsü küchie nüh zanyoküsü nga mükhuo. Jüti küsa vü Esther tü ma künguri aveh notha vü küütso ngura.

¹⁶Thi asa türawa, jüma tü Tebet asawa, ma kükaji mahvi türüawa Esther tü kajiwa Ahasuerus kükaji kajizheh lovü sieküwa vü,

¹⁷kajiwa nüh nyimzari aveh azhievü nüh Esther küülo sanü mükürüsari aveh nyiehvü ma tü ma notha vü küülozhi thi küütso ngura, jükenüh ma nüh nyimzawa alü rügivü kükaji kajilüwe thse nü Vashti müthoh vünüh ma nüh kajivüh küsa.

¹⁸Jüti küsa vü kajiwa nüh kütsazhu küji küsü ma kajitsari thi asieperi aveh vü tsü; jüma tü Esther kütsazhu. Ma nüh anyunyuvü nga kümnyirülo satsü, thi aküte nga kajiwa sühie vünüh tsü.

¹⁹Mükürüsari tü akünyiawa küsezhuh vü Mordekai tü kajiwakheri vü shupehveh.

²⁰Esther tü Mordekai nüh ma vü azhühzho kütsü üta ma tü ma warivü nga nyutü ma nyiri vü nga müjie küthsü wie; küpakenühnyunü Esther tü Mordekai nüh ma sie küshuhru vü ma zhüküvi kenüh.

²¹Thi jüma rülo vü Mordekai nüh kajiwa kheri vü shupeh küveh vü kajiwa akütsüküünara kheji kühuo künyi, Bigthan thi Teresh masü tü arüshu nü kajiwa Ahasuerus vü ake thse nti sa.

²²Thi hama tü Mordekai nüh thsütera nü ma nüh kajivühwa Esther vü küza, thi Esther nüh Mordekai nyo vünüh kajiwa vü küza.

²³Kütsazawa tü küna nü azhütsa ta sa ünü masü tü kühuthuothsoh rügi vünüh huthuom. Jüti sanü jüma tü Küthsoküzhizhüku Lasiphawa lovü kajiwa tsahtüvü zhüke.