Read Pochuri Naga TSESHUKÜWA 14 Bible Online

TSESHUKÜWA 14 - Pochuri Naga bible

TSESHUKÜWA 14

¹Jüsevü VÜWA nüh Mosa vü,

²Israel nyiri vü küza küüsheleru nü Migdol thi kümrujuh Küji masü azhie vü Pihahirot tüvü Baal-zephon kütuoh vünüh kürünape saluo; nohri azhie jüma wiejieluo nü Kümru Juhküji kütuoh vü kürünape sanaveh,

³küpakenühnyunü Faroah nüh Israelra khuke phrahte taji, “Israel nyiri tü Egypt zhih vünüh sühro thi reza vünüh küvote pehla nathuoh,” ti sa.

⁴Tinü hi nüh Faroah luoveh sakükhomtü nü ma nüh Israel nyiri zheküüze naveh, thitü hi nüh khrara nü Faroah thi ma nyi thopahiri nyiehvü eh kütholathovü küngu naveh; jüti sanü Egyptri tü hi VÜWA ta küsa thsü naveh, ti küza. Thinü mari tü jüti satsa.

⁵Jüti küsa vü Israel nyiri tewathuoh ta küsa kajiwa nüh küthsüra vü, ma thi ma siepera luoveh tü khaphrütewa nü mari nüh, “Israel nyiri nüh hiri küüroh saküveh vünüh hiri tü mari küzeküm. Hiri tü mowa samthuoh lo?” ti sa.

⁶Jüti sanü ma tü rawuh kheka thi ma rienyiri kücheju nü,

⁷rawuh kheka kümhietsatsa müza türo thi Egyptra rawuh kheka küpari nga jümari rügi vü asierhüri pehkhe nü siewa.

⁸VÜWA nüh Egypt kajiwa Faroah luoveh sakükho kümtü kenüh Israel nyiri tü münyishi wiethuoh nüh kuoteküwa zhewa.

⁹Egyptri, Faroah rawuhri, rawuh khekari, ma rawuh nyiri thi ma rienyiri mari zhewa nü mari nüh kürüna sanü pehküveh Kümru Juhküji Pihahirot kütuoh Baalzefon atüvü nüh mari phara.

¹⁰Jüti küsa vü Faroah tü mari shehnyi wa, thinü Israel nyiri tü mari notha toke nü noküüze vü, halie, Egyptri tü nyochunyose nü mari wuovü kütse ngu nü mari tü khieloti krü. Jüti küsa vü Israel nyiri tü VÜWA vü zie;

¹¹thi mari nüh Mosa vü, “Egypt vü hiri küchohwupe arüku münyie nüh reza vünüh hiri küüsü nti sietetse ülo? Noh tü Egypt vünüh hiri siezhu nü hiri vü mowa samthuoh lo?

¹²Hama kenüh hiri nüh Egypt vünüh noh vü müküza ülo, Mosienüh, hiri nü hati vünüh küpehm luo, thi Egyptra küüroh küsam luo, ti müküza ülo? Küpakenühnyunü reza vünüh sü na küsanü Egyptra küüroh sanü küpeh nüh küümphakhe,” ti küzathuoh.

¹³Jüta küüza vü Mosa nüh mari vü shele, “Mükrü tüm nü tsiemzho luo, nosü VÜWA nüh nohkeri nüh mokümjie küroh naveh ünüh VÜWA küülole noluo, nosü nohri nüh Egyptri nguküveh tü küngulewa nyuthuoh ünüh.

¹⁴Nohri thuoüji zota mpa peh nü VÜWA nüh nohkeri nüh mari sie saluo tü naveh ünü,” ti küza.

¹⁵Jüti küsa vü VÜWA nüh Mosa vü, “Noh tü mokenüh hi vü azhü zie veh lo? Israel nyiri tü atüvü tsezhuwa üti küzaluo.

