Read Pochuri Naga TSESHUKÜWA 1 Bible Online

TSESHUKÜWA 1 - Pochuri Naga bible

TSESHUKÜWA 1

¹ Jacob tsari atharuo vünüh Egypt vü ma se nyiküwari,

²Reuben, Simeon, Levi, thi Judah,

³Issachar, Zebulun thi Benjamin,

⁴Dan thi Naftali, Gad thi Asher

⁵Anyiri Jacob vü wuo kütsü küsaji rürake. Josef thuoüji Egypt vü pehlathuoh.

⁶Josef tü süm, thi ma jienüri aveh, thi jüma wuhle aveh ti sü khehm.

⁷ Thitü Israelri tü avi pezhira thi kümwumra khielota küzhiküzhia wa ra; mari tü mküürührhüra sa thi müzhosheh tewa; thi Egypt zhih tü mari nüh protewa.

⁸ Jüti küsa vü Josef müküthsü kaji küpa küsü Egypt vü shuteru.

⁹Thinü ma nüh ma anyiri vü, “Halie, Israel nyiri tü ehkeria nüh zhiküluole thi müzho küluole wiethuoh.

¹⁰ Mari tü zhiteru thi arie shuru thuoüji mari tü hiri mükünongüri sietsarü nü hiri sie saluo nü azhih hala nüh tewa üsü, tinü hiri aro mütsasheh nü mari saküzüla mümji mümhiethuoh,” ti küza.

¹¹Jüti sanü mari nüh küüroh küjokütsü nyiri vizhu nü Israel sakümnomna na küsa kenüh küüroh kükho tsü nü küüsa taji mari tü Faroah kenüh zanyoküüsa nyujiri, Pithon thi Rameses ti sa.

¹²Thitü küzhiküzhia mari mürü ketünga manyiri tü küzhitsa sateru nü azhih jüla nyuohtewa. Thi Egyptri tü Israelri krütewa.

¹³Jükenüh mari nüh Israelri tü makükhuri vü vithse nü khieloti sakümnomna,

¹⁴jüti sanü mari kürho tü küüroh nüh sakükho shehtsü, alohzhih küünya thi küveloh küüroh küsa, thi azhuh vü küüroh müküzüküzü tsü, tinü mari küüroh aveh nga mari tü makükhuri vü vithse nü khieloti mari sakümnomna.

¹⁵Jüti küsa vü Egyptri kajiwa nüh Shifra thi Pua, atsa saküüwuori künyi vü,

¹⁶“Nohsü wa nü Ebrivühra tsa saküüwuo vü nyimpari thuoüji zothem luo, thitü nyimzari nü kürhom luo,” ti küza.

¹⁷Thitü masü tü Saküüwuowa krüküm kenüh Faroah nüh masü vü küüza müküna nüh sa thi atsa nyimpari aveh küürho kheh.

¹⁸Jüti küsa vü Egypt kajiwa nüh masü ji taji, “Nohsü tü mokenüh hakümjie sanü atsa nyimpari küürhoveh lo?” ti küza.

¹⁹Jüti küüza vü masü nüh Faroah vü, “Küpakenühnyunü Ebrivühri thuoüji Egyptvühri kümjie nyu nüh mari nü khrashehküm kenüh thi hisü nyi küsü nga müjie küwa vünüh wuomlalati lie,” ti rületsü.

²⁰Jüti sanü Saküüwuowa[1] nüh masü sakümahtsatsü, thi Ebriri tü anyi küzhiküzhia jesiehwa thi khra sheh tewa.

²¹Atsa saküüwuori künyi nüh Saküüwuowa kükrü vünüh kürho kenüh atharuo hozake vi masü tsü.

²² Thinü Faroah nüh ma nyiri aveh vü azhütsü taji, “Ebriri vü nyimpari küwuo aveh nohri Nile rühgu vü küruowa thsemluo, thi nyimzari thuoüji küürhom luo,” ti küza.