Read Pochuri Naga TSESHUKÜWA 16 Bible Online

TSESHUKÜWA 16 - Pochuri Naga bible

TSESHUKÜWA 16

¹Israel ashiejiwa tü Elim vünüh tsezhu le nü Egypt vünüh tsezhu küru asa künyiawa rülo türamngawa vü ru Sin ju, azhie hamatü Elim thi Sinai masü azhie vü pehveh.

²Jüti küsa vü reza vünüh Israel nyiri ashiejiwa nüh Mosa thi Aron vü jakhujazhi nü,

³masü vü, “Hiri nü hiri kümshe thuoüji hiri tü Egypt vünüh VÜWA ke vünüh küsü nüh kümpha khe, jüla thuoüji hiri tü shuküpeh wie nga sanü asa tsa thi lohse nga kümwa vünüh tsa, ti sa, thitü nohsü nüh anyi aveh reza hala siezhuru nü kürüma vünüh küüsükhehna savehthuoh,” ti küza.

⁴ Jüti küüza vü Mosa nüh, “Halie, hi nüh nohkeri nüh thajüwu vünüh lohse rüküüturu naveh; tinü anyiri tü alievü wa nü rülo küsüsü kütsa khuhzhu luo, jüla nüh mari tü eh khonyo vünüh tse na ünü nyu nüh hi nüh mari thsü naveh ünüh.

⁵Rülo türoawa thuoüji rülo küpavü kükhuh zake künyikeri küütsa khuh nü sathe sanaveh,” ti küza.

⁶Jüti küüza vü Mosa thi Aron masü nüh Israel nyiri aveh vü, “Nosü münüleh vü Egypt zhih vünüh nohri vizhuküru nohri VÜWA ta küsa thsü naveh,

⁷thi arüne vü VÜWA kütholathovü ngu naveh, nohri nüh VÜWA vü küjakhujazhi ma nüh küünarathuoh kenüh. Küpakenühnyunü nohri nüh hisü vü küjakhujazhi tü mazhünyo mowa pehveh lo?” ti küza.

⁸Jüsevü nga Mosa nüh mari vü, “VÜWA nüh nohri küjakhujazhi küünarathuoh kenüh münüleh vü VÜWA nüh nohri vü asa tsü naveh thi arüne vü lohse nohri küpro tsü naveh. Küpakenühnyunü nohri nüh küjakhujazhi tü hisü vü nyu nü VÜWA vü küsa kenüh,” ti küza.

⁹Thinü Mosa nüh Aron vü, “Israel nyiri aveh tü ra nü VÜWA tüvü tsie luo, küpakenühnyunü ma nüh nohri küüjakünya küünarathuoh kenüh ti küzaluo,” ti küza.

¹⁰Jüti küüza vü Aron tü wa nü Israel nyiri aveh vü küza, jüti küsa vü mari nüh reza wuovü noküze ünü VÜWA kütholathovü akülu vünüh kütsa.

¹¹Thinü VÜWA nüh Mosa vü,

¹²“Hi nüh Israel nyiri nüh küüjakünya künarathuoh, tinü münüleh wiethie küveh vü nohri asa tsanaveh, thi arüne vü thuoüji lohse nüh nohri avo kümwa kütsanaveh; jüta küsa vünüh nohri tü hi VÜWA ta küsa thsü naveh,” ti küza.

¹³Münüleh vü ariekhuo sanü kütse amüwa ru nü kürünapewa protewa; thi arüne vü aküzo nüh kürünapewa tsa mükieshetewa.

¹⁴Jüti sanü aküzowa rügivü tekuo thuoüji reza vü zanyo kürüpah küwechü kürünyirüzaza ngunguti.

¹⁵ Israel nyiri nüh jüma ngu thuoüji mari küsü nüh küsü vü, “Hatü mowa thuoh lo?” ta sasati, küpakenühnyunü mari nüh jüma tü mowa nüh müküthsü kenüh. Jüti küsa vü Mosa nüh mari vü, “Hamatü nohri küütsa nta VÜWA nüh kütsü lohsewa.

¹⁶VÜWA nüh azhükütsü thuoüji anyiri aveh wie nga papa küsa küzake tsara naveh ünüh jü vünüh khuh üti küza. Juhthsüzheh küsü lovü tharuo küzake pehveh ünüh nyi küsü lü vü khu künyi nü küzhila khuh luo,” ti küza.