¹⁶Noh kütsüh arügi vü khake nü noh ke juhküjiwa rügivü thsuo küze nü ajuhwa kürhiethuo luo, jüti sanü Israel nyiri tü küüweh vünüh juhküji tsekari küüze luo.

¹⁷Hi nüh Egyptra luoveh tü saküükhotsü nü mari sevü zheküüze naveh thi hi nüh Faroah vü, ma thopahi vü, ma rawuh khekari vü thi ma rawuh nyiri vünüh ti eh kütholathovü ngu naveh ünüh.

¹⁸Hi nüh Faroah vünüh, ma rawuh kheka vünüh thi ma rawuh nyiri vünüh kütholathovü küngura vü Egyptri nüh hi tü VÜWA ta küsa thsüra naveh ünüh,” ti küza.

¹⁹Jüti küsa vü Saküüwuowa zhülewa Israelri thopahi tüvü kütsewa tü wa nü mari sevü peh; thi akülu tovühwa tü ma türi vü nüh wa nü maseri vü toketewa,

²⁰ru nü Egyptra thopahiri thi Israelra thopahiri masü azhie vü pehtewa. Jüti sanü jüla akülu nga thi aküzo nga ti peh; thi arüza ajü mari mükütuohluo ra nüh sanü arüza küzem.

²¹Thinü Mosa nüh ma ke juhküji nyiehvü thsuoküze nü zhieshu mürhü kükhra küsü küru nü rüza ajü kümrhü nü VÜWA nüh juhküjiwa tü asevü küülikem taji juhküjiwa chithuomtü nü saküwehtsü.

²²Jüti sanü Israel nyiri tü juhküji azhila vünüh küweh nü tseküwa vü ajuh nüh azie küsho kümjie azhie wuovü nga thi azhu wuovü nga ajuhwa thuotemtü nü wa.

²³Jüti küsa vü Egyptri tü mari zhe nü juhküjiwa zhila lovü tu, Faroah rawuh aveh, ma rawuh kheka aveh thi ma arawuh nyiri aveh mari müja wiethuoh nüh zhewa.

²⁴Rüne atholehvü VÜWA nüh anyihwa thi aküluwa tovüh vünüh Egyptri thopahiri noküze nü mari müshe müküsara nüh samtü,

²⁵Mari rawuh kheka satürü tü saküüzate nü kho shehke taji küüpri nü mari nüh, “VÜWA nüh makeria nüh hiri siesaluo vehthuoh, tinü hiri Israel nyira tü riehtewa ünüh raluo,” ti sa.

²⁶Jüti küsa vü VÜWA nüh Mosa vü, “Ajuh lirü le nü Egyptri vü, mari rawuh khekari vü thi mari rawuh nyiri vü küüru na küsa kenüh juhküjiwa nyiehvü noh ke thsuoküze luo,” ti küza.

²⁷Thinü Mosa tü juhküjiwa nyiehvü ma ke thsuoküze ünü atholehvü ajuhwa tü ma külipe vü li sheleru, Egyptri tü ajuh vünüh te nti tü mütera nüh VÜWA nüh ajuh azhila vünüh mari kürhothe khemtü.

²⁸Ajuh tü ma külipe vü mari zhe kütse rawuhkhekari, rawuhnyiri thi Faroah thopahiri aveh külüwute tewa nü anyi jüzake vü nyi küsü nga mükürho nüh sa.

²⁹Thitü Israel nyiri thuoüji ajuh nüh kümzhu müzhie azie kümjie shote nü küweh taji juhküjiwa tsekari wara.

³⁰Jüma rülo vü jükümjie vünüh VÜWA nüh Israelri Egyptra ke vünüh küloletsü; thi Israelri tü Egyptri juhküji nato vü küsü ngu.

³¹Jüti küsa vü Israel nyiri tü VÜWA nüh Egyptri vü küüroh küji küsa ngu, thi Israel nyiri tü VÜWA kükrü pehra nü ma thi ma siepewa Mosa tsotü.