Read Pochuri Naga TSESHUKÜWA 18 Bible Online

TSESHUKÜWA 18 - Pochuri Naga bible

TSESHUKÜWA 18

¹Mosa aku Jethro, Midiari kajiwa tü Saküüwuowa nüh Mosa kenüh thi Israel nyiri kenüh momori sa, thi mokümjie Egypt vünüh mari vizhu nüh künara kheh.

² Jüti küsa vü Jethro, Mosa aku tü, Mosa nüh ma vüvüh Zipporah jam nü teküwawa sie,

³ thi ma tsa künyi: Gershon, mazhünyo thuoüji ma nüh, “Hi tü müküthsüra zhih vü kürho kenüh,” ti sa,

⁴thi atsa künyiawa nyo thuoüji Eliezer, mazhünyo thuoüji ma nüh, “Eh pa Saküüwuowa tü hi küükrawa, ma nüh Faroah nyuchuwa vünüh hi küloletsü,” ti sa.

⁵Mosa aku Jethro nüh ma tsa künyi thi ma vüvüh tisie nü Mosa nüh kürünape reza vü saküpeh Saküüwuowa küzhi vü ru.

⁶Thinü anyi küsü nüh wa Mosa vü, “Halie, noh ku Jethro tü noh vüvüh thi ma tsa künyi ti sie nü noh vü tse lie,” ti küza.

⁷Jüti küüza vü Mosa tü ma ku mütu nti alievü wa, thi küngie tsuo ma siekesheh nü ma kümetsü nü masü küsü nüh küsü vü mhieveh tünti künaluo nü juhthsüzheh lovü tetu.

⁸Jüti sanü Mosa nüh ma ku vü VÜWA nüh momori Faroah vü thi Egyptri vü Israelri kenüh sanüh, lehkhuji vü momori kükho küsüro mari vü ru thi VÜWA nüh mokümjie mari vizhunüh aveh küza kheh.

⁹VÜWA nüh Israelri vü anyo kümhie küsa, Egyptri ake vünüh mari küvizhu kenüh Jethro tü ma lozhe.

¹⁰Jethro nüh, VÜWA tü kümngatsawa saluo, ma nüh Egyptri ake vünüh thi Faroah ke vünüh nohri küvizhu kenüh.

¹¹VÜWA thuoüji nyiazari aveh zhievü nüh küjitsawa ta küsa hi nüh thsüvehthuoh, küpakenühnyunü ma nüh Israel nyiri tü Egypt anyira ke kükhu vünüh thi mari vü rhieza sheh küveh vünüh mari küvizhu kenüh, ti küza.

¹²Jüti sanü Mosa ku Jethro tü kütso kükhurü thi küsahthuori sanü Saküüwuowa tsü; thi Aron tü Israelri kükhruori aveh Mosa aku sie nü lohse tsa nti VÜWA tüvü ru.

¹³Rülo jüma nyie Mosa tü Israel nyira zhievü küüjakünya sathuotsü nti sa, thi anyiri tü rüne vünüh münüleh küju Mosa mükieshe nü tsie.

¹⁴Mosa nüh anyira ke nüh saküvehri ma ku nüh küngu vü ma nüh Mosa vü, “Noh nüh anyiri kenüh saküveh hatü mowathuoh lo? Hatü mokenüh noh mpa saveh lo, thi anyiri tü mokenüh arüne vünüh münüleh küju noh mükieshe nü tsieveh lo?” ti küna.

¹⁵Thinü Mosa nüh ma ku vü, “Küpakenühnyunü mari nüh Saküüwuowa kümshe küna nta hi vü ruruti;

¹⁶mari tü mari azhievü mükükato peh thuoüji hi vü ruruti, thi hi nüh ma thi ma zhephruwa zhievü sakükato tsütsüti, jüti sanü hi nüh Saküüwuowa zhühkhe thi ma küzhühthuori saküthsü tsütsüti,” ti rületsü.

¹⁷Thitü Mosa aku nüh ma vü rüle taji, “Noh nüh mowa saveh ünüh jünü müküleh.

¹⁸Noh nga thi anyiri noh kütuoh vü peh küvehri nga münotewa naveh, küpakenühnyunü hatü noh kenüh küzho le, noh mpa nüh müsara.

¹⁹Jükenüh eh zhü künaluo, hi nüh arüleh phah nü noh tsü naveh ünüh, thi Saküüwuowa nüh noh kükra kütsüwa sa wie naveh! Noh nüh mari sie Saküüwuowa tüvü ru luo, thi mari küüjakünya nga Saküüwuowa ake vü thse luo;

²⁰thi noh nüh azhühkheri thi azhühthuori vi mari sosie nü mari mokümjie küsale nüh saküthsüluo.

²¹Jü mpa mükünyu anyiri aveh zhievü nüh küsarari, Saküüwuowa kükrüri, anyi kütsotürari thi athe mükülori chuh nü anyi anyieh nyieh vü, müzake nyieh vü, tünyieke nyieh vü thi türake nyieh vü takrü küüsaluo.

²²Jüti sanü tsotho aveh vü mari nüh nyiri lesa küüsaluo; küüjakünya küjiri thuoüji vi nü noh vü küüru luo, thitü aküzahri thuoüji mari mpa nüh küüzhühthuo luo; jüüta vünüh noh kenüh rüzi naveh, thi mari nüh noh khuo vükrara naveh.

²³Noh nüh hakümjie sa, thi Saküüwuowa nüh hakümjie vünüh noh vü azhütsüra ti thuoüji noh tü mükho nüh vüra naveh, thi anyi hamari aveh nga luoveh kürüzi ti mari pe vü wara naveh,” ti küza.

²⁴Thinü Mosa tü ma ku azhü küna nü ma nüh küüzari aveh sakheh.

²⁵Mosa nüh Israel nyiri aveh vünüh küsarari rüka nü anyira nyiehvü alü küüsa, anyieh nyiehvü, müzake nyiehvü, tünyieke nyiehvü thi türake nyiehvü ti takrü küüsa.

²⁶Jüti sanü tsotho aveh vü mari tü anyiri ale sa; ashih kükhori thuoüji mari tü Mosa vü viru, thi kürüzirithuoüji mari mpa nüh küsathuo sa.

²⁷Jüti küsa sevü Mosa tü ma ku siep