Read Pochuri Naga TSESHUKÜWA 12 Bible Online

TSESHUKÜWA 12 - Pochuri Naga bible

TSESHUKÜWA 12

¹ Egypt zhih vünüh VÜWA nüh Mosa thi Aron vü,

²noh keri nüh hama asanüh amahvi vü asa pokhuwa sanaveh; hama sanüh asa jite küwa sanaveh.

³Thi Israel nyiri ashieji sanü rhoküvehri aveh vü küza luo, hama sa rülo türake vü papara pa zheto vünüh müzhe nü mari nyihzhüzah küsüsü vizhu naveh, jüma tü azheto vünüh sanaveh;

⁴mükütüküzü atharuowa küzale vünüh nyihzhüzawa mükütsakhera vü pehveh üji anyito vünüh müzhe nü ma mükhie kütuoh küpeh ma zhephruwa sie küsuo tsanaveh; nyihzhüwa tü anyito vünüh kheta kütsakütse müzhe nü sanaveh.

⁵Noh nyihzhüzawa tü künyiena müküpe mahvi küsü kükhruo avo sanaveh; thi jüma tü anyihsü nyutü anyihzhü küsüthake;

⁶jüti sanü nohri tü jüma küsa hama sa rülo türamzü küju sanaveh, thi Israel nyiri ashieji kümhuwa aveh nyihzhüzawa münüleh vü fethe naveh.

⁷Jüta küsa vü azheh khiela asa jüma tsanaveh ünüh azüh pike vi nü mükhietovüh künyi vü thi mükhie wuzie vü ti thse naveh.

⁸Jüma rüza vü mari asawa rüküne thi vüjuh müthse nüh küveh lohse thi are kükha mari tsanaveh.

⁹Hamari küsü nga kümzhi nyutü ajuh vünüh shumtsa tümluo, thitü rüküne nü tsaluo, alü nga, ajihri nga thi votsasa aveh nga rüküne nü tsa kheh naveh.

¹⁰Thi jümari küsü nga tsatu nü arüne vü müsa tümluo, kütsaturi aveh thuoüji tso khehm luo.

¹¹Amüke hakümjie vünüh tsaluo: Nohri küshih tseke luo, nohri jihküükruvüh küzheke thi nohri ake vü nohri kütsüh küjehke tinü tsanaveh, thi akütsa vü pre nü tsanaveh. Küpakenühnyunü jüma tü VÜWA nüh tsekari küwa kenüh.

¹²Jüma rüza tü hi nüh Egypt zhih aveh vü ruwa naveh, thi Egypt zhih vü anyiri nyutü samwa küwuo khuwa ajü thuoüji hi nüh zothe naveh, thi Egyptra nyiazari aveh hi nüh kümnomna tsü kheh naveh. Hi thuoüji VÜWA.

¹³Nohri nüh küpehpe tü azühwa nüh athsoshi küüsa naveh, thi hi nüh Egyptri zothe küwa vü amükhietovüh vü azühwa ngu thuoüji nohri tsekari tewa nü kümnomna nohri vü ru nü nohri müküüzothe nüh sanaveh.

¹⁴ Rülo hamatü nohkeri nüh müküümara rülo küsü sanaveh, rülo hamatü VÜWA kenüh akhu küsü küüsanaveh, nohri wuhlewuhle küju nga küsuokürho azhühkho kümjie vünüh müzhe naveh.

¹⁵Rülo türü nohri tü ahzhi müküthse lohse küveh tsanaveh, rülo pokhuwa vü nohri tü nohri azheh vünüh ahzhi vijakhehm naveh, mükütüküzü anyi wuori nüh rülo türü azhievü nüh ahzhi küthse sa thuoüji ma tü Israel vünüh zhejam luo.

¹⁶Rülo pokhuwa thi rülo türüawa vü kümtse kümhu tsotho vi naveh, rülo hamasü vü zanyo küsü nga küsawa nyu, ashie mütsaji mükümhiewa mpa küüche sanaveh.

