Read Pochuri Naga TSESHUKÜWA 13 Bible Online

TSESHUKÜWA 13 - Pochuri Naga bible

TSESHUKÜWA 13

¹VÜWA nüh Mosa vü,

² “Atsa nyimpa pokhuri sakümtse nü hi tsüluo, küpakenühnyunü Israelri saluo nyutü küüje samwa saluo nyimpari aveh thuoüji eh zhi küsa kenüh,” ti küza.

³Jüti küsa vü Mosa nüh Israel nyiri vü, nyura kükhu vü peh nü Egypt vünüh shuteküru rülo hama müsheluo, azhie hala nüh VÜWA ke kükhra vünüh nohri vizhu; nohri ahzhi thse nü küveh lohse mütsara.

⁴Nohri asa pokhuwa, Abib asa wa vü Egypt jam nü tewa naveh.

⁵VÜWA nüh nohri sie nü ma nüh noh pari vü küshieküsa tünüjuh thi awejuh liküveh Kananri, Hitri, Amorri, Hivri thi Jebusri nüh kürho azhie vü küru vü nohri akhu hama asa pokhuwa vü sanaveh.

⁶Ahzhi müthse nüh lohse küveh rülo türü tsa naveh, thi rülo türüawa thuoüji VÜWA vü akhu sanaveh.

⁷Ahzhi müküthse lohse rülo türü tsanaveh; ahzhi küthse lohse piketü nohri vünüh thi noh zhihri vünüh müküngura.

⁸Jüma rülo vü nohri tü nohri atsari vü küza nü, hamatü küpakenühnyunü, tü VÜWA nüh Egypt vünüh hiri küvizhu kenüh hama saveh ti küza luo!

⁹Thi jüma tü nohri ake vü thi nohri notha azhievü athsoshi sanü müküümawa sanaveh, jüta küsa vünüh VÜWA khonyowa tü nohri apo vü tüpeh huo naveh; küpakenühnyunü VÜWA akekükrü vünüh ma nüh Egypt vünüh nohri küsiezhu kenüh.

¹⁰Jükenüh nohri zhühkho hama mahvi kürüzhu rülo chieküsa vü khemta sanaveh.

¹¹VÜWA nüh nohri sie nü ma nüh nohri vü thi noh pari vü küshieküsa Kananri zhih vü ru nü azhih jüma vi nohri tsü thuoüji,

¹²atsa küwuo khuwa athuo sanü VÜWA tsü naveh. Nohri seshuh kütsaa khuwa nyimpari thuoüji VÜWA zhi sanaveh.

¹³Rawuh küzahwa avo kütsaa khuwa nyihnyihzah nüh rhehsavi naveh, mükütüküzü jüta nyu thuoüji ma kurü küreshimtüluo. Nohri atsa nyimpari azhievü nyimpari küwuo khuwa thuoüji nohri nüh rhehsavi naveh.

¹⁴Thi hala nüh sevü nohri atsari nüh, ‘Hatü mazhünyo mowa lo?’ ta küna thuoüji, nohri nüh mari vü, Egypt vü nyura kükhu vü kürho vünüh VÜWA nüh ma ke kükhra vünüh hiri vizhu,

¹⁵küpakenühnyunü Faroah nüh luoveh khosheh nü hiri müküze nta küsa vü VÜWA nüh Egypt zhih vü anyiri thi ase-ashuh atsa küwuo khuwa zothe kheh. Jükenüh nyimpa küwuo khuwa thuoüjiVÜWA vü küsahthuo saveh, thitü eh tsara tsa küwuokhuri rhehsaviveh.

¹⁶Jümatü noh keri vü thi noh tsari atüvü anotha azhievü athsoshi küsü küüsanaveh; küpakenühnyunü VÜWA nüh ma ke kükrü ti Egypt zhih vünüh hiri küvizhu kenüh, ti küza.

¹⁷Faroah nüh Israel nyiri küüze vü Saküüwuowa nüh mari sie Filistinra zhih lehkhuji vünüh siemwa, ma mpa nüh jüwuovü nüh küüshenyi ketünga, küpakenühnyunü Saküüwuowa nüh, “Mari tü arie ngu nü mari luoveh khaphrü nü Egypt vü sheleteru üsü nü,” ta küsa kenüh.

¹⁸Jükenüh Saküüwuowa nüh mari sie nü reza vü Kümru Juhküji leh wuovü nüh mürhüwa. Egypt zhih vünüh tsezhuküwa vü Israel nyiri tü rietsokrü vüju nü shuwa.

¹⁹Mosa tü Josef arüri vi nü tsezhu wa, küpakenühnyunü Josef nüh Israel nyiri vü küüshie taji, “Saküüwuowa nüh nohri küvizhu vü nohri hala nüh eh rü vi nü nohri senyitemwa üji mümhie,” ta küza küsa kenüh.

²⁰Jüti sanü mari tü Sukkoth vünüh tsezhuwa nü reza thsopo wuovü Etham vünüh kürünape sanü peh.

²¹Jüti tseküwa vü VÜWA nüh matüri vü tse nü arülo vü thuoüji akülu tovüh küsü nüh ma lehkhujiri küjo thi arüza vü thuoüji küüwie na küsa kenüh anyih tovüh küsü nüh mari lehkhuji küjo, jüti sanü mari tü arülo thi arüza aveh küütse na küsa kenüh;

²²Akülu thi anyih tovüh mari tüvü kütsewa tü piketü mari müja nüh sa.