¹⁷Israel nyiri tü jüma müzhe nü wuori nüh küjake nü khuh thi wuori nüh züla zah nü khuh.

¹⁸ Thitü mari nüh viwa nü küütovüh nüh küüto vü küjake nü kükhuhri nga moma küluoh thi küzüla kükhuhri nga moma küphetewa; mari nyi küsüsü wie nga mari mpa mari kütsatse vünüh khuh khe.

¹⁹Jüti küsa vü Mosa nüh mari vü, “Nyi küsü nga tsatu nü arüne küju müsa tümluo,” ti küza.

²⁰Thitü mari wuori thuoüji ma zhü müküna nüh suo arüne küju sanü amüthe tü nü priküm sa; jükenüh Mosa nüh mari vü arüshu.

²¹Rüne kürüzhu mari tü nyi küsü nüh küzake tsara naveh ünüh jü vünüh khuh; thi rünyi shuru nü sateru thuoüji ratewawati.

²²Rülo türoawa thuoüji rülo küpavü kükhuh zake künyi, akhu münganga khuhkhuhti; jüti küsa vü ashieji vü sierhüri nüh ru nü Mosa vü küza,

²³ thinü Mosa nüh mari vü, “VÜWA vü kümtse kümnyie; jükenüh nohri nosü mowa vehsa naveh ünüh vehsaluo, thi mowa shusa naveh ünüh shusaluo,” ti küza.

²⁴Jüti küüza vü mari tü Mosa nüh azhükütsü üta arüne küju sa, thitü kü sah nga müküsah thi amüthe nga mütu nüh sa.

²⁵Jüti küsa vü Mosa nüh mari vü, “Nosü thuoüji hama tsaluo, küpakenühnyunü nosü thuoüji VÜWA vü kümnyie küsa kenüh, nosü thuoüji nohri tü hama alievü nüh müngura.

²⁶Rülo türo thuoüji nohri jüma khuhzhu naveh, thitü rülo türüawa thuoüji kümnyi küsa kenüh piketü kükhuhwa nyu,” ti küza.

²⁷Rülo türüawa mari wuori nüh khuh nti alievü wawati, thitü küsü nga müngu nüh sasati.

²⁸Thinü VÜWA nüh Mosa vü, “Nohri tü rülo küthake hi nüh azhükütsü thi eh khonyori kürü na lo?

²⁹Halie, VÜWA nüh kümnyi nohkeri nüh satüthuoh, jükenüh rülo arowa ma nüh rülo künyi kenüh lohse tsüthuoh, jükenüh rülo türüawa tü nohri aveh nga papa pe vü peh luo, thi papa pevünüh nyi küsü nga alievü shumwa tümluo,” ti küza.

³⁰Jüti küsa vü Israel nyiri tü rülo türüawa vü münyie peh khe.

³¹ Israel nyiri nüh lohse jüma tü manna ti ji, Ebri vünüh, “Mowa lo?” Jümatü luotikho atha kümjie, kümji, atsa thuoüji awejuh nüh külü lohse kümjie.

³²Jüti küsa vü Mosa nüh mari vü, “Thuotüvü kürhori kenüh manna hama pipi sa üta VÜWA nüh azhütsüveh, ma nüh hiri Egypt zhih vünüh vizhuküru vü reza vünüh hama tsa saveh lo ta küsa mari nüh ngu na küsa kenüh,” ti küza.

³³ Thinü Mosa nüh Aron vü, “Süzah küsü vi nü manna khu künyi nü küzhila jüma lovü thse nü VÜWA tüvü sanü athüchi kütü atsari kenüh saluo,” ti küza.

³⁴VÜWA nüh Mosa vü küza nü Mosa nüh Aron vü küüza kümjie ma nüh jüma Kütsathuo Ku atüvü sa, jüta küsa vünüh sapehuowa ranaküveh kenüh.

³⁵ Jüti sanü Israel nyiri tü mari nüh rhona küsa zhih vü müjie küru küju nü rülo rüza jüma tsa; mari Kanan zhih rüshu vü müjie ruküju nü manna tsa.

³⁶Küüweh akete vünüh küüte tü müshe mükeke.