¹⁷Thi nohri tü mütsejuh zhi müthse nüh lohse veh kütsa khu hama kükhu peh huo naveh, küpakenühnyunü nosü hama rülo vü Egypt zhih vünüh hi nüh nohri thopahiri küvizhu kenüh, jükenüh awuhlewuhle küju nohri rülo hamatü azhühkho kümjie vünüh müzhe peh huo naveh.

¹⁸Asa pokhuwa vü rülo türamzüwa münüleh vü nohri tü ahzhi müthse nüh lohse kürü tsanaveh, thi rülo mükeke nü küsü münüleh küju jüüta sanaveh.

¹⁹Rülo türü azhievü nyi küsü azheh vü nga ahzhi müsara, thawa nüh ahzhi küthse tsanaveh ünüh jüma thuoüji ma mpa nüh alienyiriluo nyutü anyuperi saluo Israel anyi vünüh zhejam naveh.

²⁰Zanyo küsüvü nga nohri ahzhi thse nü mütsara, nohri kürhope aveh vü ahzhi müküthse tsa naveh, ti küza.

²¹Jüti küüza sevü Mosa nüh Israel kükhruori jizhuh nü mari vü, “Nohri mpa noh keri nüh atharuo vünüh küte nü nyihnyihzah rükazhu luo, thi tsekükari nyihnyihtsawa fethe luo.

²²Arhesa küüjeh küsü rha luo thi nyihnyih züh ketsoku lovü tüküvehwa lovü teke nü amükhie wuzie thi mükhie tovüh künyi vü thse luo; jüti sanü müjie kütho küju nohri nyi küsü nga alievü müshu tümluo,

²³küpakenühnyunü Egyptri zothe nta VÜWA nüh amükhie ru tsekariwa naküveh kenüh; thi amükhie wuzie thi amükhietovüh künyi vü ma nüh azüh ngu thuoüji VÜWA nüh tsekari tewa naveh, jüti sanü küzothewa tü nohri zhehlovü tu nü nohri müküüzothe nüh sanaveh.

²⁴Nohri nga thi noh tsari nga küsuokürho kükhurü rüleh hama azhühkho kümjie vünüh müzhe huo naveh.

²⁵Thi VÜWA nüh azhih nohri vü tsü nta phrahteke nü küzhüthuozhü sa küsawa vü ru thuoüji nohri küüroh hama sawie naveh.

²⁶Thi noh tsari nüh nohri vü, ‘küüroh hama zhühnyo tü mowalo?’ ta küna thuoüji,

²⁷nohri nüh, ‘hama tü VÜWA nüh küsahthuo sanü tsezhuküwa küüroh lie,’ ti küza luo, küpakenühnyunü VÜWA nüh Egyptri fetheküwa vü Egypt vü küpeh Israel nyira zheh thuoüji karitewa nü müfethe nüh küürho sa lie,” ti küza üti küza. Jüti küüza vü Israel nyiri tü mari lü küngie tsuo nü VÜWA khurü.

²⁸VÜWA nüh Mosa thi Aron vü azhükütsü kümjie Israel nyiri tü wa nü sa kheh.

²⁹ Tsotüla vü VÜWA nüh Egypt zhih vü atsa küwuokhuri, Faroah atsa küwuo khuwa ma kükajipe rügivü küpehwa vünüh wa aküsi küsa azhih lovü phieke nü küsizheh lovü tüküveh atsa küju thi ase-ashuh azah kütsakhuwa küju zothem.

³⁰Jüti küsa vü Faroah thi ma kükhu vü küroh küvehri aveh thi Egyptri aveh tü tsotüla vü sühra nü khieloti krie, küpakenühnyunü azheh küsü vü nga müsü ta küsa mükünyie kenüh.

³¹Jüti küsa vü Faroah nüh arüza vü Mosa thi Aron ji taji, “Sühra nü eh nyiri vünüh tewaluo, nohsü nüh küüza kümjie nohsü nga thi Israel nyiri nga tewa nü VÜWA küüroh saluo.

³²Nohri nyihnyih thi nyihzhüri sie nü nohsü nüh küüza kümjie tewaluo, thi tsia hi nga tsüluo,” ti küza.

³³Thi Egyptri nüh Israel nyiri küchü nü shishiti mari zhih vünüh tewa üti sanü mari vü, “Hiri tü aküsürisamthuoh,” ti küza.

³⁴Jüti küsa vü Israelri tü mari lohse ahie müjie kütoh vünüh ahie künya küsa afüji lovü thse nü athsü nüh tieh nü mari safü rügi vünüh kha.

³⁵Israel nyiri tü Mosa nüh küüza kümjie Egyptri vünüh rakasa thi suna sitheloh thi thsümnyi khuovi kheh;

³⁶VÜWA nüh Egyptri vü küütso tsü nü Israelri nüh kükhuo aveh tsü kheh. Hakümjie vünüh Israelri nüh Egyptra zhi küüzhe vünüh viteküwa kheh sa.

³⁷Jüti sanü Israel nyiri tü Rameses vünüh tse Sokot vü wa; nyimzari thi atsari müküchie apari mpa nüh anyieh müza türo tsezhu wa.

³⁸Anyi küpari nga küsarü riekhuoküji nga mari vü nyiwa, ase-ashuh, anyihzhüri thi anyihsüri nga müküchierhüra sie wa.

³⁹Thi mari nüh ahie mükütoh Egypt vünüh viküwa veh, küpakenühnyunü mari tü müküüzhike wiethuoh nüh zhezhujaküm kenüh ahie nga mütohra nüh sam thi kütsaküzhu nga küchemvüra nüh sam.

⁴⁰Israel nyiri nüh Egypt vü kürho mahvi thuoüji mahvi müza müzü nü cherake rho.

⁴¹Mahvi müza müzü nü cherake rülo sehkhe, khemta rülo hama sehkhe vü VÜWA nyiri thopahiri tü Egypt vünüh tsezhutewa.

⁴²Rüza jüma tü Egypt vünüh Israel nyiri vizhu nta küsa kenüh VÜWA nüh huoküpeh rüza sa, jükenüh arüza hamatü Israel wuhle aveh nüh VÜWA kenüh huoküpeh rüza sa.

⁴³Jüti küsa vü VÜWA nüh Mosa thi Aron vü, “Hamaha tsekükari kenüh azhühkho sakütsüri: Alienyiri tü piketü tsekükari ashie mütsara;

⁴⁴Thitü nohri nüh ame nüh sü nü tükha saküvehri thuoüji nohri nüh mari ahu tsiküm sevü nüh tsamhieveh.

⁴⁵Rülo pike mpa rukürhori thi siepe sieküpehteri thuoüji jüma mütsara.

⁴⁶Azheh khiela nüh shu nüh jüla mpa nüh kütsa küchie nüh alievü vimwara; thi nohri nüh asa jüma shukütsavü jüma arü küsü nga küzoshiwa nyu.

⁴⁷Israelri ashieji aveh akhu hama müzhe naveh.

⁴⁸Mükütüküzü anyitheri tsotho pike nohri vü nyipeh nta küruri nüh tsekükari kütsaküzhuwa nyisa nta thuoüji mari nyimpari aveh thuoüji ahu küütsi khu chih luo. Jüchih ünüh mari tü shehnyiru nü anyuwa kümjie nyi akhu jüma sara naveh, Thitü ahu mükütsiri thuoüji akhu jüma kütsaküzhu nyimüsara.

⁴⁹Atotsari jüla kürhowiri nga satü anyithe ru kürhori nga satü khonyo thuoüji zarike wie naveh,” ti küza.

⁵⁰VÜWA nüh Mosa thi Aron vü azhütsü nü küüza kümjie Israel nyiri tü sa.

⁵¹Khemti küsa jüma rülovü VÜWA nüh Egypt zhih vünüh Israel nyiri thopahiri vünüh vizhu.